يوم الخميس جاءنا الخبر ، وجيناكم يا حبايبنا بعد غربة وشوق وأنا جاى عليكم لاقيت أخونا جنو وانتو عارفين جنو الفارق حنو لايوق زى ملاح الويكة ، اصّر على ّ لازم امشى معاه ، يا جنو انت وادينى وين ؟ اسكت أمشى معاى يا مهترش والله الليلة أشبعك شبعه بالطريق الصاح ، وانتو عارفين أخوكم مهترش نقطة ضعفه الككوك بالطريقه الصاح وطالما الحكاية فيها أكل يبقى المشوار جايب حقو يعنى مشوار مية مية ، ما قربنا يا جنو ، يا مهترش ما تستعجل أنت قايل الزحمة دى من شنو ، الناس ديل كلهم ماشين العزومة النحن ماشين ليها ، نقنقنق....، خلاص وصلنا يا مهترش
شايف الصيوان الكبير دا ، دى عزومة أخونا أبو العلاعل اليوم جاء من السجن
شنو قلت ، قت ليك اليوم جاء من السجن
والله قصة وأخره لسه ، كمان الواحد يجى من السجن ويعمل عزومة ، طيب لمن يجى من الحج يعمل شنو ، وهسة الصيوان الكبير وسمح زى احتفالات الوزراء دا بتاع زول جى من السجن ولا عرس بت وزير ، ولا العربات ، أنا ما قايل الكرين ودلالة العربات جابوها هنا، معليش يا جنو سؤال فى الحب أنا أصلى اليوم أول مرة أمشى فيها عزومة زول جى من السجن ، عزومة الزول الجى من السجن زى عزومتنا بتاعت العرس والبكى ولا عزومة ما فيها كشف ، كيف يا مهترش عزومة الزول الجى من السجن نفس عزومتنا بس هنا الكشف غالى شوية لانو بتأكل كويس لازم تدفع كويس ، هسه فى عزومة زى دى الناس المساكين زينا بدفعوا كم ؟ انا بدفع 100 الف ودا اقل مساهمة ممكن تندفع ، يا جنو أنا 75 الف تودينى بوفى مفتوح أكل اليوم كلو ، يا مهترش أنت ما عارف حاجة هنا الأكل مافى زيو ، عشنا وشوفنا الأكل لكن أنت هنا بشوف براك، وتعيش كتير تشوف كتير .
يالله يا مهترش بارينى ، السلام عليكم ، أخونا أبو العلاعل حمدلله على السلامة ، بركة الشوفناك طيب ، الله يسلمك ياجنو ،
وانشاء الله رحلة كانت موفقة ، الحمد لله يا جنو ، وزى أهلنا ما بقولوا المال تلتو ولا ك تلتو قايتو طلعنا بس بى نص الربح ،
وكيف خليت ناس السجن كلهم ، كلهم تمام وما عندهم عوجة يسلمو عليكم كتير السلام
والجى معاك منو ، أنا جيت براى لكن أخوى العشارى جى قبلى بى كم يوم يهداك ألابس العباية والعمتو كبيرة زى عمة ترباس داك امشوا سلمو عليه ،
ونحن ماشين على العشارى يا جنو أنت جادى الزول دا جى من السجن ، اى يا مهترش مالو ، والله ياجنو الزول دا تقول جاى من ابوظبى وكان قاعد مع ود المطامير والهندى بتاعم يعمل ليهم الأكل بالطريق الصاح ، عاين ليو ابيض وناير وسمين كيف هسة دا سمن زول كان فى السجن ، اسكت اسكت ، السلام عليكم الف حمدلله على السلامة يا العشارى ، يا جنو ، الله يسلمك ، كيف ومشتاقين ، الحمدلله يالعشارى أنت كيف ، والله الف حمد يا جنو ، إنشاء الله إجازتك طويلة شوية الدورة دى ، والله يا جنو قايتو ، بس عندى حبه أمور اقضيها وارجع وأنت عارف الأولاد براهم وبقو ما بستحملوا السجن من غيرى وكمان السباعى والسوداسى الأيام دى عاوزين نرقيهم ويبقو تماسيح كبار لازم نكون جمبهم ،
وشاقين الطرابيز ماشين نشوف طربيزة نقعد فيها، طربيزة فيها واحد وهو يحكى للجماعة عن يوميات أبو العلاعل فى السجن ويقول والله يا جماعه السفر دا فى فوائد كتيره وأبو العلاعل قال انا قبل ما أمشى السجن كت قايل الشغل فى السوق لكن اتضح لى انو الشغل فى السجن ، خلو ود المطامير يحكى ليكم عن القالوا كان قاعد معاهم
ومشينا قعدنا فى طربيزة بعيده شوية من التماسيح الكبار وأنا مقلع عيونى وأتفرج فى الأكل بالطريقة الصاح ، وما قادر أتكلم ، هو أتكلم أقول شنو ، مشاوى بالطريقة الصاح ، شية جمر وشية سلات وشيات كيف وكيف ومشاوى زى المشاوى شى جداد وشى حمام وشى أرانب قايتو خلوة الحصل زى عشرين صحن اى واحد اسمح من التانى وانا عيون زى بندور الساعة ويدى لما ادور اشيل لقمة زى يد السواق اليدو فى التحشيقة فى الوحل ، قايتو الواحد شبع شوف ، وأنا مافى داعى اكتر عليكم واقول ليكم عن الفواكه قايتو العنب كل المقاسات من قدر النبقة لى الليمونه والتفاح كل الالوان زى اشارة المرور اخضر واصفر واحمر ، قايتو خلو عم محجوب يحكى ليكم عن الشى الشافة ، معليش يا شباب أنا ماشى عاوز ود المطامير شايفو طلع احصلو قبل ما يزوق قالو كان مع أبو الثعالب فى سوق العيش عاوز اعرف الحاصل هناك شنو ، هسى أنا اطلع بى وين ، الباب الكبير بكون فيه كشف والتانى دا برضو ، ايوااا انا اطلع بى الباب الصغير دا ، السلام عليكم يا أخوانا الغسيل هنا ؟ الجماعة القاعدين فى طربيزة الكشف لا لا يا حبيبنا الغسيل بى هناك والمكوة هنا ...
ونواصل فى الهترشة الجاية
رد مع اقتباس
المشاركة الأصلية كتبت بواسطة mahagoub
المفضلات