الحمد لله رب العالمين ، حبيبنا السلام عليكم ، ثلامات (بتاعت هناية) للغالين ، مش بقولوا رب (دقيقة خلو بت الرفاعى تجى تشكلة) صدفة خير من الف ميعاد دى كانت صدفتى الليلة ، والليلة يوم ما ساهل بجد بجد اول حاجة جانا مولانا جلال زول الحب والوفاء ، ورجع لينا حبيبنا الغالى مودى شكلو شهر 2 دا شهر حب ساى .
آهآآآآآ
وانا ماشى فى شارع الدكاترة لاقيت فشلا ( فشلا دى على وزن كسلا وفى ناس حقارين يقولوا السودانيين من شدة كسلانين عندهم مدينة كاملة اسمها كسلا ، لكن فشلا دى ما مدينة فشلا دا لقب صاحبى شنودة )
يا مهترش يا زول ه
وعليكم السلامة مرحبا ، انت ما عرفتنى ولا شنو
معذرة انت عارف الذاكرة بقت خربة ، فشلا ياخى لا (صاحبى شنودة ) اصلو ما بصدق ودا شنو يازول بقيت سمين كدا وعملت ليك تلاجة 16 قدم انت عارف الفترة طالت وملامحك اتغيرت ، ومالك بى جاى
فشلا : جيت اعمل لى فحص بتاع كلى
مهترش : طيب ارح لى زميلنا كفاوى عندو معمل قريب وانت عارفو زول شاطر من ما كان معانا وطوالى يسالنى منك
بعد السلام واخذ العينات
يا كفاوى نخليك تشوف شغلك ونقعد انا وشنودة دا برة نتونس لحدى ما تنتهى
يا مهترش الجديد شنو
مافى جديد ، لاجديد يذكر ولا قديم يعاد نحن يانا نحنا لا غيرتنا الظروف ولا هدتنا محنة
انت احكى لى الحاصل بيك طولنا ما اتلاقينا اخر مرة لما كنت عامل الكافتريا
طبعا يا مهترش انت زول عزيز وانا ما بدس منك حاجة والكافتريا دا زاتا بداية الفشل يجو الشباب ياكلو يشربوا ويتونسو ويقولوا لى تبقى طالبنا ( ابو النور مختفى ، ما تنسى يا ابو النور انا طالبك جبنة وعشرة ونسة ) وعرفت انو الكافتريا دى ما جايبة حقها والشباب قالو لى استثمر فى تجارة الكهربا ومواد البناء وانت اصلك بتحب الكهربا والادوات الكهربية قمت سافرت وجبت دستتين مراوح ، مراوح ، طبعا يا مهترش مراوح قدر قروشى الكافتريا كملت قروشنا كلها يعنى انت عاوزنى اجيب اسمنت والمشكلة المراوح ابت تتباع بدين بالكسر ابت تتباع ، قمت ركبتها كلها فى غرفتى الكنا بنقعد فيها ديك عملت ليك فيها 21 مروحة 4 فى كل حيطة و5 فى السقف وضربنى ليك السقط بالطريقة الصاح وفضل لى 3 مرواح دقست بيهم بحيرى ولا هو الدقسنى انا ما عارف قايتو انا بعتهم ليو وهو لسه ما ادانى قروشم يعنى ابقى طالبو ومن ديك عرفت ليك انو التجارة دى سقط ما عنى ليو هدوم ،
قلت اشوف الكورة وانت عارف اخوك كورة حبة من زمن دافورينا داك لكن بى حبه شفتنا وعزومات لى كوتش ابو عبد الرحمن فى اسطنبول لقيت نفسى لاعب فى الشوط التانى فى مبارة الدورى النهائى وقت دى فرصتك يا فشلا واخوك لاعب مهاجم لعبو ليه باص بالطريقة الصاح وقام جارى بيهو تقول موتر سوزوكى وجبتها ليك قون ومن الفرحة جريت على الكورنا انطط اكتر من الجمهور قلت اديها رقصة زى بتاعت الشفوت اشوف ليك حكم الراية رافع الرايه وقال اوف سايد شفت يا مهترش حتى هدف حياتى طلع تسلل ،
قمت بى قرفتى ديك رجعت للتعليم وانت عارفنى انا زول بتاع كهربا وكهربتى زائدة وزى ما بقول ارسطو" التعليم زخرفة فى الرخاء وملجأ فى الشدائد"
خشيت جامعة الخرطوم كلية الهندسة من خشيت لحد ما شلت درجة الشرف فى الهندسة الكهربائية كارى الدفعة ( اول الدفعة) وقت خلاص بعد دا لبس نضيف وكرفتات وعربات موظف بالطريقة الصاح بلا كافتريا بلا كورة ومن معاينة لى معاينة لحدى ما لاقيت ليك عثمان جلالة فى معاينة واتعرف بيه واتفقنا بعد المعاينة نمشى نفطر سوى وبعد الفطور اخر ضحك وونسه ،المعاينة كانت كيف يا شنودة قلت ليهو قطعتها ليهم فى راسم اى سؤال جاوبتو ومتأكد منو الا السؤال الاخير بتاع عرف الكتريستى (electricity) يا شنو دا سؤال انا بعرفوا قلت ليه لا يا اخوى عثمان جلالة انا جاوبت ليهم اسئلة عضم فى التخصص الدقيق ما ممكن يسالونى سوال ساهل كدا عرفت الشغلانية فيها خدعه وقمت فكرت وفكرت لقيت اليكترستى بتتكون من اليكتر ، وستى وستى دى مدينة وقلت الجماعة ديل حركة اسلامية وجاوبت ليهم طوالى وقلت ليهم المدينة المنورة
وبرضو ما شغلونى لا انا ولا صاحبى عثمان جلالة قالوا السبب اسمى شنودة ودا اسم اقباط ، طبعا صاحبى عثمان ضرب الخلا وقال يرعى احسن ويرعى بى قيدو ووصانى وقال لى يا شنودة الخلا ولا الرفيق الفسل ،
بعد داك بقيت خمسة سنين ما بتاعت ود الامين خمسة سنين سائق الشاحنة بتاعتنا من الخرطوم لى بورتسودان وقلت مدام هى كلها سفر احسن الواحد يسافر (مسافر وين) ويغترب قمت اتصلت ليك بى اخونا ود المطامير يرسل لى عقد عمل
مهترش : ياخى كيف الزول دا بلاى ، اوع يكون قال ليك ، هع هع هع قال عقد قوم بلا عقد بلا بطيخ
فشلا : والله هو ما قصر هو زول ضكران بطول دقنو وما بقصر مع زول ومعاى انا ما قصر فى حاجة جابنى ليك ولقى لى الشغل بس المشكلة لازم اطلع رخصة البلد عشان اسوق وقاعد معاه وياكلن ليك اكل بالطريقة الصاح وانت شايف بقيت كيف ويوم عندى امتحان رخصة قلت دا اخر امتحان نجحت نجحت ما نجحت ارجع السودان لى اهلنا البقول حبيبك لو بقى عسل ما تلحسو كلو وانا مطرة دا تقلت عليه ، وبرضو ما نجحت ، قلت الحمد لله العتره بصلح المشى وقمت سالت الضابط وقلت ليهو ورينى سبب الرسوب عشان اعالجو لى قدام عارف قال لي شنو يا مهترش قال لى عدم سيطرة ، شر البلية ما يضحك قمت ضحكت ضحك شديد خلاص لمن الضابط احتار وقال لى شو فيك قلت ليهو والله عجبتنى سيطرة حقتك دى يا اخى انا من انا جريو سايق عربيتنا لى ابوى والخمسة سنين الفاتت سايق الشاحنة بتاعتنا البى ترلتين تقل لى عدم سيطرة والله عربيتكم الصغيرة دا انا بى كرشى دى اسيطر عليها ، قوم بلا سيطرة "بلا سعادة سيطرة " ،
بعد داك جيت راجع وهسه لى اسبوع وقبيل قاعد بفكر قلت انا اى فشل جربتو ما فاضل لى الا الفشل الكلوى قلت اجى اختبروا
مهترش : والله يا فشلا انا ماعندى غير اقول ليك زى ما قال سيدنا يعقوب عليه السلام وعلى نبينا محمد افضل الصلاة والتسليم وعلى جميع الانبياء والمرسلين ، قال تعالى : (وَلَا تَيْأَسُوا مِنْ رَوْحِ اللَّهِ إِنَّهُ لَا يَيْأَسُ مِنْ رَوْحِ اللَّهِ إِلَّا الْقَوْمُ الْكَافِرُونَ)" جزء من الاية 87 من سورة يوسف" ، واعك تيأس وابقى زى اديسون لما قال " لم افشل ، فقد وجدت 10000 طريقة لا تعمل " .
هسه نخشى دكتورة الاء عبد الرحمن قريبه بيجاى تديك علاج ناجع ان شاء الله لى احباطك دا .
تخريمة :
البوست دا زى ما بقول عم محجوب الا تقسطو يعنى بالعربى كدا اسف لى الاطاله
البوست دا بتاعك يا دكتورة الاء لتطوير الذات عاوزين نصايح وحاجات ثمحة ( بتاعت خالتو مايسة )
وفى امان الله لحدى الهترشة الجاية
رد مع اقتباس
المشاركة الأصلية كتبت بواسطة نزار احمد محمد
المفضلات