هم عارفين ....
بيناتنا شارعين
وزقاق فى نص الحلة
وكوم رمله وحجرين
وكلب الحلة ينبح فى الساكنين ....
استنيتك فى ضل المطرة
وذى وعدك لما قلتى ليا جاين
كوركت ليك بى فوق الحيطة
امرقى نلعب المطرة كبت
وانا وانت مجرد شافعين
لبستى برطوشك وقلت ليك
مابنفع احسن نكون حفيانين ...
فاكرة اليوم داك ونحن اطفال
وجرينا بأحلامنا بعيد من الكبار
والناس وخفجنا الطين
وكنا مبسوطين ..
وقتين قلتى بكرة بجى وبفرقنا
وتسمع ياولد كيف بدور
تلعب مع البنات ...
ويابت كيف تلعبى وسط الصبيان
وقتها ماصدقت كلامك
وقلت لا حنكون برضو طفلين ....
اها جات المطرة وقعدنا بأحلامنا
نرسم فى الواطة شكلين
وجمعنا الطين
ونحتنا بويتنا وسقفناها من قش
الواطة الجايبو سيل المطر ...
وضحكنا واتلابعنا وسط المطر
ورجعنا البيت مبلولين
وكورك فينا شيخ الحلة ادخلو
لى جوه انتو مبلولين
ماكان فى كهرباء ولا صوت عربات
كل الكان حمارين
وعجلة حديد وكارووحصان شيخ الحلة
ولعنا الرتينة
وقعدنا ملمومين
والناس فى الحلة يتكلموا عننا
ونحن مرة لا بسين
ومرة عريانين
ماكنا اطفال وماعارفين
والتلمينا كلنا شفع الحلة
فى صحن شعريه وقراصة
وكورت لبن
وجابو لينا كمان لقمة عجين
وكنا بناكل ومستنين
الناس ينومو شان نمرق
وتانى نلعب فى ضوء
القمرة ونشوف ايدينا جوه
موية المطرة والناس نايمين
ونحن اطفال فكيت تسريحتك
ونشفت شعرك من موية المطرة
ولعبنا برانا
شليل وينو شليل وين راح
وفجأة سرقنا النعاس
ورقدنا ملمومين
وقمنا مخلوعين
وضحكنا
اصلها كانت مسالة ريدة
وانحنا ماعارفين ...
وكبرت حلتنا وكبرنا معاها
ودخلو لينا الكهرباء
والناس مبسوطين
ونحنا كبرنا
كمان سنتين
وحلمنا كبر
كمان حولين
رد مع اقتباس
المفضلات