رهين الغربة
مسكين يا رهين الغربة مسكين طال إسارك
لآمتين القيود تنحله ترجع لي ديارك
الليلة جيت ماشي تقاسي مطوطيها نارك
حتى العيد سمعتبو مرة ما طلاك زارك
لا صحاك صبيح الرؤيا لا هو قعد جوارك
قال ليك عيد مبارك يلا البس لي غيارك
لا اتعمعمته لا اتجلببته فرحان زاد نضارك
يا مسكين تراكه تحنن العدو بي غبارك
لا عيد على الأخوان ولا هنيت جارك
لا روح ود عجل ( المقابر) صليت لا زول قال مبارك
لا شافت عيونك فرحه لا لاعب صغارك
لا غنيت أغاني البهجة تطرب بيها دارك
من ما جيت بس وريني قول لي شن عمارك
غير حرقه ولهيب متواصل قاعد فيها مالك
الليلة بوصيك كان سمعته وصيتي لي حالك تدارك
وصية زول عيونوعليك مسكين قلبو دارك
شن خلاك تفارق الحله لي مين سبته دارك
ومين شالك رماك في قفله من نيلك ودارك
الليلة وين داك الزمان الصافي نازل قاص خضارك
والجدول متسبي مويتو قراع طول نهارك
كنت سعيد بحالك راضي ليه فكيت جبارك
وليه درب الأهل فارقتو ليه غير مسارك
الليلة ما كان اليقين ماليكه والمقسوم شعارك
مالك ومال لهيب الغربه مطاير شرارك
بين خيرين هناك كت هاني تآكل من ثمارك
خوفي عليك من الفيهو لا ياكلك ودارك
تبكي وتشكي لي طمبورك يا مسكين ضرارك
أجارك الله في فقدك أجارك
رد مع اقتباس
المفضلات