حاج عبد الصمد . . العريبي . . راجل بشوش . . و سدرو واسع . . حافظ الأنساب العربية صم . . كان لقى فوقك فرصة يغالطك في أبوك الجابك . . و من لسانك يعرفك كان انت عريبي و الا متسلبط ساكت فوق العرب . . راسم ليهو شجرة نيم في حيطة أوضتو . . فيها قمرية معشعشة . . قال القمرية المعشعشة دي هي أسرتو العريقة . . و منحدرة من سلالة أحد صحابة رسول الله عليه الصلاة و السلام . . و كان جيت تتفاصح و تتشولق و قلت ليهو الكلام دا عيب منك . . تكون غلطان . . و اتلومت فوق نفسك . . و أمك دي تكون جابتك بالفة الجمب المزلقان . . وحات سيدي الحسن . . يشيل عكازو و يقع فيك لبع و لتخ . . الجاري عليك ما يلحقك . . و يطلعك عب أغلف . . و سنيناتك مكسرات . . و أمك بتسوي المرايس . . و بالليل بتقلب اكس اكس ال . . حاج عبد الصمد دا . . مناهو في الدنيا يلبس ليهو عقال و بنبطح ليهو في خيمة . . و حوله سرب من الجواري يعصرن ليهو ضهرو . . عندو تمانية بنات . . بايرات . . الكبيرة فيهن حوصة . . بتشوف اتنين اتنين . . و الوسطانية الزبابة الرملية قارصاها و معوراها في جضما . . الضبان أيام الله السبعة ينوني في جضما . . و البنات ديل جت لونن أسود . . لكن حاج عبد الصمد بقول بناتي ديل خدوريات . . زي شجر الأراك . . و أصلهن طيب . . و معدنن من جزيرة العرب . . أنا ما عارف السودانيين ديل جابو مسمى اللون اللخدر دا من وين . . أصلو ما حصل سمعنا لينا بي بشر لونو أخدر عيلا عند السودانيين . . يمكن هم بقولوا فلان لونو أخدر عشان يهربوا من اللون الأسود . . المهم حاج عبد الصمد . . حالف يمين ما يزوج بناتو ديل عيلا لي عروب زيو . . و كان جاء واحد يختب واحدة فيهن . . يقول ليهو اديني وكت أشاور في أصلك و فصلك . . و أعرف أين أنت من العرب . . البنات نجضن . . و كبرن . . و بارن . . و فات فوقن الفوات . . و حاج عبد الصمد العريبي لسة يشاور في أصول عرسان بناتو. . مستني تجي كوتة عرب يستروا ليهو بناتو . . أخر شيء . . مسكتو رجفة من عرس البنات . . و قعد يشحد بيهن . . للبسوى و الما بسوى . . برضو شرط يكون عربي ابن عربي . . الحمل ذاد عليهو . . و الشغل في السودان ما بعيش ليهو اسرة فيها تمانية بنات . . باع حواشتو و هاجر للسعودية . . لحق ناس قريعتي راحت . . الطفشو زمان و ما رجعوا . . يمكن يلقى ليهو قرعة مليانة قروش . . يقدر يعيش بيها مع بناتو البايرات . . اشتغل راعي . . في قبيلة بتاعت عرب بدو . . كلامن كلوا سيف و سكين . . و كتلتو و سلختو . . و كان متكيف انو اشتغل في أرض العرب . . اشترى ليهو موبايل . . و بقى يشيل و يتصل بي بناتو و هو قابع بين حلال كفيله . . و يحكي ليهن عن أهلو العرب . . و عن طبايع العرب . . و ياريتكن كان كنتن معاي عشان تعرفن معنى العروبة . . و كان شفتن العز الانا فيهو . . و هو لسة خالف كراع فوق كراع وسط البهايم . . اليوم داك حاج عبد الصمد كان سارح بي بهايم أهلو البدو . . كان يشوف ليك البدو ديل اتحزموا و اتلزموا و مشوا غاروا علي القبيلة المجاورة لهم . . كتلوا ليهن جمل كان سارح بيهو برضو واحد سوداني و جو صادين. مبسوطيييين . . لكن الجيران زعلوا . . كيفن ينكتل ليهن جمل في عقر دارهم . . كان كدي هم ما رجال و ما عرب . . قاموا شالوا سلاحن و قالوا عيلا يمشوا يكتلوا ليهن جمل من قبيلة أهل عبد الصمد . . و فعلاً . . هجموا علي عبد الصمد و بهايمو . . و اختاروا أجمل جمل و نحروهو و صلبوهو . . أهل عبد الصمد زعلو و حمبكو . . و قالوا كيفن جملنا ينكتل و ينصلب . . الليلة عيلا ناخد بي تار جملنا المصلوب . . و مشوا علي الجيران تاني . . لقوا ذاك السوداني سارح بي قطيع من الجمال . . كتلوا السوداني . . و صلبوهو . . نكاية بي جملهم المات مصلوب . . اليوم التاني الجيران قالوا نحنا نكتل جمل . . يقوموا الجماعة ديل يكتلو معاهو سوداني . . الليلة عيلا نكتل السوادني بتاعن . . زي ما انكتل السوداني بتاعنا . . و عبد الصمد بقت عليهو رجفتين . . رجفة بناتو البايرات و رجفة تار القبيلة العربية المجاورة . . سب للسعودية . . و كره العرب جت . . و كاس للطريق البتخارجو من الورطة دي . . لكن عاد كيفن . . في النهاية انتظر الليل نزل . . و شال مخلايتو الجاء بيها من السودان فوق كتفو . . و كب الزوقة . . جاء راجع السودان . . ايد وراء و ايد قدام . . و مخلايتو معلقها فوق كتفو . . اليوم التاني خت كرسيهو في الشارع . . و قعد يبرم فوق شنبو . . البجي فايت بي عندو كلو و ما بسلم عليهو . . يقول ليهو . . مالك ما بتسلم يا عب.
رد مع اقتباس
المفضلات