الســـــــــ عليكم ــــــــــــــلام
احبتي واخوتي في المنتدى ضيوفا واعضاء
في موضوع بصراحه كل مره اقول لو ربنا يلمني في مسؤل بس اناقشه
في الموضوع واعرف ليه بس نحن كده؟
الموضوع باختصار عشان ماتقولو كلامي كتير عن اللي وصفوها البعض من الصحفيين
شاشة الفــــــاضيه السودانيــــــــه
انا عاوز اعرف ليه نحن بنحاول نظهر للعالم اسوأ ماعندنا
الناس كلها تختار افضل ماعندها عشان يعكس للعالم الخارجي
وجه الجمال والحضاره والثقافه العندها
ونحن للاسف مابنعاين لا بره ولا حتى جوه.
المشكله برامجنا محدوده وكمان ممكن نقول قديمه ومن غير مواعيد
ومن غير شكل ناجح في الأخراج ولا التصوير ولا اقل التقنيات المتوفره حتى في افقر الدول.
انا مابقول كده الاّ غيرة على سوداننا الحبيب,
الناس بره السودان بتتريق على التلفزيون السوداني لأنهم شايفين الفضائيات التانيه.
انا ماعاوز أشوف تلفزيونا بمستوى هابط ولا خليع لكن بشوية تتطوير وشوية التزام في المواعيد وتطوير للبرامج.
كمان في حاجه بتغيظ بصراحه وبتتكرر طوااااااااالي نشرة الساعه 10 مساء احيانا تتاخر من الاعلانات ولمده تزيد عن 3 أو 4 دقايق وبكل بجاحه يجيبو ليك ساعة ال LG عشان تاكد انه الساعه 10..
وفي حاجات كتييييييييره لو اتكلمت عنها حيقولو عنصري وانتو فاهمنها ومافي داعي لتوضيحها.
وممكن نشيد بعض الشيء لقناة النيل الازرق التي تحاول بقدر الامكان تطوير البرامج واختيار الاجمل لنا في الخارج وكمان في الداخل,,
احترامي للجميع ولكن ياريت نطور تلفزيونا عشان يعكس كل جميل عن شعبنا وبلدنا الحبيب.
رد مع اقتباس
المشاركة الأصلية كتبت بواسطة المميز
المفضلات