أستبيان

[lola]

لقد أقترح الأخ نشأت الإمام عمل أستبيان يضم سؤال واحد وهو:
لماذا أهل مدني يحبون مدني؟ أو لماذا كل هذا الحب لمدني؟

وقد قمت بإرسال هذا السؤال الي كل الأعضاء المشتركين في دليل ودمدني.
ولكن للأسف لم لم أتلقي الإهتمام الكافي لهذه المسالة أو ربما لأنشغال البعض.
علي كل حال، فانا أطرح هذا السؤال علي كل الذين يصلهم هذا المقترح.

وما تبقوا يا ناس مدني زي المثل البقول: ( كان داير تفرق ناس مدني قول ليهو أعملو اجتماع أو جمعيه أو إتحاد).
أرجو من المشرف أن يهتم بهذا الموضوع شخصيا.


تحياتي..

[114]

لأن مدني حنينه، وناسا حنان، وجوها جميل، وهي منبع أعلام المجتمع السوداني: سياسيين، أدباء، رياضيين، إعلاميين، زعماء دينيين
مين يكمل؟

[khalil]

سؤ الك ده يا عركية يا صديقة الجميع زي لما تقولي لي زول ليه بتحب أمك ؟

[امير عبدالباقي]

لولا او عركيه اقولك بكل بساطه ليه ناس مدني بحبو مدبي
انت من اي فريق كم مره اكلتي عند جيرانكم الي عاشر جار من غير عيزومه؟ كم مره اهلك سافر لمناسبه وخلوك مع الجيران؟ فينا الطيبه
كم عندك صديق من خارج الفريق؟ بعد ماتجاوبي هذه الاشياء مابتلاقيها في اي مدينه
تانيه رقم كرم اهلنا السودانتين .

[أبوريلان]

الأخت عركية تحياتى ، للرد على هذا السؤالأركبى بص من مدنى للخرطوم عندما تصلى اللوحة بتاعت ولاية الخرطوم أقصد الحدود الجغرافية بتقدرى تجاوبى على هذا السؤال .

[lola]

سلام شيخ عبد الباقي
والله دي أحسن رد انا لقيتو ، لأنه معبر شديد. فعلآ عند وصولك للافتة ولاية الخرطوم . خلاص كأنك ماشي للموت بتودع روحك وأهلك وعزتك و......................


وبلدنا ما بلدك ما تمشي فيها أصلوا


و مليون تحيه وإحترام
عركـــــــــــــــــــــــــــــــــــــــــــــــ ـيه

[أبوريلان]

غنت حنان بلوبلو مدنى الجمال وأنا مالى الخدار مرق لودارى ،

شكرا عركية ومزيدا من الأفكار وعلى فكرة الرد من أبو ريلان وليس شيخ عبدالباقى مع أشواقى للشيخ عبدالباقى ولشخصك ودمتم .

[مزوني]

والله العظيم يا أختي عركية ماعارف أقوليك شنو
لكن با الجد مدني حبها ماليه حدود وبعدين أبسط حاجو
ولي حكمة ما يعلم بيها إلا الله سبحانه وتعالى
بيقولوا في الشارع وحقو نقولها كلنا بصوت واحد
البيفارق مدني يقراها بالقلبة
يالله أقلبوها وورويني رايك ورايكم يا شبابنا
الحلوين كلكم
مع خالص حبي وتقديري

[lola]

مرحب بيك يا مزوني والله مشتاقين
انت عارف انا اول مره بقرا مدني من القلبه -البفارق مدني - يندم .
شكرا كتير علي الإفاده والمعلومه .

الله علي مدني في الأيام دي.
الحمد لله علي كل حال .
صدق بنعرف واحده زوجها نقلوه مدني لأول مره ، ولما سمعت زوجته وأهلها الخبر قالوا بتنا ناقلنها الجزيره ، وما بتمشي الجزيره ، وحتي هي ذاتها أغمي عليها لما جات تسافر . نهايتو - جات مدني واتخلعت من مدني وناس مدني وهسه نحن ناس مدني كايسيين في الطريقه التمرقها من مدني وهي رافضه . بالله شوف .

[mudatheir]

شكرا ليكم كلكم وحكمة ربك نحن ناس مدني بنحب مدني موووووووووت وكان فارقناها بنقراها بالقلبة وحكمة ربك برضو بنمتاز بإننا نحن ناس ما عنصريين ، وأل ما بوافقني الراي يرفع يدو عشان يردو ليهو ... أما ليه بنحب مدني؟؟ أرد عليك بنكتة سمعتها من الاستاذ عبد العزيز محمد سعيد ود العمدة قبل 25 سنة عندما كان استاذا بمدرسة زروق (سأل استاذ العربي التلميذ أشرح مايلي : طائر يشدو على فنن جدد الذكرى لذي شجن ، فرد عليه التلميذ : يعني كان في طائر بيشدو على فنن بعدين الطائر ده قام جدد الذكرى لذي شجن ) انتهت النكتة بس يخيل لي تكونو عرفتو ليه ناس مدني بحبو مدني ؟؟ واضحة ياخ

[أبوريلان]

الأخ مدثر حسب الرسول لك الأشواق النكتة بتاعتك دى زى القالوا ليه قول نكته وهو ما داير يقول نكته قام قال ليهم فى نملة طلعت رأس الجبل وقامت وقعت قالوا ليه دى نكته شنو قول واحدة غيرها قال ليهم فى نملة طلعت رأس الجبل ووقعت قالوا ليه هسه ما قلتها لينا قال ليهم دى نملة غيرها ، يا النكتة بتاعتك زيها يا أنت ما داير تقول لينا نكته ، يامدثر تكفى الأغنية بتاعت الموسيقار محمد الأمين ( ابويه ود مدنى ) وبعدين أنت من زمن ود العمدة ( من الأمس ) .

[أبوريلان]

الأخ مدثر حسب الرسول لك الأشواق النكتة بتاعتك دى زى القالوا ليه قول نكته وهو ما داير يقول نكته قام قال ليهم فى نملة طلعت رأس الجبل وقامت وقعت قالوا ليه دى نكته شنو قول واحدة غيرها قال ليهم فى نملة طلعت رأس الجبل ووقعت قالوا ليه هسه ما قلتها لينا قال ليهم دى نملة غيرها ، يا النكتة بتاعتك زيها يا أنت ما داير تقول لينا نكته ، يا مدثر تكفى أغنية الموسيقار محمد الأمين ( أبويه ود مدنى ) وبعدين أنت من زمن ود العمدة ( من الأمس ) .

[ابراهيم]

عشان مدني جنتنا وحديقتنا الفيها بنرتاح
عشان ترعرعنا فيها وعرفنا حنية ناس مدني
عشان مدني فيها الماء والخضرة والوجه الحسن
عشان مدني أمنا وابونا وبتنا واختنا واخونا
عشان حاجات كتيرة وجميلة لا تحصي ولا تعد
عشان القلتو والما قلتو يا عركية
ومدني طبعاً أغلى واحلى بكتييير من كل كلام
نحن بنحب مدني وناس مدني والمناطق المجاورة لي مدني
وانا شخصياً لو ما كنت من ناس مدني لوددت أن أكون من ناس مدني
والحمد لله فهذه نعمة من الكريم
واشكرك على هذا السؤال
وأشكر كل من كتب عن هذا الموضوع
وتقبلو عاطر تحياتي

[وليد مصطفى]

لماذا لانحب مدنى وهى أرض العطاء؟
السنى بمنارته الشامخة و(عامرة حلقات الذكر).
المساح والكاشف وأبو الأمين وأبوعركى وعبد العزيز المبارك وغيرهم ،أرقام ضخمة فى تأريخ الأغنية السودانية..
أضف .. ودمدنى تكاد تكون المدينة الوحيدة تقريبا الأهدأعلى الإطلا ق كهدوء نيلها حين ينحنى إجلالا لروعتها عند المغيب ، وعند أطراف حنتوب الجميلة.. ثم أن ودمدنى تعكس وجه الجزيرة ككل بكل تفاصيل قراها ومدنها ويكفى أنها عاصمة الولاية..

[mudatheir]

الأعزة " ودي موش على وزن الأهلة وهم الذين كانو يشجعون أهلى مدني " وعلى وجه الخصوص العزيز "ميريلان - يا ربي التهجئة بتاعتها بالعربي كده صاح؟؟" وعندي طلب منكم خاصة ناس تلفزيون الجزيرة الريفي سابقاًً ،، بس لو نلقى زول ينسخ لينا أروع خطاب قيل في حق ناس مدني خاصة وناس الجزيرة عامة وهو الخطاب الارتجالي تقريباً وعلى ما أظن في إفتتاح تلفزيون الجزيرة الريفي والذي صاغه الراحل المقيم عمر الحاج موسى ،، ميريلان فاكر الخطاب ده ؟؟ يخيل لي الوكت داك انت كنت في مدرسة النيل مووووووووووووش كده بالله ؟؟ وشكراً لمداخلتك الرايعة واتمنى اشوفك هنا قريباً وممكن تاخد عنواني من الغالي اسامة مهدي بس ما تقول لي ما بتعرفه وأجمل ما قرأت مؤخراً من ذكريات حسين خوجلى عن ناس أمدرمان انو مجموعة سكارى اجتمعو على رفيقاً ليهم وكسروه كسر صاح ،، لما جاء واحد سألهم قال ليهم بتضربو في الزول ده ليه ؟؟ قالو ليه ده زول كافر ساي بسب في الدين ................. يلا فتناكم بعافية

[أبوريلان]

الأخ مدثر
لك كل التحايا والأشواق

والله نورت المنتدى ، بس وينك طولت الغيبة ، حاول أفتح الرسائل الخاصة بك ولك الشكر .