المغتربون هم السبب في عواسة الآبري من رجب!!
حوار: مبارك حتة
الحاجة زينب محمد محمود باعو من نسوان هذا البلد الطيب.. تسكن في حي القوز العريق.. التقيناها في شبابيك ورمضان على الأبواب لنتعرف على طقوس الآبري والحلو مر زمان.. من زمن الناس بتفزع تجيب الأخشاب والحطب للعواسة حتى دخول البوتجاز في شغلة صناعة الآبري.
* علاقتك برمضان بدت متين؟
- حكاية رمضان دي يا ولدي عجيبة معانا.. ونحن صغار.. كنا لمن يجي رمضان نعمل فيها صايمين.. وبيني وبينك هو صيام الضب البنلقاهو كلو «جب».
* يعني شنو ما فاهم؟
- يعني ونحن صغار لو سألونا عن الصيام نقول ليهم نحن صايمين صيام السحلية والبنلقاه نخليهو للعشية. ونحن فعلاً نعمل فيها صايمين لكن الصيام التاني.
* الجو في رمضان؟
- اخذت نفساً عميقاً ثم قالت لي الحاجة زينب محمد محمد شوف يا إبني بعد ما كبرنا وعرفنا حقيقة الصيام كنا بنصوم طوالي والجو كان حار جداً والواحدة تترشرش طوال اليوم.. وانتو في زمنكم ده المكيفات والثلاجات.
* طيب كنتو بتحفظوا الحاجات وين؟
- كنا نخت الحاجات في المشلعيب.. وكان في بطيخة بنختها تحت نقاط الزير عشان تبرد..
* طيب الحلو مر بتعملوه كيف؟
- من عيش الفتريتة ونغطيهو في شوال خيش لمدة اسبوع وتغيب يوم والثاني ترشو بالموية عشان ما ينشف.
* وبعد داك يا حاجة؟
- بعد داك قبل ظهور الطاحونة كنا بنطحنو بالمرحاكة حتى يصبح دقيقاً وناعماً.
* المرحاكا دي شنو؟
- هي عبارة عن صخرة كبيرة مجوفة في بطنها شوية وحجر تاني أصغر منها نخت عليهو العيش ونطحنو بالأيدي.
* الآبري الأبيض؟
- الآبري الأبيض ده كلامو براهو.. يعني ما عاوز ليهو تعب ذي الحلو مر.. وهو عبارة يا ولدي عبارة عن عيش مايو أو دبر أبيض.
* عاوزين نعرف بيتعمل كيف؟
- أخذت نفساً عميقاً ثم أردفت قائلة: نضيف الدواء وهو عبارة عن قرفة وحلبة وهبهان ونضيف ليهو دقيق «فينو» عشان يسهل لينا العواسة وبعد داك نتركو يوم واليوم البعديهو نعوسو..
* عاوزنك برضو تحدثينا عن الرقاق؟
- قالت الحاجة زينب: الرقاق بسيط وساهل.. نجيب دقيق الفينو ونضيف ليهو هبهان وقرقة ونلخبط معاهو السكر وشوية كاستر.. وبعد داك العواسة على طول.
* يا حاجة زينب شكل الصينية في الزمن داك كيف؟
- نحمد الله شهر رمضان شهر رحمة وخير وبركة.. وزمان ما كان في كبابي بس كورية للشراب والصينية فيها حاجات الأكل ذي العصيدة بملاح التقلية وهي عبارة عن لحمة شرموط وإضافة الويكة عليها من الملاحات والشراب فيهو ليمون أو عصير تاني.
* يعني في ر مضان ما في كسرة، عصيدة بس؟
- مش بالضبط كده.. لكن العصيدة سهلة الهضم على المعدة في رمضان.. وبعدين ما بتكلف المرأة.
* كيف يعني.. وضحي؟
- يعني العصيدة ممكن الواحدة تعملها قبل الإفطار بربع أو نصف ساعة من الآذان وتكون سخنة عند الأكل عكس الكسرة العاوزة مجهود وزمن.. وبعدين يا ولدي في ناس بتسوي القراصة..
* يا حاجة زينب في ناس بتسوي الآبري قبل شهر أو شهرين من رمضان الحاصل شنو؟
- ديل يا ولدي دائماً بكون عندهم أولاد مغتربين في بلاد برة برسلوا ليهم من بدري.. أو النسايب الجداد برضو يرسلوا حاجات وموية رمضان. وزي ما قالوا النسيب عين شمس..
* سمعنا بالرحمتات يعني شنو؟
- الرحمتات هي صدقة بقدموها الناس عادة في العشرة الاواخر من رمضان وعادة ما يقدمها ناس يكون عندهم زول متوفي ودائماً الناس في الرحمتات بقدموا التمر «بلح» والبليلة والأرز باللبن..
* عاوزين نختتم بالسحور؟
- في السحور دائماً الناس بتاكل الأرز والرقاق باللبن وما عاوزة أنسى النشاء المخلوطة بالقمردين.
* إشمعنا النشاء بالقمردين؟
- أول حاجة يا ابني ما بتعطّش الزول وبتخلي الواحد متيقن وصابر لفترة طويلة
رد مع اقتباس
المفضلات