هل انت ش ع ؟ كان الله في عونك...

[اللمسة الساحرة]

الولد في سنة تالتة وممتحن شهادة عربية ،الاب والام رافعين حالة الاستنفار في البيت للدرجة القصوى ...
دي مرحلة مصيرية في حياة ولدنا وفي حياتانا برضو اما نكون او لانكون...
عايزين ولدنا اخش الطب ويطلع دكتور زي عمو ...
الولد المسكين بقرا 16 ساعة في اليوم من اول السنة...
انتهت السنة وطلعت الشهادة الولد جاب 99.5 الف مبروك فرحو الاهل الب والم حيطيرو من الفرح ...
بدا التقديم الاب:انا شايف نكتب جامعة الجزيرة اولا...
الام:لا لا انا شايفة انو الخرطوم احسن....
الاب:قدمت للولد الحمدلله ستة رغبات لانو ولدي نسبتو عالية وكرموهو في السفارة وامانة مدينة الرياض وجمعية الصحفيين الرياضيين السودانيين...
طلعت نتايج القبول وخش الولد جامعة ماكانت على البال ...
الاب:ولدي جايب99.5 كيف ادوهو الرغبة السادسة والله حرام والله حرام
جار الاسرة (سوداني ايضا):احمد ربك يازول انا ولدي جايب 99.3 وماشالوهو في اي جامعة...
هذه قصة تدور في اي بيت في الغربة ،،،ولكن المعاناة لم تبدا بعد...
يذهب البن الى الجامعة _طبعا ماكانت رغبتو_ لكن الله غالب،، فيفاجاء بواقع السودان الذي كان قد رسم له صورة سيئة في مخيلته فيجد ان الصورة التي رسمها في مخيلته افضل بكثير من الواقع .
يذهب الابن الى الجامعة فيعامل في البداية وكائنه وافد او غير سوداني ،،
الابن: انا مقبول قبول عام ليه رسومي الدراسية بالدولار؟
مسؤول في الجامعة: لانك شهادة عربية.
الابن: طيب انا ماسوداني ليه رسومي اربعة اضعاف الطالب الممتحن من هنا؟
مسؤول الجامعة: لانو ابوك مغترب ،وماتكتر اسئلة احسن ليك.
يقبل الطالب بالوضع مستسلمم لقضاء الله وقدره، ولكن الامر يفوق قدرة التحمل لدى الابن فالمصيبة هذه المرة من الطلاب انفسهم فقد بدا الطلاب يضايقونه لاسباب لاداعي لذكرها، وصاحب الغرفة التي اجرها الطالب عايز يستغل الموقف ويستفيد من المسكين دة فقام زاد عليه الايجار،، وصاحب الدكان كل يوم غاشي بطلنا المسكين ,,,, احس الطالب بالغربة وهو في وطنه فشكى لوالده انه يحس انه وسط وحوش مفترسة فقال له والده اصبر ان الله معنا



مع تحياتي:
اللمســـــــــــــــــــــــــــــــــــــــــــــ ــــــــة الساحرة

[امل حياتى]

اولا حمدالله على السلامة ثانيا" رمضان كريم وثالثا" نشكرك جزيل الشكر على الموضوع الرائع والذى حاصل عندنا ونرجو من الجهات المسئولة مراعاة اولاد المغتربين ( لانهم ما بيلقوا القروش واقعة فى الشارع ولا بيلقوها هداية )

تحياتى واشواقى دائما" لقلمك الرائع

[محمد حسين (المميز)]

الأخت صاحبة اللمسه الساحره
انا ممكن اقول ليك الكلام الذكرتيهو ده
ممكن يعتبر حلقه واحده من ضمن مسلسل
طويـــــــــــــــــــــــــــــــــــــــــــــــ ـــــل
يعانيه كل مغترب ابن كان أو أب
وفعلا ده جزء من الواقع المرير اللي بنشوفه
على المغترب

ربنا يكون في العون ويستر علينا

مشكوووووووووره
يا
صاحبة اللمسه الساحره

**********

[zoolfrda]

لك الشكر اللمسة الساحرة

على هذا السرد الرائع

ولتجسيدك لواقع ملموس

يعيشه الكثير ويعانون منه

في صمت مخيف

دمت بخير

[راشد خضر]

أيتها اللّمسة ُ الساحِره . . لا نقول إلا (الظُلمُ مُرٌ ولكن ظُلم ذي القربى أمرُ )
الجديد بالمغترب أن يُقدَر فهو يمد يد العون لأفراد أسرتِهِ المقصرة الدولة في حقوقهم ، لا أن تضع عليه السلطات تلك القيود التي لطالما أبعدتنا عن العودة .
لفته بارعةٌ منك أن تتناولين مثل هذا الموضوع الحيوي الثر بالنقاش

[اللمسة الساحرة]

امل حياتي:
الله يسلمك ويديك الف عافية سعيدة بي شوفتك تسلم على المرور



المميز:
تسلم ياغالي على المرور وزي ماقلت دة شيء من لا شيء من مسلسل معاناة طالب الشهادة العربية اللي انا بالجد حاساه طبعا انا بدرس في جامعة الجزيرة والكلام دة عن تجربة .






زول فردة:
يعطيك الف عافية على مرورك وبي شوفتك وفعلا زي ماقلت صمت المغترب هو المشكلة فحكومتنا كما يبدو مابينفع معاها الا منطق القوة ورفع السلاح




الاخ الغالي راشد:
زي ماقلت ظلم ذوي القربى اشد مرارة , انا طبعا اتولدت في المملكة وقريت مراحلي التعلمية كلها في المملكة ولم ادفع ريال واحد والحمد لله الله وفقني ودخلت طب الجزيرة قبول عام فكانت الرسوم 700 دولار , فهل بعد هذا بلدي السودان ولا السعودية؟
لك التحية على المرور ويديك الف عافية

[معتز حمدتو]

لمسة ساحرة في معانه صامته لطالب قضي جل عمره خارج حدود الوطن وعند العوده يفاجا بالدراما الممله .
ادام الله لمساتك الساحره والفلته في نفس الوقت .
لكن السؤال المهم هل كل طلاب الشهادة العربية يلقون نفس المعامله في هذا الزمان ؟
وهل كل من ياتي من خارج السودان بالنسبة لابناء المغتربين يكون سطحيا في بلاده ؟
لماذا اسال ذلك .......
لقد كانا في بداية التسعينات في الجامعات السودانية لانحس بهذا الفرق بل انصهرنه مع بعضنا البعض حتي اصبحنا لا نعرف بان فلان او فلانه اهله يقيمون خارج السودان الا حين نعود من الاجازه ونفاجا ببعض الهدايا ونعرف ونتذكر بعد ذلك بانه قضي الاجازه مع اهله ، وكان المميز في ذلك الوقت عودة الطلاب السودانيين الدارسين بالخارج وكانوا يسمون الفريزين في ذلك الوقت لكن وقد اصبح الحال كما ذكرتي فنقول ( والله ايام يازمان ) .

[سواااح]

اللمسة الساحرة ..

هي معاناه لا ندري
متي تتوقف ..
متي تنتهي ..
وبعدين ش ع اضيف
ليها حرف ثالث
وبعدها ثلاثة ارقام
وتصبح لوحة مرور

دمـــــــــــــــت ،،

[فتاة مالي]

طب ما عندكم شهاة سودانيه في يلد الغربه ما تقدمها السفاره او تفتح مدارس خاصه بالسودانيين
نحن بلدنا عامله كذا وكثير من الدول بتعمل كذا
تسائل وكان الله في عونكم

[ruby]

والله فعلا دي مشكله كبيره
وانا خلاص سنه واواجهها بس انسي حتى ادخل قبول عام
النسب طالعه السما وهنا الواحد يفتش لاحسن المدارس عشان يجيب نسبه زي الناس
وروحه تطلع عشان يجيب نسبه بالنهايه ولا تسوى حاجه في السودان
بس الله يكون في العون

[التيمان]

اللمسة الساحرة ..

هي معاناه لا ندري
متي تتوقف ..
متي تنتهي ..
وبعدين ش ع اضيف
ليها حرف ثالث
وبعدها ثلاثة ارقام
وتصبح لوحة مرور

دمـــــــــــــــت ،،

[مزوني]

اللمسه الساحره حبابك ورمضان كريييييييييييييم والحمدلله على السلامه والبركه الشوفناك طيبه

والله موضوعك ماشاءالله 100 % والحمدلله انو احنا بقينا تبع ( قريب غتا ش ع )

لحد تانيه عالي وفكونا في السودان للشهاده السودانيه والحمدلله الأمور عدت على خيييييييييييير

( أول سنه تعبت حبببببببببه بي حكم اني كنت ما بفهم كلامنا خير شر )

تسلمي على كلامك السمح وربنا يديك الصحه والعافيه

[اللمسة الساحرة]

الغالي معتز حمدتو:
ما ان ينجو الطالب من الطلاب وينصهر في وسطهم الا وتعترض طريقه الادارة بتلك الرسوم الباهظة ,,, يعني المشكلة قائمة قائمة...
يديك الف عافية على المرور...
الاخوة سوااح التيمااااان:
يديكم الف عافية على المرور ياغالين وكل سنة وانتو طيبين
اختي بنت مالي:
احنا حكومتنا جات عشان تعذب الشعب مش عشان تريحو يعني موضوع جامعات للمغتربين انسي الفكرة...
ويديك العافية على مرورك
حبيبتي روبي:
كان الله في عونك يابت وربنا يوفقك وتجيبي نسبة كويسة...
لك التحية...
عزيزي مزوني:
كيفك والله مشتاقييييييين وكل عام وانت بخير ,,,, انشالله تكون تمام مع الصيام ومافي جرس, انا عارفاك مابتقدر على الصيام قالو رمضان الفات صمت خمسة ايام بس
(:



مع تحياتي:
اللمســـــــــــــــــــــــــــــــــــــــــــــ ــــــــــة الساحرة

[medo_dh]

اختي الساحرة بلمساتك والله العظيم انا مندهش جدا لقدرتك على صياغة الواقع المرير الذي يمر به ابناء الشاهدة العربية في كل شيء ابتداء بالقبول ونهاية بالمأساة الكبرى (المجتمع ونظراته) وبصراحه انا برضو مستغرب ليه ده كلو يعني الواحد منهم ما كفاية عليه انا كان مغترب عن وطنو واهلو ولما يجي الواحد هنا يصدم بهذا الواقع
والله كلامك كلو صح وحقيقة وما حأقول اتمنى انو الواقع الحالي ده يتغير لكن حا قول لااااااااااااااااااااازم يتغير لازم يتغير

[نور العيون]

و الله يا اللمسه الساحره تسلمي على الموضوع الجميل و الذي دخل العضم زي ما بقولوا و تسلمي يا غاليه و الله يديكي العافيه ..

[اللمسة الساحرة]

ميدو:
تسلم عزيزي على مرورك وبالجد لازم اتغير وماحيتغير الا بيدين المناضلين من اهل هذا الوطن


حبيبتي نور العيون:


يديك الف عافية حبيبتي على طلتك علينا ويديك الف عافية

[اللمسة الساحرة]

ميدو:

تسلم عزيزي على مرورك وبالجد لازم اتغير وماحيتغير الا بيدين المناضلين من اهل هذا الوطن


حبيبتي نور العيون:


يديك الف عافية حبيبتي على طلتك علينا ويديك الف عافية

[خالد أحمد الصول]

..... نواصل .......
فطالبنا ما عايز يقعد مع ناس عمو لانو الجو هناك غريب وبعدين ماما زاتها ما قاعدة تريد أهل بابا ... و عندما يدخل حوش الجامعة يعاين لمان يلقي ليهو ش ع زيهو يقول ليهو ياي الكفتريا دي زي البطحاء أفتكر أحسن نمشي كافتريا الرعاية هي أصلها جميلة و بعدين هنا البرقر ما فيهو مايونيز ... الحر دة شنو كمان قال عملوا مكيفات في القاعات بالله المكيف ده ما زي الجدعناهو في الزباله عشان ماما قالت بتتشائم منو من يوم ما جاء عمو عشان يشتغل قعد 6 شهور عاطل و مشغل المكيف ده ... و الله يا ماما الجو هنا وحش و عايز ترسلوا لي تلاجة تصوري أولاد الجامعة هنا بيشربوا من حاجة إسمها الزير ..... جدول المحاضرات قال الليلية في محاضرة وظائف أعضاء الساعة 7 صباحا تفتكر يا حمادة الدكتور ده جادي و شنو يعني لو عملها الساعة 9 و ماما دقت لي الليلية و من الوقت داك أنا قاعد أبكي ... أصلوا قالت بابا زعلان لاني كملت المليون في شهر أصلوا أنا أعمل شنو بتاع الاتوز القاعد يوصلني من البيت براهو عاوز 200 الف و بابا ده عاوزني أمشي لي نصف كيلوا بي رجلي .... ياخي أنا مامكن أقيف في الصف دة عشان مرجع هم ناس الجامعة ديل مش مفروض يجيبو لينا الكتب دي كتيرة نحنا في السعودية بنجدعهم في الزباله .. ياخي أحسن جاجة أدق لي ماما تكلم بابا يرسل لي كل المراجع دي بالدي إتش إل و ماما قالت لي بس اطلع زي هشام و أي حاجة عاوزها أنا بشيل من بابا و أجيبها ليك ... و بعدين أوعاك تجي بالسودانية في الاجازة لانها قبيحة و بعدين هادية جارتنا دي تقول علينا شنو ... الولد بقرا طب يجيبوهو بالسودانية ... البطانية و الاندومي و الشبس و اللبن و التانك و الهدوم و المخدة و اللاب توب و الهيدفون و المصاريف وصلتك مع الزول بتاع أمدرمان
............ نواصل ................

[جنفر]

فعلا دي مشكله ومشكله كبيره
ونتمنى انو يلقوليها حل
لانو ده قمه الظلم لطلاب الشهادات العربيه
تسلمي يااللمسه الساحره على الموضوع الفعلا مصيبه
وربنا يكون في العون

[اللمسة الساحرة]

صول السودان:
تسلم ياغالي على المداخلة ، لكن مش زي الاتحاملت على الطالب شوية معقولة نصف كيلو بي تكسي انا مابنكر انو في طلاب كدة بس برضو انا بتكلم عن ظلم ناس السودان واستغفالهم لطالب الشهادة العربية....


جنفر:
يديكي الف عافية حبيبتي على المرور

[ابراهيم]

تحياتي الاخت اللمسة الساحرة

في الاول اختلط علي فهم الاختصار ش.ع لما قريت العنوان افتكرتها شرطة عسكرية
اتارى هي شهادة عربية ..!!
لكن لو وقفنا بحيادية بنقدر نقدر منو الظالم ومنو المظلوم ..
لا شك انو الحكومة محاصرة الطلاب المغتربين وحاملي الشهادات العربية .. وكذلك المقيمين واصحاب الشهادات السودانية فكلو عند العرب صابون ....
إلا انو لاسباب اجتماعية حصل إنو البيئة او الكينونة المجتمعية العاشو فيها بطلبة الشهادات العربية كما سموهم بتختلف من البيئة السودانية بما في ذلك من ممارسات ونشاطات واهتمامات ثقافية واجتماعية و......الخ ..
الحتة دي خلعت فجوة في التعامل ما بين الفئتين في حين انهم كلهم سودانيين ودة ناتج كما اشار اخونا صول السودان في مداخلته انو في ناس مصعبنها حبتين ودي الأغلبية حسب معايشتي للمجتمع الجامعي وبما انو دي الاغلبية فالطبيعي انو يحصل احساس بالغربة في نفس الطالب المغترب ... المفروض الاسرة هنا تلعب دور بمعني انو يزرعوا في الابناء الحاجات السودانية ويعلموهم كيفية التعامل وكيفية الانصهار مع اخوانهم في السودان ودة يتخيل لي ما صعب ...
دي وجهة نظري في الموضوع احتمال صح واحتمال غلط

[اللمسة الساحرة]

الغالي ابراهيم التحية لك اخي :
وبشكرك على المداخلة الجميلة ....
حلك اخي نظري للغاية ومامنطقي ,,,
حتى الاب والام البعيدييين عن البلد سنين في زمنهم البيحكو لينا عنو ماكان المجتمع السوداني بهذه الوحشية وهذه القسوة.... في هذا الزمان الضعيف يهضم اي ان الماشي في السودان هو قانون الغاب القوي ياكل الضعيف والمسكين يداس تحت ارجل الكبار والمغفل بيلقى ليهو ستييين مفتح استنكحو وياخد حقو ،،،، كيف يا ابراهيم حيعود الاب والام ولدهم على ان ينصهرو في مجتمع كهذا هم انفسهم_اعني اسرة الطالب_ يعانون الامرين في فترة الاجازة ويشكو من صعوبة المعيشة في السودان وسط هذه الذئاب المفترسة ،،،، اضف الى ذلك معاناة الطالب من القوانييين المجحفة التي وضعتها وزارة التعليم العالي من رسوم باهضة تثقل كاهل رب المنزل الذي يعلم ابنه بحاله فكيف يتوفر جو اكاديمي صالح لهذا الطالب وسط كل هذه العراقيل ووسط هذا المجتمع الوحشي ووسط تفكيره بانه قد قص ظهر ابيه بهذه المصاريف ؟؟؟؟؟






مع تحياتي:
اللمســـــــــــــــــــــــــــــــــــــــــــــ ـــــــــــــــة الساحرة

[خالد أحمد الصول]

............................ نواصل .......................

معلوما للقاصي و الداني أن الشهادة العربية بكل طيوفها تختلف عن الشهادة السودانية ... أولا من حيث مناخ الدراسة و المواد الدراسية و الدرجات الكبيرة التي يقيم بها الدارس و المواد المتداخلة مثل (الفقة ، القرآن ...) و تلك المواد التي تدخل في المجموع الكلي و ليس لها نظير في الوطن الام كالمواظبة و الرياضة و ..... كما و أن الكل يعلم الدرجات الكبيرة التي يحملها طالب المهجر فمثلا تجده يحمل 96% في اللغة الانجليزية و تجده يجهل نطق كلمات إنجليزية بديهية و خلافة . فكان من مكتب القبول أن يقوم بمعادلة الشهادة العربية فكانت في ذلك الوقت تخصم منها نسبة معلومة ثم تدخل المنافسة مع الشهادة السودانية . إلا أن إدارة القبول إجتهدت كثيرا في حل يمكن أبناء المغتربين من الدخول للجامعات السودانية بأبسط الطرق و هي ((تخصيص عدد من المقاعد في كل الكليات يتنافس عليها حملة الشهادة العربية)) و بذا تكون إدارة القبول قد أتاحت لهم فرصة كبيرة لمنافسة أقرانهم من نفس الشهادة و ليست منافسة كل طلاب القبول العام ... فمثلا العام الفائت إستفاد من هذه الطريقة طالب من ليبيا فدخل هندسة بترول بأقل من نسبة الشهادة السودانية بأكثر من 25% وذلك لانه محظوظ قدم معه طلاب بعدد المقاعد المخصصة للشهادة العربية و لو كان هذا الطالب يحمل فقط درجة النجاح لكان دخل تلك الكلية.
وسياسة هذه المقاعد المحددة معمول بها حتي في الشهادة السودانية حيث يكون القبول وفق الاتي:
القبول العام = و يتنافس عليه جميع طلاب السودان
القبول الولائي = و يتنافس عليه طلاب الولاية المعنية بعد الاثبات و التوقيع علي العمل داخل الولاية لمدة محددة من السنوات
الاقل نموا = وهي المناطق الاقل نموا يتم تشجيع إبنائها للانخراط في العملية التعليمية لترقية اقاليمهم و أيضا لا بد أن يعمل داخل ولايتة فترة محددة
القبول الخاص = وفيه تضاف درجات محددة لدرجات الطالب نظير دفع الرسوم الدراسية بالدولار وذلك لإيجاد موارد ذاتية للكية المعنية
......................نواصل ..............................