زمان لمن كنا صغار كانت الهتافات على فم الأم:
النوم تعال ... النوم تعال
تاتى تاتى (للمشي)
***
ولمن دخلونا المدرسة كنا بنقرا نشيد العلم ،وأنا الصبي الصغير انا فتى المستقبل، ومشت الشغلانة لحدي ما جينا معسكر الخدمة الوطنية، وهناك اتعلمنا الشعارات والهتافات الصاح:
أول حاجة كويسين :
شعارنا جهاد، نصر ، شهادة
***
تاني قلبت شوية :
ولدي سغيَّر لازم أعلمو
يبقى لي ملازم لازم أعلمو
أدخلو الكلية لا زم أعلمو
***
شوية شوية الحكاية جابت جكس وكده:
ليلى بت الصول الناس تقول لي لا
يا خي ما معقول الناس تقول لي لا
سمحه حلوة يا زول الناس تقول لي لا
***
طلعنا من المعسكر بي سمح بي شين جينا الجامعة:
أيها الطلاب الشرفاء والشرفاء فقط ، (حزب الحمت رمت ) يدعوكم الى ركن نقاش هام الآن تحت ضل الموليته، عفواً في ساحة النشاط الطلابي..
ويا الخرطوم جوطي جوطي ..
***
وشوية شوية :
مقتل طالب مقتل أمه (وعلى قولة أدروب: تكتل طالب نكتل أمك)...
وكنا بنهتف لي ناس الجامعة الإسلامية في مباريات دوري الجامعات:
لا جكس لاكورة يا اخوانا مامعقولة
ومشت الشغلانة لحدي ما اتخرجنا، وبعد التخرج:لا شغل لا مشغلة ... دايرين حل المسألة (المسعلة)!!
***
ومازالت الشعارات والهتافات تتوالى ونحن في بلاد المهجر:
الغريب عن بلدو مهما طال غيابو ..
**
وبالله يا طير قبل ما تشرب تمر على بيت صغير..
والقدم كان ليهو رافع .. ليك لا بد تاني راجع ..
وستظل الشعارات تتوالى من المهد الى اللحد ..
***
أوعى تصدقو ، أو تتكلمو في السياسة، دي خطرفات بس ..
***
لكم خالص ودي
رد مع اقتباس
المشاركة الأصلية كتبت بواسطة magdi
المفضلات