موضوع هام جدا(لا للمغازلجية بعد اليوم)>>إضغط هنا<<

[schizo]

السلام عليكم ...

طبعا انا جديدة لنج عندكم هنا
وبما اني ((جديدة))
حا ابدا اول موضوع لي بطريقة هادفة((طبعا ما هادفة لأي زول))

هادفة لبنات جنسي((ولمن قلت بنات جنسي كان قصدي البنات فقط ))


وبعد كده نبدا موضوعي الهام



سيدتي الجميلة ( الجميلة البشاغلوها بس)

إليك بعض النصائح لتتجنبي ثقالة دم ((المغازلجيه)) والتي دائما ما تجدينهم في الأسواق والطرقات العامة والحدائق
فمثلا إذا صادفت أحد من ((المغازلجيه)) وخاصة من المراهقين والذي لا يتجاوز وزنة 40 كيلو وحاول ان يعطيك رقمه في احدى الطرقات الفرعية ماذا تفعلين

أولا
رقديه أرضا بضربة كوعيه أو مخلبية ثم ضعي رجلك اليمنى فوق بطنه ورجلك اليسرى استخدميها سيدتي لتثبيت يديه وقومي بفتح شنطتك اليدوية وإخراج سفنجة فردة شمال وحاولي ان تكون تحمل لون فاتحاً ( ازرق سماوي – وردي موف – اخضر فستقي ) لكي لا يصاب الضحية بفاجعة ثم قومي بأعطائه كفوفاً خفيفة حتى تحمر شفتيه ( ما تتقلي عليه )

ولكن ماذا لو قابلتي مثل هذه النوعية في الحديقة العامة
أولا اذهبي بأتجاه سيارته الفاخرة والتي مُشتراة بالتقسيط كالعادة
ثم خذي معك مسمار من المقاس الكبير
ثم اشخطي الكبوت الأمامي مرورا بالباب الجانبي وانتهاء بمؤخرة السيارة ولا مانع ان تضعي علامة ( X ) كبيرة لتبقى ذكرى مردودها يدوي في عربية صاحبنا

ولكن ماذا إذا قابلتية في السوق المركزي
لا باس تصطنعي الغنج والدلع ودعيه يمشي خلفك لعدة ساعات حتى تشاهدين لسانة وقد خرج 30 بوصة امامة واحمرت وجنتية من التعب ثم خذي رقم هاتفة واذهبي فورا أنت والسائق الخاص بك إلى السااحه الترابيه غرب منطقة وجود سفارة الولايات المتحدة الأمريكية وقومي بكتابة رسالة تهديد بوجود قنبلة في السفارة وضعي اسم ورقم هاتف صاحبنا
واترك الباقي لرجال الضفادع البشرية وحرس الحدود ورجال الأمن وكل من له صلة سوف يقومون بتغيير معالم وجهه ( حين يثبت انه ما ليه اي دخل بالتهديد ) حينها أنا واثقة انك ستجدينه بعد ( 7 ) أشهر يبيع عدة مطابخ أمام باب السوق

أو اذهبي إلى اقرب إدارة مكافحة المخدرات واكتبي العبارة التالية
((كمية حشيش للبيع بسعر مغرى لعدم التفرغ ))
للحجز أو الاستفسار أرجو الاتصال على ( ضعي رقم واسم صاحبنا )
والله يخلف على اهله .




انشاء الله يكون استفدتو كويس

ملاحظة للguys :
ما تاخدو في خاطركم......انتو عارفين اننا لازم نتخذ الاحتياطات الواجبة لينا
so....اخدو الموضوع بروح رياضية


سلاااااام

[امير عبدالباقي]

الاخ schizo
مرحب بيك في المنتدي
بس كلامك فيه شويه مبالقه النصائح دي للبنات ولا الي عصابات
صدقني بنات السودان مهزبات جدا ولا يمكن يعملو كده ؛ واذا في واحد عاكسهم اعتقد عندهم مثل ماشين عليه( الكلاب تنبح والجمال تمشي)
لك تحياتي

[admin]

اهلا ومرحب بيك
دخول رائع للمنتديات .. احييك على خفة ظلك

[schizo]

في البداية عايزة اوضح نقطة هامة جدا وهي انو انا((Girl))......شفت كيف يا امير؟؟!!!

تانيا:والله نورتو الموضوع بمروركم وشكرا على الردود

تالت شي: كلامك صاح يا امير والله====>لكن برضو الاحتياط واجب
ونورت الموضوع

واخيرا وليس اخرا شكرا ليك يا admin ودا من زوقك العالي والله

[ruby]

امكن اكتر زول ممكن افهمك انا وافكار نيره وجميله شكرا على النصائح المفيده لكن فكرك الزول ده بقيف لي لكن حقت الامركان والمخدرات شئ جميل وشكلي كده حااتوب الناس ني وبالذات اولاد المنتزه الكنت بمي ليهو لمن كنت في السودان

[schizo]

بشجعك يا روبي على العمل بالنصائح دي
واسألي مجربة
ويا ريت الشباب ما يحقدو

[المحتار]

الاخت شيزو ..............
صراحة الموضوع جميل وفكرته رائعة .... بس اكيد الكلام ده حاليا في السودان بقى غير موجود .... او انه التفكير بقى اكبر من انه اغازل واعاكس في السودان ولكم اعتزاراتي عن كل بني جنسي (الذكور) لو حصل منهم شيء ذي ده ....

[مازن الجمّال]

طيب واذا كنت ماشي كداري ومولع لي سجارة قصبة .. وبي يدي التانية شايل دكشنري كمنجة بقرا فيه لاني نازل امتحانات في محطة الشجرة مايو 40 ولاقاني عمر صاحبي ورفعت ليه يدي اندايو .. لكن هو طلع ثغيل وما اتلفت .. وفي نفس الوكت كان بنادي فيني على بتاع الدكان عشان هو عاوز مني حق سجارتين برنجي هو بقول انه عاوزم مني من رمضان الفات لكن هو نمن يقول كدا ما شرط انه يكون صادق .. وجات جمبي غنماية كوركت لي في اضاني ( مييييييع ) وكانت من غنم بلالة وبلالة دي عندها غنم ثغيلات خلاس وكانت هي بتلبسم بامبرص قالت عشان السخلان ما يرضعو منهم ويكملو اللبن لانها هي انتي قايلة شنو .. ما كانت بتبيع اللبن بتسترزق بيه .. وجا ماري جمبي القشاش العربجي بي الكارو وقال لي ماشي السوق ؟؟ قلت ليو لا لأ ..!!

اها انتى في الحالة دي حا تعملي شن!!؟؟

[waheeb]

اولا أود ان ارحب بالجميع
ثانيا الموضوع موضوع جدير بالمناقشه ولا بد من ان نجد له حلولا منطقيه,ونحن هنا في السودان ما أظن في واحده بتقدر تعمل الكلام ده, لكن اذا لم تعيري الذي يعاكسك اي نظره أكيد ما حيواصل لكن اذا اصر وكننت علي هذا القدر من الشجاعه او بصوره اخري من الجراءه يمكن تطبق كلامك.اما الاخت روبي نقول ليها نحن أخوان بنات ما بنشاغل والبشاغل دا لازمو كتير................

[schizo]

اشكرك جدا يالمحتار على مرورك ومشاركتك
وغلطان لمن قلت لي الكلام دا بقى مافي بالسودان
بالعكس زاد زيادة يمكن
واعتذارك مقبول وشكرا ليك تاني



هههههههههههههههههههههههه
عجيب والله يا Rasta man
غلبني الرد
نورتنا



سلام يا وهيب
شرفت الموضوع بزيارتك
انا في رايي ومن تجاربي الخاصة يعني انو لو طنشت البغازل ده بيزيد زيادة
لكن لو وقفتو عند حدو في نفس اللحظة ما اظن بيحاول تاني
عالعموم
واصل طلتك علينا

[الزين]

سلام

الموضوع خفيف الظل اقول (المعاكسه ) المغازله او عندنا ( المشاغله) نوع من الخروج من قيم المجتمع نحو احترام (المراه ) الذى يعتبر بالنسبه للجميع (ام) او (اخت) او (قريبه) ... وطبعا لايتقيد الجميع بهذه القيم خاصه الشباب ..وبالمناسبه هنالك بعض اللوم على (الشابات ) ايضا فالواحده كان ما (شاغلوها) بتشك فى نفسها تقول (ياربى مالى ..شينه) وتبدا فى فى (ارباك ) قطاعات واسعه من (الجمهور) وتنشف ريق المساكين وتسوى ليهم سوات البرتقاله فى (زولك داك) وخاصه فى ناس قلوبهم رهيفه وما بقدرو على الهبابى فى عز الصيف زى ما بقول الفنان ......على كل حال (الكبكبه) دى لازم تحصل (للراجل الشرقى) و(حواء) نجيضه وتعرف تجهجهو .........عموما الموضوع شيق وفيهو طرائف وعبر وجدير بالمناقشه والفكر ..........شكرا تانى

[aborawan]

بمناسبة السفنجات الجوه الشنط دي بقترح على كل اخواتي من باب الحيطة والحذر ان تراعي المقاسات بالنسبة للشنطة اقصد ان تشتري الشنطة بمقاس كبيرة عشان يكون قدر مقاس السفنجة :d

مشاركة حلوة لك التحايا

[masa]

بما أن الأخت شيزو ... قد قامت بنشر خطتها الوقائية ..... لبنات جنسها ..!!!
وجب علينا نحن أيضاً أن نتخذ الإحتياطات اللازمة ....مادام كشفنا الخطة .. والإحتياطات تنقسم إلى قسمين هما :
القسم الأول : أي واحد يحترم نفسو ويمشي في الشارع بأدب وعينو في الواطا.
وإذا شاف اي حاجة ليها علاقة بالجنس اللطيف .. حتى لو طرحة ساي ... يغير الشارع الماشي بيو .....

القسم الثاني : وهو في حالة أنو الواحد حاول يطبق القسم الأول لكن الحاجة كانت شديدة وما قدر يمشي يخليها .... فعليه أن يلتزم بالآتي:
1- ان تكون المسافة بينه وبينها لا تقل عن خمسة أمتار (احتياطاً لحالات الطوارئ)
2- لبس ملابس ثقيلة تخفف عليه شدة اللكمات . لو مسكته ( لا قدر الله )
3- يمسك الشنطة أول حاجة عشان ما تطلع منها السفنجة .. والباقي هين .
4- لو دا كلو ما حصل وكان ظرف المكان (السوق المركزي) اوعك تديها رقم تلفون ثابت ... اديها رقم موبايل وأحرص على أن يكون الرقم لشريحة مسروقة وطالعة باسم واحد تاني .... عشان ما تورطك....
5- لو شالت الرقم وما حاولت تورطك مع السفارة الأمريكة أو مكافحة المخدرات ... واتصلت بيك .. اوع تقول الصنارة شبكت ... وتمشي زي المغفل ... لازم تعمل احتياطات ... وترسل جماعة يمشو قبلك للمكان المحدد ..... عشان يشوفوا إذا كان هناك اي تحركات غير عادية ......

وبعد دا كلو ..... كان مشيت وقابلتها ...... داير تعمل شنو ؟؟؟؟؟

الأدب حلو يا أولاد .......

[waheeb]

الأخت شيزو
السلام عليكم.
شكرك لك أنت لطرحك هذا الموضوع الذي يجب ان يناقش بصوره جاده أكثر من كده. لكن اذا تصورنا كل الناس بيطبقوا نظريتك دي كان المشاكل تكون قي اي حته مدوره. لكن الحياء بيغلب أحيانا علي الرد فما بالك بالضرب بالسفنجات, ولكن انا معاك اذا كان الولد قليل ادب ويتمادي وكانت البت شجاعه لا بأس ان تأدبو مع اني أشك في ذلك.....
لك ودي مره أخري ......................






اذا لم تستحي فاصنع ما تشاء....................

[أبوريلان]

شيزو رأيك شنو؟؟؟؟؟؟؟؟؟؟ طبعا حبيت أداخلك فى موضوعك .


نسمع ونقرأ كثيراً من القصص المؤلمة والمؤسفة التي يقع ضحيتها العديد من الفتيات فكيف استطاع هذا الشاب أن يوقع تلك الفتاة؟ وكيف سلمت هذه الآخرى نفسها وهتكت سترها راضية طائعة؟ فهل كانت في تلك الساعة فاقدة لعقلها منسلخة من قيمها ومبادئها أم ماذا؟؟


الشاب والفتاة


عندما يفكر أحد الشباب في اصطياد فريسته فإنه يرى أنها أداة لإفراغ شهوته، أي أنه يفكر بها من ناحية جنسية، أما الفتاة فهي تنظر إلى الرجل على أنه مصدر للعاطفة والحنان والحب والقوة، إذاً هي تبحث عن الحب وهو يبحث عن الجنس، وعموماً قد يريد الرجل شيئاً من العاطفة وقد تريد الفتاة شيئاً من الجنس إلا أن القاعدة وما يتناقله الناس من قصص أكبر دليل على الاختلاف الواضح في الهدفين والرغبتين بين الشاب والفتاة، وتكون الأخيرة هي الخاسر الأكبر من تلك العلاقة. أما ما تجهله الفتاة في نظرة الرجل إلى الحب فهو أن تكوينه يختلف من حيث النظرة إلى المرأة التي يرغب في الاقتران بها، فالرجل لا يمكن أن يقترن بفتاة مستعملة، إذا صح التعبير، وإن كان هو نفسه من استعملها.


أساليب شيطانية


هناك العديد من الطرق والأساليب التي يستخدمها الشباب للإيقاع بالفتيات، ويستطيع عدد كبير من الشباب الإيقاع بعدد من الفتيات، وهذا كما يقول العارفون لا لأن الفتاة لا تفهم أو لا تعرف أو لا تدري بل هي تعرف وتدري وتفهم بأن المعاكس يريد الإيقاع والاستمتاع بها ويرغب في أن يقضي معها بعض الوقت ليذهب إلى أخرى لا ليتزوجها، لكن قاصمة الظهر هي إقصاء العقل لدى الفتاة وتحكيم العاطفة، وهنا مربط الفرس فغالبية أساليب الإيقاع تنطلق من منطلقات عاطفية كأن يقول الشاب أنا لا أستطيع العيش بدونك أو أنا حزين جداً لأنك لا تردين علي إن حبك يعذبني.. وغيرها من العبارات التي تحرك الجانب العاطفي لدى الفتاة من وعود وأكاذيب حتى تثق به وتفتح له الباب تلو الباب حتى يصل إلى ما يريده، فكثرة اللقاءات والاختلاط والخلوة بين الشاب والفتاة يهيج العواطف ويحركها للفاحشة. وفي دراسة أمريكية تبين أن حوالي 47% من ضحايا الاغتصاب في أمريكا كن ضحايا لاغتصاب أصدقائهن ونحو عشرين بالمئة كن ضحايا لاغتصاب أقارب وأصدقاء العائلة، وهذا يعني أن 70% من الفتيات كن ضحايا للعلاقة البريئة، فالعلاقة البريئة تجر الفتاة والشاب إلى أن يرى أحدهما من الآخر ما لا يقدر الصبر على مثله.


طوق النجاة


ما سبق من أساليب لا ينطبق بالضرورة على كل فتاة، فهناك من الفتيات من يرجح عقلها على كثير من أولئك الذئاب، فلا تسمح لأحد أن يمسها بعبارة أو كلمة ، أكيد دا الشىء القاصداه شيزو وزميلاتها اللائى حزرتهن وأعلمتهن كيفية أخذ الحيطة والحزر وحفظ مقاسات السفنجات مقاس 44 و 45 والشبشب القطع داخل شنط اليد ولا كيف يا شيزو ، أما أولئك الضعيفات فعليهن أن يتذكرن قول الرسول صلى الله عليه وسلم: «إن الحلال بين والحرام بيّن وبينهما أمور مشتبهات لا يعلمهن كثير من الناس، فمن اتقى الشبهات فقد استبرأ لدينه وعرضه». فعلى الفتاة أن تبتعد عن مواطن الريبة وشبهات الأقوال والأفعال في لبسها ومشيها وحديثها مع الباعة وغيرهم ممن يرتادون الأسواق والأماكن العامة، ولتعلم أن من يريد الاقتران بها لن يأتيها عن طريق محادثة هاتفية أو نظرة وقحة.
ودمتى شيزو ونسمع منك إنشاء الله .

[امير عبدالباقي]

ابوريلان بارك الله فيك ده مربط الفرس
تحياتي

[114]

ولو شاغلتني هي؟
ليه يا أولاد ما طرحتو الاحتمال ده؟
بنات الزمن ده- والزمن بتاعنا برضو- بقن هن البيشاغلن (راجعوا مداخلتي في "لعبة شمس وقمر مين يكسب")
يللا يا أولاد ضعوا لينا خطة بعنوان ( لا للمغازلاتيات بعد اليوم)، وما فيش حد أحسن من حد

[ruby]

اشكرك ياابو ريلان على الكلام الكتبتو لان انا شخصيا استفدت منو لكن ماظن انو شيزو كانت عايزه توصلو للدرجه دي انو يتناقش انا اول ما قريته اخدته على شكل حذار او موضوع فكاهي ويا 114 مافي بنت بتغازل ولد مااقوليك مافي نهائي لكن البت حتى لوعايزه الولد ما بتغازلو لو عايز تعرف بتسوي شنو اقرا تاني الكتبو ابو ريلان

[schizo]

منورين والله كلكم وبسطتوني شديد
لانو انا لمن طرحت الموضوع ...كنت ماخداهو على انو هزلي
لكن نقاشاتكم ونصايحكم جددتو وادتو شكل تاني بطريقة رائعة
الشكر كل الشكر لكل من ساهم في تطويرو
ابوروان
الزين
ابو ريلان
masa
waheeb
114
امير عبدالباقي
والامورة ruby

اجمل تحية مني ليكم

[aborawan]

التحية ليكم لكم حبايب قلبي
عايز اقول حاجة لروبي وهي انو 114 كان معاه حق لما قال انو البنات بقوا مغازلجية وللاسف الشديد طبعا يعني في حاجات كده بتحصل بهتز لها الابدان وتقشعر والله ( طبعا مع احترامي لكل اخواتي ) بس للاسف في فئة كده بقت اعوذ بالله يعني الواحدة قوة عين خلوها على الله بس

[أبوريلان]

الأخت شيزو
تحياتى
تباعا لموضوعك أرجو الإطلاع على هذه الفلاشيات ولكى شكرى وتقديرى .

http://www.islamweb.net/flash/r1.swf

[waheeb]

الاخت شيزو
لك التحيه
المشكله اصبحت من الجانبين فالبنات أحيانا يقمن بمعاكسات لم يسبقهن عليها الاولاد,فعلينا ان نتحلي جميعا بالخلق الجميل . ولو علمنا معني كما تدين تدان لما رفع شخص عينه متعديا.
ولك الشكر اخي ابو ريلان علي الفلاش القيم ونرجو ان يستفيد منه الجميع.

[schizo]

تسلم ايدك يا ابو ريلان على الفلاش الجميل ده
تحياتي

الاخ ....وهيب...ابو روان
كلامكم صاح مليون في المية وانا ما حا أنحاز ابدا في المسألة دي لأنو انا شفت الحاجات البتقولو عنها دي بعيني

دمتو بخير

[أبوريلان]

الأخ وهيب والأخت شيزو مشكورين على التعقيب وفى النهاية بقول يديك العافية يا شيزو على طرقك لهذه المشكلة والتى كما قالت روبى يديها العافية أنها كانت عبارة عن كلام هظار أو كلام غير جاد أو ما تحب أن توصله كلام حلمنتيش وكذلك صاحبت البوست شيزو بأن الموضوع كان هزلى ولكن هذا موضوع كبير ومهم جدا جدا للنقاش لأنه يعالج مشكلة كبيرة ، يديك العافية على هذا البوست ومزيدا من الإبداع ودمتم زخرا لنا .

[ابراهيم]

بمناسبة السفنجات الجوه الشنط دي بقترح على كل اخواتي من باب الحيطة والحذر ان تراعي المقاسات بالنسبة للشنطة اقصد ان تشتري الشنطة بمقاس كبيرة عشان يكون قدر مقاس السفنجة

انا اقترح بدل ما تشيلو سفنجات شيلو دكتور شول

شوفي كان في واحد عاين ليك

ولا رايك شنو يا حمادة