واللّة يا الفارس آخوى الناس ديل خوافين بجو يتاوقوا ويتشمشروا ويكسحوا أها زح لى النفتح مخلايتى أصلو لسانى ماكلنى على الكلام .
أها .. واللّة شدة ما سمحة حرّم لدرجة قف تأمل , منو ؟ حبوبتى يعنى ؟ ما بت فى فريقنا , أها .. حلوة لمن غلط والشباب متكبكبين فوقها ذى الكدسة فوق عتود أمى حوا لما رميناهو بعد ما دقشو بكسى أبوضريس , على الطلاق ,, آلفارس ,, الشافعة دى نار اللّة الموقدة مولعاها فى قلوب الشباب , والبقى أحمد شوقى وهاك يا بحور الشعر والبقى إحسان عبدالقدوس وهاك يا قصص والبقى والبقى والبنية مطنشاهم ليك جت , حرّم ولا رمشة مافى ليهم وأبوها وأخوانها بياكلوا النار , والظلط ,, ها ,, تحلية بس , أها يوم لقيت ليك أصحابى قاعدين جايبين سيرتها وطبعاً بكى جد وواى واى ما بتدى الدرب , وقلت ليهم مالكم هى دى غالباكم ؟ كلكم بتحبوها ومافيكم واحد قادر يقول ليها إحم ؟ قالوا لى يعنى إنت تقدر تقول ليها بحبك ؟ قلت ليهم شفتونى فِرِد يوم قعدت أشمم فى دربها زيكم ؟ قالوا لى لا بس قولها ليها ساى وهى هديك فى بيت ناس النعيمة هسى بتطلع , ولو قلتها ليها بنديك طراضة , قلت ليهم عِلا ياكن كدى ما بخلى خشمكم ملح ملح , قالوا ما مشكلة , وقبضت الطراضة وإتحكرت ليك فى ناصية الشارع وبعد فترة جات وقطعت ليها الطريق
_ ....... واللّة أنا من زمان بحبك لما ما قاعد آكل .
_ هة واللّة إنت عامل لناس أمك مجاعة .
ورشتنى ليك كف ,, آلفارس ,, حرّم النار ولعت فى عويناتى وريالتى طارت هنااااك , ومشت والمصيبة إزاعة الحِلة ود التوم ظهر فى اللحظة الكفتتنى فيها وجماعتى ورا الحوش يفرفروا بالضحك , ويازول الواطة لفت بى ومشيت سبعة تمانية وين ؟ الغابة وطلعت فى أكبر شجرة فى آخر فرع فيها , ويدى على جضمى وأسب وألعن فى نفسى وأصحابى والطراضة , وأكلم فى نفسى براى , هسى عليك النبى يا ,, عروة ,, الشلاقة ليك شنو ؟ أها دى السمحة كفتة يدها الحلوة دى ذى السم أها أخوها الشغال حفار السايفونات دا كفتتو بتكون كيف ؟ اللّة يستر اللّة يستر , أها مرات أقول أقع من الفرع دا وأكسر رقبتى ومرات أقول أقع البحر , أها صعوبة الإختيار بين الوقعة دى وديك فللت على الواطة ونزلت مشيت البيت , ويدى على قلبى من شبشب أمى داك ودا هين , الكلام أبوعضلات أخوها , ولقيت الجو هادى , قلت حلو , ولملمت ليك هديماتى وقلت لأمى باكر فجر ماشى ناس جدى , وكلحت الجضيم المنفوخ وسألتنى وأكلتها حنك ومن الفجر جيت مدنى وفى الساعة العاشرة صباحاً تحرك قطر نيالا وأخوك فى نصو , ووصلت بيت جدى فى نيالا وغطست هناك لمن أبوى رسل لى وجيت أبوظبى .
أها زح لى النلملم مخلايتى وأكان ما جا بعدى زول تانى قول لى عووووك حرّم المخلاية مليااانة تب .
Array
Array
Array
Array
ضوابط المشاركة
رد مع اقتباس
المشاركة الأصلية كتبت بواسطة تسنيم خالد
المفضلات