في البدء اجاركم الله من عيشة العزابه وانا هنا مابقصد العزابة الذين لم يتزوجوا ، لا انا بقصد العزابه العايشين براهم بالانجليزي عديل with out family 1 ، والجماعه ديل للاسف والظروف انا واحد اصيل منهم ، ده كان مدخل ونجي للعنوان تورا بور السودان ونرجع سنين وراء لمن جيت علي البندر 2 للدراسه فكانت مشكلة السكن مشكله كبيره والايجار غالي والزول كل يوم في حته يوم مع عمك ويوم مع خالتك ويوم مع صاحبك ويوم مع صاحب ودخالة جيرانكم في مدني ، المهم ربنا فرجها وعندي اختي متزوجه رحلت الثوره الحاره الثامنه والبيت ماشاء الله عليهو حدادي مدادي (غرفه وصالون )، وبقي بيت اختي البيت الجابو ليه العسل يعني بقي بيت العائله المصغره (اشقائي اثنين وانا وود عمتي ومرات بعض الضيوف من مدني )
يعني الحالة كانت شكله في طين والمنظر ما دسيس 3 ، ده كلو كوم و المواصلات السفريه بين الخرطوم حيث الدراسه والثوره حيث المأوي
بعني انا كنت بشوف مدني اقرب من امدرمان مع الزحمه والشماعه والشخصيات اللطيفه ( الكماسره اصدقاء الطلبه)
ماعلينا ...
فجأة وبدون مقدمات في ليله كان فيها القمر بدرا والسماء صافيه 4 برز ضوء امل لنهاية معاناتنا جميعا وجاء الامل في ذلك الوقت من والدي (رحمة الله عليه) وكان الامل متجسدا في منزل يضمنا جميعا انا واشقائي وابن عمتي وكان المنزل لصديق لوالدي كان قد تحدث معه بعد ان عايش معاناتنا فأصر الصديق ان يعطينا المنزل ملح 5 يعني لا قرش ولا تعريفه
وخلاص نحن ما صدقنا وبأحلامنا فرشنا المنزل وجبنا تلفزيون ودش وبوتوجاز واي حاجه ... المافي شنو (ماحلم)
وجاء اليوم الموعود 6 وفي اليوم ده كانت المعنويات الف 7 ومشينا بيتنا...
نسبة لضيق الوقت وماداير اقدكم كتير في المره الجايه بوريكم الحصل شنو في اول يوم وتورا بورا السودان دي معناها شنو
معاني الكلمات
1- : من الديكشنري
2- : الخرطوم
3- :حالة صعبه
4- :لوحة سريالية
5- :معروفه ومامحتاجه لشرح
6 - : يوم الرحول (الهجره الي عنوان الموضوع)
7- :معنويات عاليه
سأعود اذا كان في العمر بقيه ولم يخذلني الزمن ولكن لاتنتظرونني ... فربما يخذلني
رد مع اقتباس
المشاركة الأصلية كتبت بواسطة moram
المفضلات