الغائب احدث الحاضر

[نزار حسن محمد]

ازيكم ياحلوين ..
الغائب احدث الحاضر عمكم نزار بكره فى مدنى ومن مدنى يالجنيد جاك زول ماشى اتونس شويه مع عمكم ود الماحى واخد لى عرضه عرضتين فى زواج اخوه .. ابقو عشره على المبادى ..ودعتكم الله

[عماد عبدالشكور]

تصل بالسلامة اخونا نزار وسلم لينا على مدني شديييييييييييييييييييييد وقول ليها عماد مشتاق ليك كتير بالحيل

[نزار حسن محمد]

الغالين علينا .. ازيكم

ما احلى ساعات اللقاء وفى ابوظبى عند عرس احد اعضاء منتدى ودمدنى بالامس كانت الروعه تتجسد امامى وانا اراء الاخ مدناوى وهو يعانق ود المطامير واراء خالد المسافر يحضن زول فرده وناسا بالانجليزى ينظر غير مصدق ونزار يحول الهاتف من واحد لى واحد والرائع ودالماحى يتحدث من امريكا قرابة الساعتين مع الاحباب اعضاء المنتدى والاخت نور العيون تجعل كل الشبان يتاهفتون على الحديث معها عبر المبايل والعريس العضوء الطيب سعد يحدث زوجته عن هؤلاء الشباب الذين حضروا مخصوص لزواجه عبر منتدى ودمدنى لكى تكتمل الفرحه ..
الحديث يطول ويطول ولكنى الان احضر شنطتى لى لغادر لى ارض المحنه وقلب الجزيره ودمدنى
عشان تكتمل الافراح بى مقابلة ود الماحى فى الجنيد ... وبجيكم بكل التفاصيل ..
فتكم بعافيه اخوكم ودحسن

[عوض صقير]

بالسلامة يانزار

تحياتى للأخ ود الماحى وكل أهل الجنيد

وماتكتر من سكر الجنيد

تحياتى الخاصة لأخونا خالد ود الصول بجامعة الجزيرة
وأخونا نبيل حمدتو
وأخونا حسن على
وكل الشباب بمدنى الجميلة

[Madanawi]

صدقت يا نزار فأبوظبي كانت حلة زاهية اكتست بالوان المحبة والود والشوق للقاء الاخوان فكانت ساعة الظفر بالتقاء الاخوان في صالة افراح المشرف في طريق مطار ابوظبي نزار وود المطامير والمسافر ومدناوي والعزيز الذي ابت نفسه الا ان يكون بين الاحباب رغم ظروف الوعكة التي المت به ولا نه زول ما عادي تحامل على نفسه واتي للملتقى لانه زول فردة بالانجليزي.

بتنا الرائعة نور العيون هاتفت المجموعة من راس الخيمة وكانت وتحدثت الى الجميع تلك الرائعة رغم تمنياتها لي بالمغص الا انني رفضت اكل الكسرة التي لم يحضرها اخونا المسافر لانه عمه عصر عليهو شوية وستنفك كل الشفرات في يومين فانتظروا المثير الكثير.

كل اللحظات ازدانت وكل الكلمات عكست رونق الالفة والاخوة الصادقة عندما رجع نزار بعد ان غادر ابو ظبي متجها الى دبي في ساعة متاخرة من الليل ليعود من منتصف الطريق عندما هاتفه الاخ الرائع جمال الماحي من امريكا ليطلب منه ان يلاقى الشباب عبر الهاتف ورجع نزار وكانت الكلمات رنانة ولها صدى سترونه في البوست الذي سينزل في اليومين القادمين توثيقا لهذا الملتقي الفريد.

[الفارس البنفسجي]

تصل يا عزيزنا نزار بالسلامة ........ وبلغ تحياتي لكل الأحبة وخاصة ود الماحي
تمشي وتجي بالسلامة
وفي رعاية الله

[نور العيون]

و الله فعلا كان لقاء جميل و في غايه الروعه
لكن مافي زول سال انا ليه كنت دايره مدناوي يتمغص
ما اصلي ممغوصه منو و هو عامل فيها تقيل
و ما عرفت بوصوله الا من المسافر و زول فرده
غايتو الله يدي العافيه
لكن يا مدناوي انت عارف انا مغيوظه منك تاني ليه
و ما في داعي اقول
و الله يديك العافيه و مرحب بيك بين اهلك و ناسك

[مدناوية]

تمشي وتجينا بالسلامة يانزار ... وسلامنا الحار لأهل مدني الطيبين

قالوا العرس كان رابي وسكسكة شديدة .... والله فاتني..
ومدناوي الله يديهو العافية قاعد يحكي لي بالعرس واللمة الحلوة ويمغص فيني...


وربنا يديم المعروف....

[سوار الياسمين]

العم الغالي والقدير نزار

توصل بالف سلامة ويا رب تقضي اوقات ممتعة وسعيدة مع عمنا الجميل ود الماحي
وتحياتي للجميع في مدني الغالية

[رضا حسن محمد]

سماع اهلا من الاحباب شروق امال
ووصف البهجة بالكلمات محال يقال
حلاوة العودة غنيناها فى موال
يحكى عن الولف
اصلو الولف كتال


سلامى ليكم كلكم

[ابوزيد محمد نور]

نزار نحنا منتظرينك فى مدنى وبالله عليك تجينا او اتصل واحنا حنكون معاك فورا عشان نمشى معاك العرس ............
اخوك
ابوزيد محمد نور
0912530990

[ود المطامير]

عمى نزار بالسلامه إنشاء الله ماشى وجائى
وسلام كتير لحبيب القلوب أخونا ود الماحى
ولكل أهل السودان وقول ليهم قال ليكم ود
المطامير فتشوا لى العمل الحامينى أرجع السودان
وعليك الله ما تنسى تجيب معاك الشطه الحمرا والويكه

[ود المطامير]

يا الحبيب الغالى مدناوى
وين الصور حقات الحفله
ولأ صلعة أخونا حرقت الفلم ؟

[محمد السر احمد]

اخونا الاكبر ود وخالتي الغالي تصل انشاء الله بالسلامة ومدني ح تنور بيك اكيد

[Madanawi]

يا نور العيون قاعدة تدعي لي بالمغص بعد ما اخونا المسافر يجيب الكسرة !! طيب اقل حاجة كنت تعملي التقلية بالشطة والفلفل الحار عشان يكون ليك دور في المغص ، المغص زاتو عايزة تملحي فيهو؟

يا ود المطامير الصور مفروض ارفعها في البوست حق رحلة الامارات بس كل صورة حجمها اكتر من تلاته ميجا - اول ما احل المشكلة دي خش وشوف بس ما تتجرس من تعليقات الشباب

[حسن السيد]

ازيكم ياحلوين ..
الغائب احدث الحاضر عمكم نزار بكره فى مدنى ومن مدنى يالجنيد جاك زول ماشى اتونس شويه مع عمكم ود الماحى واخد لى عرضه عرضتين فى زواج اخوه .. ابقو عشره على المبادى ..ودعتكم الله

تمشي وترجع بالسلامة يا نزار وانشاء الله تكون أجازة سعيدة
بين الاهل والاحباب وانا من الان منتظر اخبار الغبش والتعابة
وعاوزة بالتفصيل الممل

[سواااح]

حبيبنا نزار ...

صحبتك السلامة
وكن دوما في رعاية الله وحفظه
ولا تنسي ما اتفقا عليه

دمـــــــــــــــــت ،،