فتور علاقة السودانيين في الخارج

[حلفا 2007]

حتى السلام!!!!!!!
ده ما سلامك ,,,, ولا الكلام الكان زمان في رقة كلامك
وذي مابقولوا--- السلام بجيب كلام
كل الناس أصبحوا شغالين بالمقوله ده ماعارف السودانيين في الغربه بحصل ليهم أيه الواحد بدل مايشوف سوداني يفرح بقى يخلي الشارع وربنا يستر على العادات السودانيه الباقيه .
أنا ما بقول الكلام ده على الناس كلها وبالذات ناس مدني بعيدين كل البعد عن ذلك لكن والله في موافق تخجل من بعض الناس وكأنه لا يمكن أن يحتاج لغيره في أي شئ ولا هو على إستعداد لمساعة غيره في أي شئ حتى الوصف والمواقع وأن كان الإنسان ما من المنطقة يعني الواحد تلقاه يتغير ويجهم وهو يسلم عليك .
الموضوع كبييييير وليه أبعاد وأمور متشعبه وده بداية الموضوع وأتمنى من الإخوه مناقشة الموضوع ومناقشة أسبابه إن وجدت - عشان نحاول نعالج هذه الظاهره لو وافقتموني على إنها ظاهرة تحتاج النقاش .

[عماد عبدالشكور]

اخونا حلفا 2007
اولا نرحب بك في دارك وبين اهلك واخوانك
واعتقد بان موضوعك الذي طرحته مهم للغاية
ولا اعتقد ان فتور علاقة السودانيين بالخارج اصبحت ظاهرة كل مافي الامر ان مشاغل الناس وهمومهم اصبحت كثيرة والحالة النفسية لكثير من المقيمين بالخارج اصبحت سيئة للغاية
واعتقد ان العلاقات الاجتماعية للسودانيين بالخارج لسة بالف خير
والتحية لك اخونا عباس وابقى داخل

[الطويل]

أخونا ود حلفا

أنا معاااك فى كلامك ومابقول الشئ ده ما حاصل هو حاصل لكن ما كل السودانيين كدى البعمل الحركات دى ما سودانى مأصل ود قبايل .

[الفارس البنفسجي]

ما أتوقع في فتور وأقرب
دليل المنتدى دا

[hibbo]

ليك كل السام والتحيه.......
والله انا معاك في كلامك ده لكن بقول ليك الوضع بفرض نفسو لأنو في جزء كبير من السودانيين بقا عندهم الاتكاليه وكسر الركبه وساعات بجيبو المشاكل..........
لكن حتجي في النهايه تلقا المغترب ده سوداني وعاداتنا مزروعه فيو بس لازم يعمل كده عشان يقدر يعيشو ويصل للعايزو من غربتو ويربي عيالو.........الخ عشان كده بقا الواحد بعمل زي ما بتقول وبهرب من دا وداك........
فالمفروض انو كل واحد من المغتربين يحاول يعتمد على نفسو وكل تفكيرو يكون في الغرض البي سببو اغترب وما يضايق اخوهو في الغربه ولو واصلو كده اكيد الناس كلها حتترابط مع بعض لأن كل واحد بشوف المسؤوليه في اخوهو في الحاله دي منكن يقيف معاو........
وربنا يرجع كل مغترب لي سودانا الحبيب معزز مكرم محقق لي هدفو........
وربنا يوفق الجميع........
وربنا يدي العافيه..........

[مختار بازى]

والله الموضوع داير وقفة وكلام كتير بس الظروف بتفرض نفسها
ما كل سوداني سوداني ؟
قولي لي كيف ؟ في سودانيين في الغربة لا هم سودانيين ولا الله قال:
لا الطبع ولا الاخلاق والشيمه والهمة بتاعت السودانيين والقعاد معاهم في حد ذاتو مشكلة
اها قول لي ديل تتعامل معلهم كيف ؟
ملحوظة :
ما كل السودانيين كدا ويكفينا انك واحد منهم وبنعتز بمعرفتك

مشاققة :
تعال يا اخوي عازمك معاي وشوف السودانيين الانتة بتفتش ليهم

[عبدالرحيم سعيد]

الأخوة الأعزاء كلام حلفا معاش حقيقة ولمسناه منذ وصولنا الخليج خلال ثلاثة سنين ويتطلب قيام روابط اجتماعيه واسرية تعيد هذا الرتق فينا,تجي هاش باش ويسلم عليك بطرف اصابعه ليه ماتعرف,لااقول فوارق التعليم اوالوظائف هي السبب اخوة معنا لهم الدكتوراه يعملون بمرتب عامل وعامل يعمل بمرتب 15الف ريال سائق, السبب الغربه والهم طيب كل الناس في الهوي سوي،التناصح بيننا في المحيط الصغير نبدأ به ليتسع لرحاب اوسع اخي الحلفا ولا نألو جهدا ,وتحيه’’,,,,’’

[حلفا 2007]

إخوتي الأعزاء تحية طيبة
الناس مشغولة ... الإلتزامات كثيره .... النفسيات تعبانه .... ظروف الغربه .... ولكن !!!!
نحن لانقبل أن يكون واحد سوداني فقط بهذه الطريقه .
وبعدين ياأخوانا الإنسان ما ينظر لكل الناس بمنظور واحد , أيوه ممكن يكون في بعض الناس متعبين في الغربه مع ضرورة وحرص الناس على مظهر وسمعت السودانيين ويمكن أن يقابلك الذي يزعل عليه أن يكون سوداني وأن ويحسب على السودانيين ولكن أن تتعامل معه أنت خير من يتعامل معه غيرك ويقول هؤلاء هم السودانيين . طبعاً هذا هو المثال السئ المعمول شماعه لكل الناس ولكن إيضاً يوجد من هو محترم ومهذب ويمثل السودان أحسن تمثيل ويحتاج منك لمقابله بشوشه وتشعره بأن الدنيا بخير وأن في واحد من بني جلدتك موجود بجوارك في غربتك وغالباً ما تكون المساعده المطلوبه أدبيه وفي متناول أي شخص بذات ساكن المنطقه التي جرى فيها اللقاء .
تحياتي لكل من شارك وساهم في الموضوع