كسرة بي مويـــــــــــــــة

[عمك تنقو]

طبعا اغلب اولاد الجزيرة في الحواشات ( العمل الشاق ) كنا نسميه أيام الزراعة والشلخ والحش ونحن طلبة نذهب مع اهالينا لهذا العمل الأخضر والذي من مصروفاته يمكن لك ان تذهب للثانوية بعد الاجازة الطويلة ديك 3 شهور ( دق ) وزيادة .. تمشي بي ساعة ورداء ( سموكينج ) وده كان بلبسوا اولاد الخواض والتجار بس
كدي النجي لي موضوعي المهم انت بتكون في الحواشة بعدين في وجبة واحدة وانت في هذا العمل يتجمع اصحاب الحواشات ويطلعوا الكواري المغطية ( زي ال parcel) اسه
وفي الكورية دي بتلقي الكسرة فيها بصلة كبيرة وشطة وملح ومن التقنت تغرف الموية وتاكلو الكسرة بالموية طبعا واحد في الجماعة ديل بكون عنده زيت سمسم ( قسما ) تاكل مع الجوعة ديك والشمس الضاربة الراس لما عرقكك يخرخر وتشرب الموية وتقوم زي الحصان علي الإنقاية ماشاء الله زي الطالع من هلتون الخرطوم

طبعا ود المطامير بجي ناطي لي وبقول كان بشيل معاهو الكبدة والفول والعدس والطحنية
وموية القربة
السعيد فيكم الأكل الأكلة دي يقول وانا غايتو ضامين ليكم :
ابو المهتدي
وود الماحي

[ود المطامير]

وحاة الله موسى المجنون ( مجنون صحى صحى ) مره هرشنى أنا وواحد صاحبى وقال لينا لو ما جيتوا مشيتوا معاى ضحوه إلا بالليل تشوفوا ليكم بلد وحاة الله من الصباح شحدت لى ملود ومن الساعه إتناشر مشينا معاهو ولما جات ساعة الغدا قال كدا طلع لينا من كورنة الشوال عصيده ومن الترس فج المويه عشان يبعد ناس أبو الضبضوب وكب المويه وشتت الملح والشطه لكن والله العظيم من شدة الجوع والخوف من المجنون دا كانت أجمل وجبه تناولتها فى حياتى وطعمها لليوم فى لسانى .

[Jamal Elmahi]

ياحليلك ياعم تنقو وياحليل الكسره بي مويه...
أنا غايتو الكسره بي مويه جابتني جري قلته أحصّل الربوب ..طبعاَ بعد خمخ العصيده بفضل في النهايه الربوب زي المخلوط بي خلاطه والله أحلي من الهيلاهوب وخاصة لو كانت موية التقنت راكده بكون فيها الدغاليب جني القعونج ودا كمان بحلّي الربوب ذياده وبضيف ليهو نكهة الكبده...
مشاققه...
طبعاَ الحناكيش والمتحنكشين والعاملين عليها بقولوا عم تنقو بقول في شنو ...هم الكسره ما بعرفوها تقوم تدخّل فيها تقنت وإنقايه وقربه ...هاك السعن دا....

ود الماحي

[ود المطامير]

ياحليلك ياعم تنقو وياحليل الكسره بي مويه...
أنا غايتو الكسره بي مويه جابتني جري قلته أحصّل الربوب ..طبعاَ بعد خمخ العصيده بفضل في النهايه الربوب زي المخلوط بي خلاطه والله أحلي من الهيلاهوب وخاصة لو كانت موية التقنت راكده بكون فيها الدغاليب جني القعونج ودا كمان بحلّي الربوب ذياده وبضيف ليهو نكهة الكبده...
مشاققه...
طبعاَ الحناكيش والمتحنكشين والعاملين عليها بقولوا عم تنقو بقول في شنو ...هم الكسره ما بعرفوها تقوم تدخّل فيها تقنت وإنقايه وقربه ...هاك السعن دا....

ود الماحي

يا حبيب قلوب الملايين ....... يا جمال ما بعده جمال
الدغاليب دى نحنا بنسميها أبوالضبضوب الواحد فينا بزحو بيدو كدا عشان يشيل المويه
غايتو يا حليل موية الترس ويا حليلك يا سودنا ويا حليل اللى ما شربوا موية الترس
وأكلوا الموليته وشرا القندول يخلينا ننكرش اليوم كلو .

[Jamal Elmahi]

يا حبيب قلوب الملايين ....... يا جمال ما بعده جمال
الدغاليب دى نحنا بنسميها أبوالضبضوب الواحد فينا بزحو بيدو كدا عشان يشيل المويه
غايتو يا حليل موية الترس ويا حليلك يا سودنا ويا حليل اللى ما شربوا موية الترس
وأكلوا الموليته وشرا القندول يخلينا ننكرش اليوم كلو .

الحبيب ود المطامير
الموليته والقنقر وأم بقبق والجديله والفقوس والحميض ..كلمات لها إيقاع تلاشت بعد العولمه كما تلاشت الضحوه والضهريه بعد تطبيق حقوق الانسان ولله في خلقه شئون...

ود الماحي

[ود المطامير]

الحبيب ود المطامير
الموليته والقنقر وأم بقبق والجديله والفقوس والحميض ..كلمات لها إيقاع تلاشت بعد العولمه كما تلاشت الضحوه والضهريه بعد تطبيق حقوق الانسان ولله في خلقه شئون...

ود الماحي

يا حول الله ... يعنى الملود حقى دا اللى عملت ليهو موتور كهربائى
وقلت لو مشيت السودان بريحنى ويكلنى عيش إبقى ما نافع ؟

[عبدالرحيم سعيد]

وكان عندها حيث لا كنسترول ولا ضغط ولاسكري ولاقولون0والهم كله تجي مطرة تسلك التيراب0أخوتي هذا هوالارث الذي اوجبنا الحاضر علي نسيانه في مدن النفط الوردية0فلنعض عليه بنواجز فتيه فالسرد لتنقو سقاه ماء الفؤاد وهو ريان فصار كأنما في العيدان عيدان0

[مرتضى ساتى]

والله ياجماعة الخير خليتوا لعابنا يسيل من الصباح
ياجماعه الكسره دى انا اخيرا اكتشفت انها احلى من كنتاكى
ويا عمك تنقو جربت الكسره بالكمونيه كدى جرب وادينى خبر

[شبرقية]

والله متغطونا
الله علي الكسرة بي موية
وحلاتا تزيد لما نتلم والكهرباء قاطعة بعد مالمطرة صبت
ونكون كدا قاعدين وبنات الجيران
احي والله ايام يازمان
ببكي وبتحسر عليك
والله ياعمو تنقو رجعت لي زكريات ولا احلي

وحلات الموليتا في البلدات تحت الرزاز
وتلقي السرف حايم
والله علي دبوية المطر
ياخونا هسه ببكي ليكم

شنو ياعمو جمال والله حاجاتنا السمحة دي ماف شي
بمحيها
والاصلو في الجوف اندفن لا بتمحي لا بتنسي لا بنتهي
لا بنتطفي منو الحريق
ياخي عولمة شنو
اها هدا دربي كان ماسويت كسرة بي موية ابقي ما شبرقية
اجيب ليكم معاي
رايكم شنو لو كانت بي روب حااااااااااااااااااامض وملح كتيييير
وطماطم

[Madanawi]

هههههههههههههههههههههههه
والله ياجنيات الخلا و البلدات .. لازم ترجعونا للناكوسي واب عشرين ، كدي آجنا المطامير أتناول السلوكة دي .................عاماً أول علمتك كيفن تتيرب وانت قاعد لي حدا النواعم
وشايلّك عطر هدية .. حليل زمن القرموط والنمتّي والعدار .. حليل زمن الموليتة والكتاكو!!

حليلك آلسعن .. والروب جوّه النملية ،،

[شبندر]

عمي تنقو لك منى خالص التحايا والله حقيقة أيام لها ايقاع
نسأل الله ان يعيد هذا الزمن الجميل
تخريمة : في مرأة كبيرة عملت ليها كسرة بي موية وقبل ما تبدأ تاكل قالت بسم الله نط الشيطان وقال ليها انت مغفله اسي العاوز ياكل معاك منو

[ابوشوتال]

كسرة بي موية بايتة
شوية ملح
بصلة
شطة
شايلها وماشي البر اكلها هناك

المعنا منو - تسلم ياتنقو

[مرتضى يوسف العركي]

الفردة عمنا تنقو
الاخوة الاعزاء تحياتي القلبية لكسرة بموية مروية بشرط ان لاتشملها فواتير الري و سياسات الانتاج بمشروع الجزيرة المتوكل على الله قبل مديره العام الجديد.
ادخر لدى ام العيال زيت سمسم كميات لا يعلم عنه احد وهي برغم من انها ليست من بنات الزمن الجميل الا انها اجادت العواسة في البلد دي بعد ان دفعت فيها ثمنا ا من تشتشة وحروق وغيرها
والله يا جماعة الخير الكسرة لديها طقوس خاصة ولازم الواحد يدخل في العراقي الهبابي ولحالو كما يقول الاخوة هنا يقوم يحش البصل والطماطم والجرجير الذي اجهد في الحصول عليه متميزا والشطة الهندية المتوفرة باقصى درجات اللهلبة واقطعها بيدي والعصابة من حولي من غير امهم التي لا تقربها البتة ماشاء الله على الصحن والايادي تقول بس اداء قسم والعرق يجري منها في البلد الما فيها عرق دي يالله كفاية الخميس الليلة وعشان ما اكون كضاب ما عازم زول لانولو عزمتكم ما بتجوني لكن اوصيكم ومن دربكم ده شوفوا سوق الخضار بوين والما عندو صحن طلس بالله ياخد ليه صحن وتقدم لافارد اسرتك كسرة بحساء البصل وبصحة وعافية والتي تعجبني عندما تقدم طبق اليوم مرأة مجيهة ممن تعج بهم الفضائيات والسلام .

[محمد السر احمد]

بالجد يا عمك تنقو دي احلي اكلتها انا منت في مرة حايم في المسلمية كنت بجمع لي في بيانات عن تقدير الانتاجية وجات الساعة واحدة واخوك كان داير يموت من الجوع لقيت اعمامك الكزارعين قاعدين وطبعا هم مشهورين بالكرم كوروك لي وانا ما صدقته وديك يا الكسرة الحمرة واخوك اكل لمن هم اندهشو قالو الافندي دا اكيد من حدنا
تسلم علي الموضوع بالكسرة

[okasha]

طبعا ديل ناس لحواشات
اما نحننا فى المدينة كسرتنا بدكوة

ولا شنو يااااااااا