بسم الله الرحمن الرحيم
مما كنت صغير انا بكره الحمام
ام نزار الله يديها الصحة والعافية كسرت فينى ميات المفاريك فى موضوع الحمام
نزار وعصام كانو مرحين معها فى الموضوع دة لكن انا دقتنى دق العيش
كانت تصر انو لازم استحم كل يوم
اها بقيت غصبا عنى بستحم كل يوم لغاية ما دخلت جامعة الخرطوم
اها فى الجامعة بقيت استحم كل يوم عشان الجكس مشتت ذى البلى
وعشان اولاد الخرطوم الوهم ديل ما يقولو ناس مدنى ما بستحمو
وعشان بت دبلوك كانت بتقرا فى جامعةالخرطوم
وبعد التخرج اشتغلت فى مدنى وسكنت فى بيتنا وامى واصلت معاى نفس الحصار
اها بعد ما اتزوجت بت دبلوك, امى كانت ارحم
بقت تجبرنى استحمى اليوم مرتين
وشابكانى ليك النضافة من الايمان وانت لازم تكون قدوة حسنة لاولادك
وبعدين الخواجات الانتا شغال معاهم ديل يقولو عليك شنو
اها ود حسن بقى يوميا يستحمى مرتين شدة ما الله اداهو
شفتو المصايب الانا واقع فيا دى
وزى ما قال معتز الريح حقو يوم السبت دة يكون للحمام
اها بت دبلوك لمن اقول ليها انا جعلى وريحتى ما بتكون كعبة تقول ليك سيبك من الكلام الفاضى وتدينى ليك محاضرات شى بالعربى وشى بالانجليزى
بقت تعاين لى كدة اخش الحمام
يا ربى انا بخاف منها ولا شنو
طيب جدى الكتل الاسد دة الله يرحمو يقول على شنو
بجى تانى
رد مع اقتباس
المشاركة الأصلية كتبت بواسطة Madanawi
المفضلات