رحلة في الدواخل

[عثمان جلالة]

عندما كنت صغيرا
زمان زمن قفا .... زمن نبني فتهدمها الرياح فلا نضج ولا نثور ...
زمن الرغيف أبو قد ..... قد كانت أحلامنا مثل الأشجار وارفة ... كان المنى كل المنى المشي لمدني ...طبعاً مع وقت المرتب (الماهية) وكانت في وقتها رواتب وزارة الصحة ليها شنه ورنه كنا بنرتبها أنا والوالد (الله يديهو الصحة) ... بعد حصة الحساب أصل للعيادة بالدفتر وهناك يكتب لي (يعاني من حمى وراحة اليوم) وأرجع البيت .... والبس سريع ... وعلى الشفخانة ومنها لمدني طبعا همي الاول بعد صرف الراتب طبعا ... أكل الأيس كريم ... مالكم مستغربين ... أي الأيس كريم .. ما تنططوا عينيكم .. وبعدها ... نمشي نشتري كتاب من المكتبة .... يا الشياطين ال 13 أو طرزان أو اللص الظريف أو ميكي جيب ... كانت المدينة هادئة ووادعة .... بنك الإدخار كان من أجمل المباني ... والموظفين يبتسمون في وجه الجميع .... وكانوا ... يهدونا نحن الأطفال ... الحلاوة ... لكن مالو الزمن اتغير ... ولا الناس ولا شنو
أهديك الفوضى ... شجار طفلين في ساحة روضة .... أهديك إسمك .... ستات الفول أثناء الخمشة بعد إذنك .... إذنك معاك ... ومعاك يا مدني اتبرجت غيمه ورجع فاضي الكلام مليان ..... كان الزمن الجميل .............. ولنا عودة:d

[MASS77]

جلاله
انت زمن الرغيف الفيو قد في النص ده في اسكريم ولا داندرمه
والله بالجد الزمن ما اتغير الساعات كما هي والشهر والسنه
لا نقصت ولا زادت العيب فينا نحن نفوسنا اتغيرت اختفت فينا مبادئنا وطيبتنا وصدقنا بتتذكر الرجال كلهم يلمو الصواني بتاعت الاكل وياكلو لو فطور ولا غداء ولا عشاء
بتتذكر لو حصل ليك فرح ولا كره بتلقي منو غير جيرانك الاحسن من اهلك زمن كان فيو الخال والعم هم اي واحد الاقيك في الشارع وهو اكبر منك الخال والعم هم ابوك وامك
بهتمو بيك اكتر من اولادم هم الاتغير كتير طمع وجشع ونفوس خراب

[عثمان جلالة]

شكرا على المرور يا ماس 77 وعلى ذكريات أيام زمان
حتى توقيعك ... تبقى سيرتك هي الكلام .... وانشاء تعود أيام زمان

[معتز الريح]

الحبيب جلالة ..
زمان تاني ما بتعوض ..
جمال وسماحة وبساطة القلوب كانت بتخلق جو ذلك الزمن الجميل ..
فقدنا البساطة ..

الله يستر من الجاي ..

[Madanawi]

شكلو الزمن .. غيّر ملامحنا .. وبقينا نحنا .. ما نحنا
الصراحة مدني كانت ملاعب جنة لو سار فيها سليمان لسار بترجمان
ولكن الواحد مننا فيها .. اصبح غريب الوجه واليد واللسان .. كلو من الغربة
زمان الواحد يطلع من الدرجة ماشي كداري لحدي السوق .. وطبعا يشق السكة حديد ويمسك شارع الجمهورية طوالي .. عليك امان الله الواحد يتعب من كتير السلام .. الكل بيعرف الكل والناس حالها زين .. مباشرة وصبوحة .. والكل أهل زي صحاب .. قول أجل .. ما فيهم نشاذ
ديل ناس مدني .. ولازم نعووووووود .. يا السر قدووووووور.

[عثمان جلالة]

الحبيب جلالة ..
زمان تاني ما بتعوض ..
جمال وسماحة وبساطة القلوب كانت بتخلق جو ذلك الزمن الجميل ..
فقدنا البساطة ..

الله يستر من الجاي ..

الجاي خير كتير انشاء الله طالما الرائعين أمثالك رافعين الراية والجاي أجمل ... بس نحن في فترة استراحة .... بالمناسبة قالوا في واحد في فنزويلا الشرطة مطارداه مطاردة طويلة ... طلب منهم زمن مستقطع .. فترة استراحة

[عثمان جلالة]

شكلو الزمن .. غيّر ملامحنا .. وبقينا نحنا .. ما نحنا
الصراحة مدني كانت ملاعب جنة لو سار فيها سليمان لسار بترجمان
ولكن الواحد مننا فيها .. اصبح غريب الوجه واليد واللسان .. كلو من الغربة
زمان الواحد يطلع من الدرجة ماشي كداري لحدي السوق .. وطبعا يشق السكة حديد ويمسك شارع الجمهورية طوالي .. عليك امان الله الواحد يتعب من كتير السلام .. الكل بيعرف الكل والناس حالها زين .. مباشرة وصبوحة .. والكل أهل زي صحاب .. قول أجل .. ما فيهم نشاذ
ديل ناس مدني .. ولازم نعووووووود .. يا السر قدووووووور.

الانسان الجميل ... مشرفنا
كل ما تباعد ... بينا عوارض ... كل ماهواك يا مدني مكني .... ألقى حبايب في كل حته وكل بيوت الفقرا بيوتي ... لا بدلت وراك الجته ولا غيرت ملامح صوتي....