صحيفة شهرية سياسية اجتماعية تهتم بأخبار أعضاء المنتدى، وسياسة المنتدى
رئيس التحرير + المدير + الغفير (كلو (شبارقه
مساعدو غفير التحرير : أبورجاء ، مدناوي بورتبيل و الخ ...
العدد التلطاشر ـ اتنين يوليو سنة الفين وسبعة ميلادية
الإخوة الأعزّاء رواد وأعضاء المنتدى ، السلام عليكم ورحمة الله ، يطل عليكم العدد التلطاشر من جريدتكم المتألقة دوماً، جريدة المنتدى، الذي نأمل أن ينال اعجابكم ورضاكم، ولا تترددوا بالاتصال بأحد فروع مكاتبنا المنتشرة في أرجاء المنتديات للمشاركات أو الاستفسارات أو الشكاوى.
غفير التحرير،،،
الأخبار الاشتماعية:
وفاء فتحي (بالانجليزي) (أخت نجلاء فتحي بت أبوها) عضوه جديدة لنج ، ونشيطة نشاط ما شاء الله عليها، لكن مما خشّت المنتدى طقوها بي عين ، اتسلطت عليها باعوضة شماسية ما بتخاف الله عضتها بلا رحمة ، ومن ديك مسكتها الملاريا (ادعو ليها بالشفاء).
معتز الريح صاحب الشعر الأسود الناعم ، ما تصدقو انو الفي راسو دا شعر ، الحقيقة دي باروكة ، يعني شعر مستعار، والسبب بسيط جداً : الراجل نازل إجازة وداير يعرّس،وخايف الخطيبة تشوفو بعد الصلعة وتغيير رايها، ولو دا حصل أخونا حيركب زلط الفاو ـ قولوا معاي يا الله تروّق هبوبك ، وتثبت الشعور !!
الباش الصيدلاني البارع ، اكتشف العلاج السحري للشواكيش وأمراض الحُب والغرام ، يعني زول مكلوم الفؤاد، أو محطّم الآمال ، أو بريد وما بريدوهو ، يجري للصيدلية حقت الباش، والدفع بعد الشفاء (و أنا شايف الفلس في عينيك يا باش).
ريموز عندها حقد نوعي مركب من الدرجة الأولى ضد الرجال (الله يلعن أبو الشواكيش)، قررت أن تكرّس باقي حياتها لتبصرة بنات حواء من أخطار أولاد آدم ، اسمعوا ماذا تقول: (الرجال قلوبهم قاسية .. كـالحجر يحبون السلطة والسيطرة ...) حجر شنو؟؟ والله الرجال الزمن دا يخافوا من ضلّهم ،والمره هي ست البيت وست الشغل وست الراجل!!
خبر وتعليق
ـ افتتاح منتدى جديد باسم (النفّاج) ، وصلاح ود الطاهر وجنا المطامير وزراء .
* قالوا للحرامي احلف ، قال جاني الفرج ! (حاميها محاميها)
ـ مدنية تفوز بجائزة نجمة الشهر.
* الماعندو ضهر ينضرب على قفاه ، وبالبرطوش!
ـ أنيس التوم يتحدى ، ويكتب موضوع بالكورية.
* الطشاش في بلد العمي شوف!! دي ما زي حقت (سجنال تو سفنتي فايف!!)ـ
أبورجاء يسرق فانيلة الآدمن، والأخير يتقدم بشكوى لمجلس المنتدى القضائي.
* يا دي الفضيحة !! يعني عرياااااان للدرجة دي يا أبورجاء؟!
ـ سمر طه (In English) تقترح إنشاء منتدى العوانس ، وغيداء نور الدين تثني ومدنية ترفض.
* (دقيتو القيف وجيتو راجعين !!) زماااااااااان قلنا شنو!! ما فتحنا باب للعرس الجماعي وقعدتو تتعززوا، خلاص حلّو مشكلتكم براكم ، وتااااااااااني بتجو راجعين لينا! ويا مدنية اليدو في الموية ما زي اليدو في الزيت!!
شاذروان يشجّع المواهب الناشئة ويقترح طباعة ديوان على خفيف (http://www.wadmadani.com/vb/showthread.php?t=15492)
على حساب المنتدى!
* موت يا حمار على بال ما يجيلك الفرج!!
الأخبار السياسية:
المنتدى ساطوهو سواطة العصيدة ، الكان معارضة بقى حيكومة ، والكان حيكومة بقى معارضة، والقرارات ما تديك الدرب !! قرار ماشي وقرار جاي ، قرار يقطع في السلطة وقرار يصلّح في الفول!! وقرار أخد أخوانو ومشى المدرسة !! وزوووووووووووول بقول البقرة في الزير مافي!!
سيد البيت طردنا من بيتو، وبنى لينا بيت طين وقال البمرق بكسر كراعو (وتاني ما نشوفكم في باقي الاقسام .. وخلو بالكم من اخوانكم الصغار البلعبو في الحوش داك .. ما داير أجي القي واحد فيهم ببكي ولا نخريو سايلات ـ انتهى كلامه رحمه الله)
لكن نحن ديل شوكة حوت لا بتنبلع لا تفوت!! والأعمى قداااامو بنقول ليهو انت مكسّر!!
شباك تذاكر بعض البوستات:
1ـ مطلوب رواعية ـ ابو شوتال ـ منتدى النفاج ـ الإيرادات 5 صفحات/
http://www.wadmadani.com/vb/showthread.php?t=18296
2ـ لو حتكزب عليك الله مافي داعي تخش ـ غيداء نور الدين ـ المنتدى العام ـ الايرادات 5 صفحات/
http://www.wadmadani.com/vb/showthread.php?t=18409
3ـ دلائل على ان المرأه اذكى من الرجل ـ مختار بازي ـ منتدى النواعم ـ الإيرادات صفحتين/
http://www.wadmadani.com/vb/showthread.php?t=16672
4ـ فضل قول ( لا اله الا الله محمد رسول الله ـ salwa ـ الايرادات 5 صفحات/
http://www.wadmadani.com/vb/showthread.php?t=17394
5ـ تعالوووووو نضحك ..شويه ـ نزار حسن محمد ـ ودمدنيات ـ الإيرادات 4 صفحات/
http://www.wadmadani.com/vb/showthread.php?t=16727
مسابقة العدد:قد يصادف أحدنا في منتدياتنا الكثير من الردود الساخرة الطريفة التي قد لا ينتبه لها كل القراء، الفكرة: تعالوا ننقل أجمل تعليق يتسم بالطرفة والسخرية قرأناه في منتديات ودمدني.
ملحوظة: صاحب أجمل تعليق يفوز بكتابة العدد القادم من الجريدة.
خاتمة :
العشرين خلاص زدناها تسعة سنين
يا ربي البنات شن قولا في التَلتين؟؟
دايرين العرس قبّال نصل تسعين!!
فتكم بي عافية
رد مع اقتباس
المشاركة الأصلية كتبت بواسطة مدنيّة
المفضلات