أنصفوا المصريين .. ولو بالقليل ..

[معتز الريح]

طالما انو الأختلاف في الآراء لا يفسد قضية الود ..
ولولا اختلاف الآراء لبارت مواضيع وحاجات كتيره ..
والاختلاف عموماً سنة من سنن الحياة ..

لذلك قررت الولوج والكتابة عن هذا الموضوع
الذي احسب انو موضوع شائك ..

ولكن .. لدي ما اقوله ..
كدي فكروا في العنوان ده برواقة ..
وعاينو للنصف المليان من الكوب ..

وتعالوا نتناقش ..

[مدنيّة]

والله يا معتز انا وحدة من الناس بحب المصريين جدا
هسي عليك الله شوف طريقة تعاملهم
وقارنها بطريقة تعاملنا احنا
هم طبيعيين جدا في تعاملهم
احنا متكلفين جدا في تعاملنا ( ومابعرف ليه ؟؟ )
اديك مثال بسيط جدا
تلقي العيلة كلها ملمومة في السفرة علي الغذاء (مثلا)
الجد يقول للجدة هاتي شوية ملوخية ياحبيتي
كلمة عادية جدا بالنسبة ليهم
تعال شوف لو اتقالت عندنا احنا بين زوجين يادابهم متزوجين
اييييييييييييييييييييييك
الحلة كلها تتكلم بيهم
ويعملوهم نكتة الموسم

[معتز الريح]

مدنية .. شكراً على الدعم ..
وفعلاً بقولوا الما بعرفك يجهلك ..

ما دفعني لكتابة هذا البوست معايشه مجموعة منهم
لم اجد منهم إلا كل جميل ..
تعرفت بهم وبأسرهم .. فوجدت طيب المعشر ..

[خالد عبدالماجد]

الأخ معتز الريح
التقييم الامثل للشعب المصري لايمكن أن يجيده في هذه المساحة سوى العارفين تمام المعرفة بشعب مصر من الذين قضوا فترات طوال بمصر أو أتيحت لهم فرصة التعايش مع مصريين ، خلاف ذلك تأتي إجتهادات كل حسب ماتلمسه وحسب الإنطباع المغروس في نفسه عن المصريين لذلك نجد التفاوت والإختلاف في نظرتنا لهذا الشعب ..
عموماً وبما أنك طلبت أن ننظر للنصف الملآن من الكوب فالمصريون أكثر شعوب العالم قرباً من الشعب السوداني وتكثر بينهما القواسم المشتركة وكفى ..

[مختار بازى]

والله والله الحق يقال ولا خير فينا ان لم نقلها
ناس انا عايشتهم ولسة عايش معاهم لو حسبتها كدي مقارنة بينا السودانيين بس بتلقي الفرق كبير جدا جدا مع اننا كان ممكن نكون زيهم في معاملاتهم ومجاملاتهم في الافراح والاتراح
والبيعجبني فيهم اللمة والله بتاعت نسوانهم بالزات المسلمين منهن بيقعدن يتدارسن في امور الدين وشيء تاني والله الانا لاحظتو ما بيعرفن فلانة قالت فلانة سوت وتركت والله اي زول في حالو من كبيرهم لي صغيرهم وواضحين لي درجة كدا صراحة نحنا بنخجل منها مع انو الوضوح شي ء محمود والله وما بيحبو يكلفو الواحد منهم يعني باختصار بيظروا لي مصلحتك وبيعملوا الشيء البيخرجك باقل خسائر ودا شيء محمود كمان يعني هسة الليلة انا عايز اتزوج في السودان والله بالشيء الانا شايفو دا عايز لي الفميت سنة لكن هنا والله ما بتم سنة بتزوج لي للطريقة بتاعت التعامل الفرضها المجتمع بالبساطة المطلوبة والله يا معتز النصيحة
الناس ديل مظلومين من نواحي كبيرة ونحنا الظالمنهم انا معاك في كل مجتمع في الصالح والطالح لكن ما لي درجة اننا نجمع الشعب كلوا بانوا طالح لا والف لا زي ما هم عندهم الصالح والطالح نحنا كذالك لكن هم بيتفوقوا علينا في حاجات كتيرة ومن حقنا نعمل جادين عشان نفوتهم ونكون احسن منهم وبالمرة بنكون وفرنا علي روحنا حاجات كتيرة والله

[معتز الريح]

الحبيب خالد ..
يوجد من بيننا من يعيش بمصر
ومن درس بمصر
وأنا عملت مع مصريين
وعجبتني فيهم حاجات كتيره
فقلت اشارككم فيها ..
مع علمي التام أنو كل مكان فيه الخير وفيه الشر ..

[معتز الريح]

والله والله الحق يقال ولا خير فينا ان لم نقلها
ناس انا عايشتهم ولسة عايش معاهم لو حسبتها كدي مقارنة بينا السودانيين بس بتلقي الفرق كبير جدا جدا مع اننا كان ممكن نكون زيهم في معاملاتهم ومجاملاتهم في الافراح والاتراح
والبيعجبني فيهم اللمة والله بتاعت نسوانهم بالزات المسلمين منهن بيقعدن يتدارسن في امور الدين وشيء تاني والله الانا لاحظتو ما بيعرفن فلانة قالت فلانة سوت وتركت والله اي زول في حالو من كبيرهم لي صغيرهم وواضحين لي درجة كدا صراحة نحنا بنخجل منها مع انو الوضوح شي ء محمود والله وما بيحبو يكلفو الواحد منهم يعني باختصار بيظروا لي مصلحتك وبيعملوا الشيء البيخرجك باقل خسائر ودا شيء محمود كمان يعني هسة الليلة انا عايز اتزوج في السودان والله بالشيء الانا شايفو دا عايز لي الفميت سنة لكن هنا والله ما بتم سنة بتزوج لي للطريقة بتاعت التعامل الفرضها المجتمع بالبساطة المطلوبة والله يا معتز النصيحة
الناس ديل مظلومين من نواحي كبيرة ونحنا الظالمنهم انا معاك في كل مجتمع في الصالح والطالح لكن ما لي درجة اننا نجمع الشعب كلوا بانوا طالح لا والف لا زي ما هم عندهم الصالح والطالح نحنا كذالك لكن هم بيتفوقوا علينا في حاجات كتيرة ومن حقنا نعمل جادين عشان نفوتهم ونكون احسن منهم وبالمرة بنكون وفرنا علي روحنا حاجات كتيرة والله

مختار .. خليك قريب ..
والبوست ده حقك ..
وحتوفر علي حاجات كتير ..
كدي اخلي الناس تقرا الكلام الفوق ده
وتعال راجع تاني

[عثمان جلالة]

الحبيب معتز .. الشعب المصري شعب عظيم .. لكن فيهم الشر وفيهم الخير زي ما اتفضلت بس الشعب المصري حاليا مكسور ... كسرتو السياسة وباع القضية .. وأصبح أغلبهم ماديين يبيع أي حاجة عشان مصلحة نفسو .. لكن برضو فيهم الناس المحترمين .. ناس الصعيد .. منطقة النوبة .. وناس الشرقية .. وعندهم مشكلة إنو ما بكنوا لينا نفس الحب .. وبطلعوا عننا الإشعات يعني الشعب السوداني (كسلان) دي في الأصل مصرية وكل النكت عن كسل السودانيين بإخراج مصري .. أولاد النيل عند معظمهم شعار ... ويكفي إنهم خزلوا من زمان عبد اللطيف الماظ .. قالوا ليهو بنجيك من بحري وخلوهو براهو قاتل الانجليز بشجاعة لحدى ما مات مدفون .. التاريخ لا ينسى .. وبرضوا نحن صفحتنا بيضاء

[معتز الريح]

الحبيب جلالة ..
في البداية ليك الشكر على المداخلة ..
لكن حبيت اضيف ..
وتأكد زي ماهم نظرتهم لينا غير جميلة ..
نحنا كمان نظرتنا ليهم بنفس المستوى ..
ولكن ده ما بمنع نحكي الشي العاجبنا فيهم ..

يا جلالة .. تابع معاي
ومنتظر منك مداخلات تاني

[ابوندى]

شكرا اخى معتز , وفعلاَ الشعب المصرى وبالرغم من اختلافه عنا يظل من اقرب الشعوب الينا وحتى فى التعامل ,يعاملوننا بصورة جميلة جداَ وانا جاري مصري وافتخر بذلك لما لقيته من طيب معشر ومعاملة
وسلمت ياود الريح

[samar_taha]

الأخ معتز
لك التحية وأنت دوما تعزف على وتر الموضوعات الحيوية والهامة
في نظري فعلاً هم فيهم الصالح والطالح ولكن عندهم بعض الصفات التي لا تتوافق وطباعنا نحن السودانين عموماً لذلك تجدنا نتحفظ أحياناً تجاههم يعني مثلاً نحن الكرم ونكران الذات والتضحية عندنا صفة أساسية للقريب والغريب لكن هم ممكن يكون عندهم للقريب بس و ما دايما كمان , وثانياً أي انسان في الدنيا يسعى لمصلحته الخاصة بما لا يضر بمصالح الاخرين أما هم لا بأس لديهم إن أضر بمصالح الاخرين أحياناً , ونحن عندنا الشجاعة لكن هم أحيانا شعارهم (من خاف سلم) وهكذا
وفي الاخر هم شعب جميل وإبن نكته زي ما بيقولوا ووطنين يحبو بلدهم بشكل غريب ويا ريت نتعلم منهم بعض الوطنية
ولكم التحية

[معتز الريح]

شكرا اخى معتز , وفعلاَ الشعب المصرى وبالرغم من اختلافه عنا يظل من اقرب الشعوب الينا وحتى فى التعامل ,يعاملوننا بصورة جميلة جداَ وانا جاري مصري وافتخر بذلك لما لقيته من طيب معشر ومعاملة

الحبيب أبوندى
انا ما قلت هم أحسن ناس في الدنيا ..
لكن لقيت عندنا معلومات كتيرة غلط عنهم ..
وقلت اجي اتناقش معاكم ..

[معتز الريح]

الأخت سمر ..
زي ما اتفقنا انو مافي شعب كلو صالح 100%
وكمان مافي شعب كلو طالح 100%

ولكن كنا نظن عنهم الظنون ..
قربت منهم .. لقيت انو نحنا كنا غلطانين ..
في كتير من الاعتقادات تجاهم ..
وبجيها واحده واحده ..

[صديق بلال]

أخي الكريم معتز الريح...

.

إننا مهما تكلمنا عن الشعب المصري الأبي.. فلا نستطيع أن نعطيهم حقهم بالكامل... فأنا شخصيا عاشرتهم من خلال الدراسة من أساتذة وطلاب... حيث كانت المملكة العربية السعودية منذ فترة مضت كانت تعتمد إعتمادا كليا على الأساتذة والمدرسين من خارج السعودية ومن هؤلاء كانوا المصريين... لندرت وجود الوطنيين من يعمل في السلك التعليمي... وعموما ندخل في موضوعنا المطروح... فكانوا أولئك المصريين نعم الناس... من حيث التعامل والأخلاق وخفة الظل وووو.....إلخ.
وأيضا تعاملت مع الأخوة المصريين في أثناء العمل حينما كنت طالبا فكنت أعمل في العطلة المدرسية في مطار الملك عبد العزيز بجدة وذلك كان في موسم الحج... فقد كانت الشركات المعنية في خدمة ضيوف الرحمن... كانت تستقطب عمالة مصرية وتحديدا من منطقة السويس... وأيضا لقد زاملة مجموعة طيبة من هؤلاء المصريين فكانوا حقيقة ممتازين جدا في التعامل فيما بيننا كزملاء عمل.... وأخيرا بالأمس لقد ذهبت أنا وزميلي في العمل أحد الإخوة السعوديين إلى المطار لإستقبال أحد الشباب المصريين وهو من أرحام زميلي... حيث تأخر هذا الشاب المصري داخل صالة المطار بشكل ملفت... وحينما خرج من الصالة كانت برفقته إمرأة عجوز مصرية الجنسية... حيث ظننت أنها إحدى قريباته... فإتضح أن هذه العجوز كانت داخل الصالة قد طلبت المساعدة من هذا الشاب للبحث عن أمتعتها... فلبى هذا الشاب المصري طلبها وخرج من الصف الذي كان واقف فيه ورافق العجوز للبحث عن مفقوداتها إلى أن وفقه الله في إيجاد مفقودات العجوز... وهذه دلالة واضحة عن معادن الشعوب... وأكتفي بهذا القدر... وأرجو أن وفقت في التعليق ولو بشئ بسيط...

[معتز الريح]

الحبيب صديق بلال ..
أضفاتك جميلة وممتازة من خلال معاشرتك لهم
ما أرمي إليه في هذا البوست هو ما ذكرته انت بمداخلتك
انت عرفتهم وزاملتهم وسكنت معهم ..

ما لا تعرفه أنني وقبل كتابة البوست
شاورت عدد من الناس ولقيت نفسي ما براي ..

وكمان الضدي كتير ..

[هشام السماني إبراهيم]

والله الموضوع حساس حبتين

خليني ادورها كمان في راسي وبرجع ليك

[خالد النور]

والله من أحسن الشعوب العاشرتها وكانو أجدع ناس
وأنا شخصيا لى ثلاثة أصدقاء مصريين والله يساوى تقلهم ذهب
أجدع ناس وأحلى ناس وأوفى ناس

[باسطه]

والله ياجماعة ماعارف أقول ليكم شنو لكن ياأخوي معتز الريح أنا واحد من الناس العاشرته المصريين ودرسته معاهم وسكنت جيرانهم وحالياً شغال معاهم في نفس مكتبي نحن 3 أنفار أنا والمدير المالي مصري والمدير الإداري بتاعنا مصري الناس الديل لخصتهم في 3 حاجات وبكل صراحه أولاً لسانهم حلو لدرجة إنك مابتفرز الكويس من الكعب وده منو خوفه ثانياً حدود علاقتم بيك بتنتهي بإنتهاء المصلحه ودي أكتر شئ أنا مابدورة ( شغل المصالح ) وثالثا ً بحبو السلطه والظهور دوماً بمظهر الشخص المكتمل الخالي من العيوب ( يعني بالدارجي كده الواحد فيهم لو شنو مابيعترف ليك بالخطأ لو كان مخطئ فعلاً وهو بكون عارف روحو غلطان ) يعني ياجماعة كده بواضح العبارة ومآتأخذوني على العبارة دي لأنو بصراحه كل الناس الكتبو في البوست ده شكروهم ومافي زول ذكر عيب واحد وأنا عن نفسي وعن سابق تجارب ومعاملات عديدة معاهم طلعته بحاجه واحده إنو أنا بكن ليهم كل كراهية وأنا آسف على الكلمة لكن ده إحساسي تجاههم وبالرغم إنو فيهم الناس الكويسين لكن أنا بقيت مابضمن فيهم زول

[الفارس البنفسجي]

الشعوب العربية تتباين وتختلف في العديد من الصفات والموروثات الإجتماعية والقيم الأخلاقية وسنن التعامل الحياتي اليومي وهذا التباين هو نعمة قبل أن يكون نغمة.والشعب المصري مثله مثل غيره من الشعوب يحمل موروثاته وقيمه الإجتماعية والإنسانية بين جنباته وإن أختلفنا معهم في الكثير منها.هو شعب فروعوني أمتزج بالدماء العربية والإغريقية والرومانية والشركسية والطليانية والسودانية وغيرها من شعوب العالم .. فكانت مصر ، ذلك النسيج الإجتماعي التوأم للسودان.وإن تبعادت المسافة في حين وقربت في حين آخر.
مصر هم أم الدنيا .. هي ام الدنيا بعلمها .. وحضارتها .. وشعبها .. وبما قدمته للعالم العربي والإسلامي والعالم أجمع .. هي محط أنظار العديد من العوالم. سافرت كثيراً إلى مصر ... عاشرت كثيراً من رجالاتها .. قرأت كثيراً من ثقافتها ... طالعت العديد من خبراتها. فوجدها أهلاً للقب أم الدنيا.

اخي معتز
دا نص الكباية المليان.

[المهاجم]

شكرا لك اخى معتز على الموضوع
واسمح لى ان اخالفك الرأي
فعندما يكون الحديث عن شعب فهذا لا يعنى افرادا انت عاشرتهم فى فترة ما
اخى الشعب المصري للأسف شعب انانى وعميل الم تدرى بما فعله السادات فى فلسطين
الم تعلم ان مصر اول دولة عربية تطبع علاقاتها مع اسرائيل وكلنا نعلم ماهى اسرائيل بل واقامت لها سفارة داخل اراضيها لكسب الود الامريكي ناهيك عن موقفها من القضايا العربية والاسلامية
اخى للاسف المصريون اصبحو بلا هوية وبلا رأى واصبح شعارهم المصلحة
الم تشاهد اخى الافلام المصرية الداعرة والتتي مهدت للاباحية التى نعيشها الآن
اخى هذا قليل من كثير مما اعلمة عن الشعب المصري
ولك منى خالص الشكر والتقدير

[معتز الريح]

والله الموضوع حساس حبتين
خليني ادورها كمان في راسي وبرجع ليك

الحبيب هشام ..
الموضوع حساس أكتر من حبتين ..
دورها كويس وتعال ..

[معتز الريح]

والله من أحسن الشعوب العاشرتها وكانو أجدع ناس وأنا شخصيا لى ثلاثة أصدقاء مصريين والله يساوى تقلهم ذهب أجدع ناس وأحلى ناس وأوفى ناس

الحبيب خالد ..
ممكن سؤال ..
قبل ما تعاشر الناس ديل ..
ممكن توريني كان فكرتك عن المصريين شنو؟
منتظر إجابتك

[معتز الريح]

أولاً لسانهم حلو لدرجة إنك مابتفرز الكويس من الكعب

الحبيب باسطه ..
انت ما سمعت بالمثل البقول "المصري زي السجارة تكيفك لكن بتضرك"
وأنا بقول ما كلهم سيئين .. ونحنا ما كلنا كويسين ..

[تايقر]

بتتكلمو عن المصريين الواحدين ديل ولا مصريين تانيين

[معتز الريح]

والشعب المصري مثله مثل غيره من الشعوب يحمل موروثاته وقيمه الإجتماعية والإنسانية بين جنباته وإن أختلفنا معهم في الكثير منهاوبما قدمته للعالم العربي والإسلامي والعالم أجمع .. هي محط أنظار العديد من العوالم. سافرت كثيراً إلى مصر ... عاشرت كثيراً من رجالاتها .. قرأت كثيراً من ثقافتها ... طالعت العديد من خبراتها. فوجدها أهلاً للقب أم الدنيا.

اخي معتز
دا نص الكباية المليان.

كتر خيرك يا ضياء ..
انك عاينت للجزء المليان ..
وكلمة حق تشكر عليها ..
لكن انت ما ملاحظ معظمنا بحكم عليهم من غير دراية بهم
أو يكون سمع من الناس ..