ياكــــــــادح
بتطلع من صباحاً ضو
وفي جواك شايل الهم
فطور الشفع الغالي
وغداهم مافي طوالي
وعشاهم ..
بي تعب بتلم
مرتب ما بكفي الكم
توزع فيهو بالحته ..
مية بشيلا سيد البيت
ومية تسيبا للكنتين
وياسيد اللبن وينك
مرقنالك ..
تقول خمسين
رسوم الروضة زي تسعين
كراريسهم كمان بالدين
ويا حليلو المرتب كم
وفي العيدين !!!
تكوس اللبسة والاتنين
وما بنفع كلام الدين
ويا ربي العيال هم كم ؟؟؟
فصول القصة ما تمت
هديك راجياك ام العول
تيابا قديمة ما الموضة
وبناطلينك ..
وسيعه خلااااص ..
وبي شد الحزام تتلم
وفي جواك شايل الهم
تعال اسمعني يا كادح
وما سني التحُكْم النم
لسة الدنيا بي خيرها
وفصول القصة ما بتنتم
ولو طال الفقر بالناس
ولو تعبت جباه الشُم
دي الجاياكَ من الله
ورب الدنيا ما بظلم
رد مع اقتباس
المفضلات