قبل كم يوم كدا صاحبى .. عرف إنو أنا على مشارف أبوظبى وقال لى فى التلفون بعدما تخلص إمورك
تعال لى ضرورى عند ناس فلان . ومشيت ليهو وأمام الباب قال لى
الجماعه دول جابوا ليهم ( فكى ميه الميه ) من السودان وانت مليان عوارض ومردوم عمل , ياخى إنت هسى ليك من السودان كم سنه ؟ دا براهو والله عمل
والله بخره بخرتين تشوف شوف جد
حاولت أتملص منو وما قدرت .. أقنعنى ودخلنا وسلمنا و الفكى سألنى كم سؤال
وقال لصاحبى .. بطرف حديث كدا .. صاحبك دا ببخره واحده بيدوّر
ودخلنا غرفه صغيره وجاب مبخر قدر كدا والجمر يشطشط وإتكيت على السرير وغطونى ببطانيه
والفكلى رمى بخرتين والله مع شفطة أول نفس أنا قلت النار ولعت فى حلقى
وهو ضاغط على رأسى ويقرأ والجماعه متلمين حولين السرير .. وبقيت لا قادر أتنفس ولا قادر أكتم النفس والفكى قال لى أخرج .. أخرج .. قلت ليهو هو شنو اللى يخرج والله ماشايف شئ
وكلامى دا ما عجب الفكى وزاد البخرات وقال كدا الدخان بقى تُكل والحلق نشف والقحه والدموع
ولما بديت أتململ علشان أرفع البطانيه علشان خلاص بالجد بقيت ماقادر قال ليهم أمسكوهو
والجماعه ماقصروا عمتونى عمت جد والله أنا قلت لنفسى خلاص دى النهايه خاصه وأنا عندى حساسيه
والفكى يزيد فى البخرات .. كيف يفشل قدام الناس ولقيتو كلما يقول لى أخرج وأقول ليهو هو شنو اللى يخرج هو يزيد البخرات والدخان يبقى دخان قطر
أها .. قلت ياولد مالك ومال كدا أكسر شمال وريحهم وريح حالك علشان تتخارج سريع من التُكل دا
ويلا .. سكنت وسكت شويه وقلت ليهم .. أمسكوا المره .. المره بتدفن فى عمل
وصاحبى نط وقال .. أمك مسك ..
وكلهم إتلموا علىّ ويقولوا لى شوف هناى مالو ؟ وأنا أطلع ليكم بيهم الجو
هناى ؟ ياحولا دا مردوم ردم جد والفكى يقول بتخرج ؟ وأنا أقول ليهو أيوه ويقول لى كيف وأقول ليهو بالرجل الشمال ويقول لى .. أنفض .. وأنا أقعد أشوت فى كرتونه جمبى هع هع هع هع .. نفض جد .
أى زول سألونى منو طلعت فيهو مصائب بالكوم وأنا لا شائف شئ ولا يحزنون
والفكى فرّ شنباتو وإتكيف وسألونى عن صاحبى وقلت ليهو أى كورنه فى بيتكم فيها عمل
خاصه السبلوقات فى رأس البيت .. أها .. بعداك فكونى ومشيت مع صاحبى بيتهم
وطلّع الموبايل وضرب تلفون السودان الساعه تلاته صباحاً وصحّى أخته من النوم وقال ليها بكره من النجمه
تحفروا رأس البيت وأى كورنه وح تلقوا عمل مدفون والكلام دا موثوق وأنا أضحك فى سرى
يا كدا يا كنت ح أفطس ... غلطان عليكم الله ؟
رد مع اقتباس
المشاركة الأصلية كتبت بواسطة فتحي همام
المفضلات