مرض الطفلوله ( البرجم )

[ود المطامير]

الله يخليهو لى حبيب قلبى ود النور أبونظارات
أوحى لى بالفكره .. مرض الطفوله .. دا عيا حق شفع والشفع بقوموا بيهو سدارى
شجن لطشتو من المدرسه رقدت يوم واليوم التانى قامت نصيحه والبرجم قاعد بس هى ولا شغاله بيهو وناولتو لعمرو .. عمرو .. أكلو ساااى سواقه بالعجله وناولو لعمار الصغير وعمار دا من أدخل البيت خلاص سيك سيك معلّق فيك يا بابا وأنا خاتى فى بالى أنا برجمت زمان وأنا متزكر إنى برجمت زمان ومسحونى بقريرة البحر .. لكن الظاهر كان برجم ( كاذب )
ولطشنى البرجم .. لطشة عدوكم إن شاء الله .. فرِِِِد طقّه واحده ود المطامير القوّى داك
قعد ينونى تحت البطاطين خمسة أيام كامله .. حمّه تفك اللحام ... برد يجمد البصاق فى الخشم
و الوش السمح داك .. هع هع هع هع .. يا حليلو .. عوار عوار .. والعجب الجضميات
والكاروشه ما تدى الدرب .. والعجب لما أكون ماشى أجيب كيس تمباك فى الشارع أتحك بالحيطه ذى الغنمايه التقول صُبابى بالكوم ..
غايتو .. البرجم فى الكبر عذاب وجحيم , والبرجم زمان حظو واللى ما برجم يشيل شيلتوساااى

[naz_imam]

حبيب قلبى ود المطامير ازيك وتسلم انت من كل شر بس والله خوفتنى خوفه انا عندى البنت لطشتو من المدرسة برضوا ليها تلاته يوم بس على خفيف يعنى فى حمى مع العلم انا ماجانى وكت كنت صغير وهسة وانا واقف فى الصف قالو مدة الحضانة اسبوعين قلت ممكن يجينى على خفيف بس كلامك بقى كتر وماطمنتى ، قايتو لو جانى بحكى ليك ولو ماجانى بضحك عليك خلينى متحفظ هاهاهاهاهاهاهاهاهاها

[نزار حسن محمد]

ودالمطامير
كيف الوش اصبح ..
ندق النحاس ونلم الناس
سمعت تحت ..تحت قالووو
الوش صار دلوكه ...
كلم الادمن اجيب لك معاه
طين بحر من جنب الراكوبه

[okasha]

كدى يا جماعة اتخيلوا



مع البرجم ود المطامير مسكتو قوبة!!!!!!!!!!!!!!!!

[okasha]

بعدين ياجماعة ما تكلمو ناس من برة المنتدى

يقومو يخافو من العدوى مايعتبو منتدانا

[ود المطامير]

حبيب قلبى ود المطامير ازيك وتسلم انت من كل شر بس والله خوفتنى خوفه انا عندى البنت لطشتو من المدرسة برضوا ليها تلاته يوم بس على خفيف يعنى فى حمى مع العلم انا ماجانى وكت كنت صغير وهسة وانا واقف فى الصف قالو مدة الحضانة اسبوعين قلت ممكن يجينى على خفيف بس كلامك بقى كتر وماطمنتى ، قايتو لو جانى بحكى ليك ولو ماجانى بضحك عليك خلينى متحفظ هاهاهاهاهاهاهاهاهاها

حبيب قلبى .. مشتاقين ..
تسلم وتسلم بنتنا وربنا يشفيها ويديها العافيه
عارف ؟ لو لطشتو منها تأكد .. عيونك الإتنين بلفّو شمال
ومرات مرات كدا ح تشوف أسود وأبيض بس
إن شاء ما تلطشو بس لو لطشتو إسبوع ما ح تقدر تحكى
هع هع هع هع

[ود المطامير]

ودالمطامير
كيف الوش اصبح ..
ندق النحاس ونلم الناس
سمعت تحت ..تحت قالووو
الوش صار دلوكه ...
كلم الادمن اجيب لك معاه
طين بحر من جنب الراكوبه

هع هع هع هع
أبوسفروق .. معالم الوش بدت ترجع
لكن بعدما الهنود جننونى جن بالسؤال
رفيق شو هذا ؟ رفيق شو هذا ؟ وأنا أشرح
والجزيره فيها ألف هندى
أسمع .. مافتشت ليك للخواجه الشاكلنى داك
قلت أمشى ليهو وأضمو قوّى وأعتزر ليهو وأسلم عليهو
عشان أعاديهو بس عرفها من شافنى من بعيد شتت
هع هع هع هع

[ود المطامير]

كدى يا جماعة اتخيلوا



مع البرجم ود المطامير مسكتو قوبة!!!!!!!!!!!!!!!!

هع هع هع هع
شكيت محنك كتلتنى بالضحك
قوبه ؟
عارف حبوب البرجم اللى فى الرأس بالهبل
والحبه قدر البليه .

[اسامه حسن مصطفى]

العزيز عروه
الحمد لله على سلامتك ونــاس الجزيره والخــواجه والهنود ديل كلهم كرامتك وكمان نحن معاهم .
الحقيقه يا ود المطامير اجد نفسى دائما سعيدا فى اى بوســــت سواء كــنت فيه كــــاتبا أو متداخلا لما تشــع فيه من فكاهه وطرافه وايضا لطرحك لكل مداخلاتك بالهجه الدارجيه الجـــميله بكل سلاســــــه و اريحيه وامتاع .
شفاك الله اخى ويديك الصحه والعافيه و دوما معنا

[عزيز عيسى]

ود المطامير،

يا زول الحصل ليك شنو؟
قلت لي عندك برجم؟
دا من سف التمباك الكثير..

[ود المطامير]

العزيز عروه
الحمد لله على سلامتك ونــاس الجزيره والخــواجه والهنود ديل كلهم كرامتك وكمان نحن معاهم .
الحقيقه يا ود المطامير اجد نفسى دائما سعيدا فى اى بوســــت سواء كــنت فيه كــــاتبا أو متداخلا لما تشــع فيه من فكاهه وطرافه وايضا لطرحك لكل مداخلاتك بالهجه الدارجيه الجـــميله بكل سلاســــــه و اريحيه وامتاع .
شفاك الله اخى ويديك الصحه والعافيه و دوما معنا

أخوى الحبيب .. أسامه حسن مصطفى ..
تسلم والله يا حبيب على الشعور النبيل والكلام الحلو اللى بيرد الروح
ويسعدنى جدا إنى قدرت أدخل السعاده ولو قليلا فى قلوبكم ودا فضل من ربنا ..
وكلامك عنى شهاده أعتز وأفتخر بها جدا
تسلم وماتشوف شر إن شاء الله

[ود المطامير]

ود المطامير،

يا زول الحصل ليك شنو؟
قلت لي عندك برجم؟
دا من سف التمباك الكثير..

هع هع هع هع
زولك مغالط؟
حبيب قلبى مشتاقين والله

الحصل لى .. لطشنى برجم خلانى أنكرش ساااى
ومتبلم بالشال ذى الحرامى

[البنفسجي]

ها زول يا ود المطامير

الداهي دا جبتو من وين

الظاهر عليك قاعد تمشي تلطش شفع الروضة والمدرسة

تشيل مصاريفهم حقات الفطور عشان كدي مسكك

محمد معانا ما تغشانا ,

أقول ليك قوله أمش كماين الطوب في البحر

وشوف ليك حوض جاهز وأغطس فيهو لكن في حاجة واحدة

بس خلي يديك مارقات برة عشان لمن أجي العجان شايل

الطورية أشوف يديدك مارقات وما يقوم يطقك بالطورية

بس تاني بطل اللطش دا

نتمني ليك الشفاء العاجل من البرجم

فتك بعافية

[عثمان جلالة]

حبيبنا ود المطامير .. عافاك الله .. والبوست دا أنا ما خشيتو إلا بعد لبست كمامات ... وجونتيات ... ههههه ... تعرف تمشي تفتش ليك في الجزيرة دي شجرة نيم ... تقطع منها فرع صغير ... وتشيلوا ... تورق الصفق .. زي وريق الخدره .. وتغليهو في مويه ... وتستحمه بيهو ... تاني يوم بتقوم نصيح ... أسأل مجرب

[ريانية]

ما بسألك لكن يا ود المطامير لكن عمل فيك عمايل البرجم دا
بس عليك الله صور روحك علشان نشوفك عامل كيف وما تعادينا
الف سلامات ليك والله..

[nehroo]

اههههي هههههه
وشك بقى زي طربيزة اللحام
أعمل ليه كريم طين بحر

[okasha]

حبيبنا ود المطامير .. عافاك الله .. والبوست دا أنا ما خشيتو إلا بعد لبست كمامات ... وجونتيات ... ههههه ... تعرف تمشي تفتش ليك في الجزيرة دي شجرة نيم ... تقطع منها فرع صغير ... وتشيلوا ... تورق الصفق .. زي وريق الخدره .. وتغليهو في مويه ... وتستحمه بيهو ... تاني يوم بتقوم نصيح ... أسأل مجرب

الزول عندو برجم تقول ليهو اسال مجرب

[ود المطامير]

ها زول يا ود المطامير

الداهي دا جبتو من وين

الظاهر عليك قاعد تمشي تلطش شفع الروضة والمدرسة

تشيل مصاريفهم حقات الفطور عشان كدي مسكك

محمد معانا ما تغشانا ,

أقول ليك قوله أمش كماين الطوب في البحر

وشوف ليك حوض جاهز وأغطس فيهو لكن في حاجة واحدة

بس خلي يديك مارقات برة عشان لمن أجي العجان شايل

الطورية أشوف يديدك مارقات وما يقوم يطقك بالطورية

بس تاني بطل اللطش دا

نتمني ليك الشفاء العاجل من البرجم

فتك بعافية

حبيب قلبى
هع هع هع هع هع
مادام الحكايه فيها طوريه ولطش
أعفينى هع هع هع هع

[abu_ola]

الأليف عروة

خرف الكُـــــبر عرفناه و قلنا معليش

بس الطفولة المتأخرة دي شنـــو

شفاك الله حبينا و جعله أجر و عافية و متعكم الله جميعاً بالصحة و العافية

زي ما قال ليك د/ عثمان جلالة عليك بصفق النيــــم بس ما تعمل لينا فيها جعلي و تقوم تستعجل الشفاء و تأكل النيـــم و كتــر من الميك أب بتاع طين البحر