مصطفي جارنا في العماره الثانيه متزوج صديقة حرمنا المصون مثال للشخصيه الثمجه والتي تفرض نفسها بالقوه اتهرب انا دائما من مقابلته والجلوس معه ما لم اكون مضطرا لذلك كمان لا تربطني بيهو علاقه عشان إكون صديقي العلاقه كلها علاقة نسوان.... فعلا متزوج من زوجه رائعه .. طيبه .. حساسه .. كريمه.. بت ناس.... مصطفي افرض نفسوا عليك في اي وقت عايز تنوم ادق جرس الباب مع زوجتوا ادخل البيت الله احلك منوا... ونستوا بايخه جدا الغريبه عامل فيها ظريف ما حصل قال نكته ضحكتني تشوفوا مع زوجتوا وحرمنا المصون إقول في النكت والحريم اضحكوا لما ادمعوا نوع النكات البحكيها زي دي :
مرة واحدة بتقول للثانية:انا زوجي نساى شديد كل مرة يقول لى وين مفتاح السيارة وين مفتاح المنزل.الثانية قالت لها: يا بختك انا زوجي يقول لى:انا شوفتك وين قبل كده. والنسوان اضحكن بالله دي نكته اخونا مستمر في النكات البايخه ...... في راجل قال لي زوجتوا كان مت ازوجي جارنا , قالت ليهوا ليه ؟ قال ليها باع لي سياره وغشاني انا عايز اغشوا بيك..... انا اكون قاعد زي الجماد اعاين ليهم احيانا القي لي مجله تخارجني من بياخة الزول ده ... بعد ما اتوكل علي الله ويمشي مع زوجتوا المدام تقول لي ليه بتتعامل بايخ كده مع مصطفي ده راجل ظريف وطيب علي نياتوا زول بسيط لو ما زول بسيط حسي بكون متوافق مع امال دي شغلها الكثير ده كل مره في المستشفي ... انا اقول ليها ما تفرضي علي علاقاتك..... انتي عشان امال دي صاحبتك انا اصاحب الزول الثمج اللايوق الانتهازي ده انتي احمدي الله انا البجاملكم الزول ده ما بدورو لي الله.....
امال زوجت مصطفي شغاله طبيبه هي في العمر تكون قدر مصطفي او اكبر منوا بي خمسه / اربعه سنوات.... مستوي الجمال عندها وسط يعني مقبوله... الطيبه والخلق الحسن مغطي علي الباقي.... عندهم ولد صغير شقي بتاع مشاكل .... من الحاجات الثقيله البتكرهني فيهوا نهاية الاسبوع نكون طالعين خارج المنزل اجيك في لحظة عايز تقفل باب الشقه اها يا جماعه جاينكم نمشي معاكم الحديقه انتو نازلين تحت .....امشي طوالي لي عربيتك...... اقول ليك اسمع احنا بنركب معاكم العربيه بتاعتكم كبيره .....بدون مقدمات ولا انتظر ردك امسك يد الباب بتاع العربيه بعدين بجي جاهز اول ما ركبتوا العربيه اطلع من جيبوا شريط كاست أو سيدي يا ابو الشباب ممكن تركب ده يقعد اجتر في الزكريات مع امال تزكري الاغنيه دي لما كنا وين ما عارف يا روح قلبي...... والاغنيه الثانيه دي لما اتصلت عليك يا عيوني والله يا حبيبتي زكريات... بعد ما نصل المحل الماشين ليهوا كان في دفع قروش تلقي اتاخر شويه أو ياخذ ليهوا زوغه بعد ما تنتهي اجي اقيف جمبك اعمل فيها ظريف شنو يا ابو الشباب خلاص ولا عايزين حاجه والله انا مشيت الحمام كمان عندوا حركات كثيره بزوق بيها إختلق ليهوا حاجه مع ولدو إعمل فيها بصلح ليهوا في البنطلون والجزمه بمجرد انت ما خلصته دفع القروش اكون هو خلص.... زوجتوا حساسه مره تخطف رجلها بسرعه تدفع قدامك بس لو كانت المصادفه سواء في شباك الدفع طبعا الواحد ما بخليها تدفع ... تنتهي الرحله نرجع انا والمدام للنقاش الدائم.. هو ثقيل .. مرتو طيبه هو ثقيل .. مرتو طيبه .. دوامه.
يوم المدام قالت ماشه لي امال عشان مسافره السودان سته شهور ولدها السنه الجايه بخش المدرسه ما عايزه سنتين ترجع السودان..... قلت ليها الحمد لله نتحل سته شهور من الراجل الكفوه الثقيل ده لاكن المشكله كان الله احيانا السنتين الجايات ديلك كيف كان قعدنا في البلد دي..... المدام قالت لي حسي عليك الله الكعب فيكم منوا انت بي مساختك دي ولا هو الظريف مع امال يوم واحد ماشفتوا قال ليها بي اسمي كلاموا كلوا معاها يا حبيبتي – ياروحي – يا قلبي – يا نور عيوني.
سافرت امال وارتحنا... كل ما تجيب سيرة امال تقول لي عليك الله ما تعزم مصطفي ده غذاء انت ما عندك زوق كده مالك.... انا من ما اشوف مصطفي في الشارع ازوق منوا اعمل ما شايفوا... اخيرا كنا راكبين سواء شافت مصطفي جمب الاشاره قالت لي اهو عليك الله تعزموا قلت نلبي ليها رغبتا ... يا مصطفي يا مصطفي ... زولنا ما جاب لي خبر سامعنا ابا اتلفت علي ... قلته رضينا بالهم الهم ابي ارضا بينا....
انتهت السته اشهر انا نسيت الجماعه دخلت برامج تانيه.... جاي من المكتب دخلت البيت سامع صوت ونسة حريم رجعت وراء تاني دقيت الجرس ودخلته جاتني المدام قلته ليها معاكم منوا قالت لي تذكر مصطفي قلته ليها مصطفي منوا انا بعرف كم مصطفي قالت لي راجل دكتوره امال البتكرهوا انتا داك القلته ثقيل... قلته ليها ااااااااااااه زوجتوا جات البرنامج تاني عايزه تبدي لي سبحانه الله السته شهور دي زي السته يوم انتهت.... قالت لي ليك حق تكرهوا فعلا ثقيل وثمج وانتهازي زي ما بتقول... هي يا بنات امي امال والله مسكينه ما لقتوا عرس فيها يعني النسوان ديل تاني الواحده ما تعمل خروج وعوده سته شهور ولا شنو.
رد مع اقتباس
المشاركة الأصلية كتبت بواسطة بت أم درمان
المفضلات