الاخوان الاعزاء ها نحن نطوي صفحة لنأتي بأخرى .. مع امنياتي الصادقه بأن يتم التناول لهذه القصيدة بالنقد البناء كعادتكم دائما وان تتفاعلوا معها .
وهى قصيدة
المغرور سيد الاسم
الكاتب : ابوخالد
البدعة إنك لما تزعل
بتحرد عديل وتشاكلن
متعود على الدلع الكتير منهن
عارف كمان ريدتن ليك بتوردن
حتى باعوضنا داك بيقيف معاك وبيسهرن
والحمىء أم بردآ شديد بتجهجهن
ده كلو فى ريدتن ليك بيسعدن
*********
وقتين تنحسر بتقيف بعيد بتخاصمن
بتخلى بس خورآ صغير ... بيزكرن
إنك إنت برضو موجود بينهن
بيمرقن يجارن دقيش يدافرن
إلا الفاضلة ديك بالحيل بتعرف تسبقن
عارفاك وقتين بتزعل مين تكون متكاملن
*********
تمشى تترصد خطاك فاقدا إحساس الفتر
تصل( الحوش) عديل بتبارى بى درب القطر
تشب وتتاوق بالحيط قالت تنتظر
كاتماهو ريدا فى الحشا قايلاهو سر
شويتين كمان تقيف تعاين بالحيط راجياك تمر
ومن بعيد ظهرن حبيبات قساك شمآ خبر
جات (أم سنط) وجات (بت طه) ديك سايقا (الكمر)
جات (بت هجو) قايدا (التفاتيش) فى العصر
وبقية العقد الفريد ظهرن فجر
والفاضلة ديك تبكى وتنوح قايلاك بتدور تنتحر
وجن قيلن فى (الحوش) عديل حتى الفجر
مر يوم يومين تلاتة ....عديل تمن شهر
************
(حاج عبدالله)ذاتو لمن عرف جأ بيدور يضربن
لقى حالتن تب ما بتسر قال يتركن
هايمات عديل عاشقات وتايه فكرهن
(سنار) كمان ( خزانا ) داك جأ يكهربن
إلا إنكسر لمن عرف إنو الغرام هو الجارفن
حلف يمين .. يمين طلاق يحبس عديل الجنن
شويتين كده سمعوا صوت بوابات السجن
جاهن هدير قوى وشديد ...... راح كسرن
**********
إتواقن عرفوا إنو الحبيب هو الدشدشن
وقفن حداهو حلفن يمين ما يزحزحن
كان هو (الخالد الدفاق) خلى اليهرسن
وقتين وصل نيلنا داك وتب واجهن
فرمل عديل ... لملم هديرو وطبطبن
ساقهم عديل فى سكته وهو الماسكن
رجع الحنين الكان زمان ليهن كلهن
وبقى ذى زمان من خيرو الكتير بيلحقن
شربن كتير ورون كتير لى حدهن
والفاضلة ديك راح قلدا حتى الدميعات مسحن
يمشى ويميل تميل معاه..... شمال شمال ويمين يمين
**************
وقفت بعيد تودعه قاللتو (يالخالد الدفاق) اوعا تفارقن
ديلا إياهن حبيبات قساك ..... لا تخزلن
ولما إلتفت قاليها (يامدنى) حاشاى تب أتجاهلن
طول الزمن .... ياهن رفيقات المحن
عانن كتير .... شافن كتير وبرضو الله مصبرن
مناى من الله الكريم يفرج عليهن كربتن
يفرج عليهن كربتن ....... يفرج عليهن كربتن
************
********
****
**
*
خليك ربيع مليان زهور فتح ورودك واحضنه 
رد مع اقتباس
المفضلات