مع انفلونز الخنازير مشكله للبلوم في سلام الخدود “التقبيل” كمان المصافحه تبقي فيها مشكله خوفا من العدوي اليومين دي لو عطسته في وسط ناس تلقي الجماعه كلهم إعاينوا ليك بنظرات الخوف والحذر ده لو ما واحد مشي خلي ليك المكان والبقية واحد واحد مشو وراهو خوفا من انفلونزا الخنازير
قبل كم يوم مشيت احدي مستشفيات الرياض لمراجعة طبيب بخصوص البت الصغيره عندها حساسيه كان برفقتي الولد ايضا الغريبه كانت مواقف المستشفي شبه فاضيه مع العلم من الصعوبه تلقي ليك موقف في الايام العاديه سألنا بتاع السكيورتي الواقف بره قال قبل شويه جابو واحد فلبيني كان بعطس بشده في الاستقبال سألوا بتاع الاستقبال عندك شنو واقف واحد جمبو شمشاري قال ليهوا الزول ده بعطس كده الظاهر عندوا انفلونزا الخنازير ..... بالله المستشفي كلها قالوا قامت صوف اول حاجه البت الفي الاستقبال صرخت قامت علي حيلا اتنفضت شنطتها خلتها في محلالها بسرعه الباب الخارجي اي واحد اقابلا اقول ليها في شنو تدش ليهوا الخبر الناس الفي الطواري عندهم غيبوبه هربوا والمركبين ليهوا في خشموا بتاعت الاوكسجين قلعا ومشي كان الانبوبه خفيفه كان شالا معاهوا جهجه غريبه كمان الحاجه الاغرب من كده قالوا الفلبيني ذاتو البعطس جري مع الناس ما بفهم عربي لاكن حسي في خطر خاف علي نفسوا............ الزمن ده ما ننتهي من انفلونزا الطيور تظهر لينا الخنازير مع ضغوط الحياة بقينا مهجسين لو قابلك واحد وسلم عليك تمشي تغسل يديك ده في الشارع طيب لو اتصل بيك واحد عايز ازورك نهاية الاسبوع في البيت تعمل شنو تطلب منوا اجيك معاهوا شهادة صحيه بخلوا من الامراض بتاريخ الزياره معتمده من وزارة الصحه حكاية عجيبه.
اها قلته للاولاد ما دام جابت ليها انفلونزا نمشي بي حساسيتنا دي ما نلقط لينا حاجة تودينا في داهيه مع اشاعة المرض الجديد ده طبعا الاشاعه دي هنا مرتبطه بالفلبينين الناس اقولوا ليك عشان بياكلوا الكلاب والخنازير كل واحد اجيب من راسوا ... واحنا ماشين البت قالت عايزه تتعشي في ماكدونالز قلته ليها كويس اها دار حوار بين البت والولد قال ليها انت عويره تاكلي في ماكدونالز كلها فلبينين بعد شويه اتفقوا احسن نرجع البيت نتعشي مع ماما رجعنا البيت دخلنا اول ما فتحنا الباب المدام شافت ايدينا فاضيه لا دواء لا عشا استغربت سألت الحكايه شنو قلته ليها والله انا من جيت من الشغل طلعته طوالي مع الاولاد عايز استحمي ديل بقولوا ليك الحكايه..... دخلت الحمام بعد طلعته كان المكيف ضارب فيني عطسته اشوف ليك الاولاد والمدام جروا مني الغرفه التانيه ؟؟؟؟؟؟؟؟؟؟؟؟؟
رد مع اقتباس
المشاركة الأصلية كتبت بواسطة عباس الدسيس
المفضلات