اول مره اطبخ عدس اصرو علي اصحابي قي الميز (قبل ثلاثه اعوام )
قالو لي مافي اي طريقه بس تعمل لينا عدس .
اها طوالي ضربت لي اختي وحكيت ليها الحصل .
بقت شغاله معاي بالوصف وحته حته وشويه شويه لحدي القدحه
العدس طلع حاجه رهيبه وقدحة التوم في السماء .
الجماعه استمتعو جد واكلو اكل الوحوش .
بعد شهر قالو لي عاوزين منك حلة عدس زي بتاعة المره الفاتت .
حاولت ازوغ قالو لي مافي اي طريقه . قلت ليهم يا جماعه داك كان امتحان
وبشف من ورقه قداي برضو ما اختنعو .
المهم بعد شد وجذب بديت في الحله وكبيت العدس وختيتو في النار .
قريب نص ساعه الحله شغاله ورررررررررررررررررررررررر
انت يا العدس تعاين بعينيك ابا يموت نهائي قدر ما فركت الحله كأنو ماحصل شي
. بس وقعت ليك فيو بالجردقه اشيل وأكب اشي واكب لمن مات .
قلت اعمل قدحه عشان الجردقه ما تظهر لأنو عندها طعم ظااااااهر .
كبيت الزيت في الطوه وكبيت التوم وطوااااااااااااااالي كبيت الصلصه وصواتا جد
(لاقتكم غباوه زي دي ) القدحه بقت حاجه ملصقه وما مفهومه
تشبه حلاوه مندكو غايتو حاجه ما عندها اسم .
كشحت القدحه ومشيت غسلت الطوه . بعد تلاته محاولات عرفت القدحه وعملتها.
مشيت جبت دكوه كميه معاها سلطه قطعت العيش في صينيه وكبيت فيهو العدس
والصلطه والدكوه الجماعه ضربو ضرب صاح .
بعد الغداء خشيت المطبخ لقيت العدس عامل جماده ( الله يقطع الجردقه )
والله جماده تخييييييييييييينه حصل شفتو ليكم عدس فيهو جماده ؟؟؟
دي الجردقه الله يقطعك ويقطع يومك
طوالي شلت باقي العدس كشحتو وغسلت الحله
دا لو شافو زول من الناس الاتغدو ممكن تجيهو قرحه .
وحملت نجمتك الانيقة فى فؤادى
رد مع اقتباس
المشاركة الأصلية كتبت بواسطة تغريد
المفضلات