ست الشـــــــــــــــــــــــــــــــــــاي

[ضياء الدين احمد]

عندما تكون في مدينة ودمدني وتحديدا في شارع الصاغه او(الصياغ) والجو غائم لايخلو من بعض الرزاز وبروده لذيذه غير مزعجه تسري بأوصالك وبعض الناس تجدهم يحثون الخطي لأن السماء تنزر بالمطر وانت جالس القرفصاء في احدى (فرندات الصاغه) بجوار (ست الشاي) ترتشفه مع نكهة النعناع عندها تحس بأنك ملء السمع والبصر وبأنك السيد المطاع في زمانه !!!!

[ابو الدهب]

ضياء شوفت كيف السودان تحت المطر والرزاز هواء نقي
ولا اجمل من ريالات السعودة

وبالمناسبة انا سكنت في مدني الدرجة الاولي

[aborawan]

ضياء الدين ده خيال ولا كنت ف يالسودان قريب
رد الله غربتك وغربتنا

[ضياء الدين احمد]

اولا مشكورين اخواني ابوالدهب وابوروان على المرور ويا ابو الدهب سكنت جنب ناس منو في الدرجه اوعي تكون حبيت بناتنا
ويا ابو روان ده ما خيال دي لحظات عشتها قبل سنوات الاغتراب المره ويا لها من ايام

[عماد الصادق]

ياخي ذكرتنا مدني .. الحلوة .. وسوق الصاغة
وناس عبدالقدير .. (دفعة)
تحياتي .. أبوأشواق

[ابو الدهب]

سكنت عند عائلة ( عايدابي ) الطيب عايدابي
انشاء الله تكون عرفتهم وبعدين مالو لو حبيت
في الدرجة والله حبي شريف وما أجمل الحب
( في مدني )

[ضياء الدين احمد]

تشكر يا ابو اشواق ويا ابو الدهب عرفتهم ناس عيدابي وتسلم

[أبوريلان]

يالها من ذكريات ياضياء الدين تحياتى لك ولأسرة عيدابى بمدنى ولكل أهل مدنى الجميلة وأصحاب محلات الصاغة بمدنى حيث القفشات والنكات والضحك وحسنوات المدينة ذهابا وإيابا

[حنيني اليك]

تحياتي يا مبدع


والله ذكرتنا مدني وست الشاي والسوق والصاغه وحلويات الاحسان


تحياتي والى الامام دوما

[HAMADTO]

أدخل في مسام الروح
ودوزن فيني كلماتك
أصلو الروح وكت تشتاق
تدق باب الهوى الجابك
وتمرق في دروب الحي تفتش ليك
دق بابك



الرائع ... ضياء الدين ... ذكرتنا شباب الصياغ ناس وائل وحسن بكري (جدهم الزين) وناس كعوره ....
وناس جيركي قاعدين جنب ست الشاي الجنب بنك السودان

[امير عبدالباقي]

ايام لها ايقاع
فعلا زكريات جميله وانت جالس في الصياغ وتسلم من اول الشارع وتجد محمد حسن واولاد السناري وتجلس وتاخد وقفه ويمر عليك كعوره ومعاه جيركي شنو ياشباب الليله مافي فطور ويتبرع واحد ويمشي الي عمك كشك ويجيب الفطور الفول بالتونه ونجلس وتاخد لقمتين وكل واحد ماري يمد يده وتقوم تجري للكشك وتجيب عصير الشعير وتتحركو لست الشاي ومع الشاي يحلو السمر عن مباره امس وعن احوال الاهلي

[ابو المهتــدي]

بسم الله الرحمن الرحيم
والله مابقي ليكم غير كورة الشراب اعتبروها وصلت ودوروه دافوري

[خالد هاشم علي]

الغالي الرائع ضياء الدين العريس ( الزعلان مني).... كنت قاعد بنقب في منتدي ودمدنيات ولقيت درر من دررك ايام كنت شباب وعجبني البوست شديد وسرحت معاهو لاني من رواد البرندات دي ايام معهد الخليل وصيدلية الحضري ... الغريب في الموضوع يااخوانا انو البرندات دي وبي قدرة قادر لمت كل ناس مدني ... ونادر ماتلقي ليك زول ماقعد فيها.... وهي عبارة عن نادي مصغر يشمل كل حاجة حتي السياسة كانت تدار من هذة البرندات ( دكان الساعاتي محمد عثمان الفكي ) حيث انه من قيادات الجبهة الاسلامية يعني بتلقي فيها كل ألوان الطيف ( كورة ونسة ساااااااي سياسة اجتماعيات اخبار البلد كلها) وكما تسمع من بعيد صوت هاشم بتاع الجرايد بي قفشاتة المشهورة....... ياسلاااااااااااام ياضياء الدين والله الواحد يدفع نص عمره ويقعد قعده زي دي تاني...................

[ضياء الدين احمد]

الاخ الرائع الانا زعلان منو خالد ابوهاشم لك الود وزي ماقلت والله البرندات لامه كل الوان الطيف وكباية شاي جنب اولاد صلاح ابو ادريس بالدنيا كلها

[ابراهيم]

اخونا ضياء الدين وينك يا زول

الراجل دة من ما عرس اختفى ..

ما زمان شجعتنا

ابقى اظهر وطمنا عليك وعلينا

[elfatih61]

ضياء الدين 00 أثرت أشواقنا لمدنى الحنينــة وسوق مدنى البلم الناس كلها بي قلوبهم النظيفة وضحكاتهم البريئــة وحب وود كـده
بجمع الناس دى وبتجمعوا وبلتقوا مع بعض من غير معاد 00 لان سريرتهم نقيــه ونفوسهم صافيــة 0 وصراحـة كدا شاي السـوق
ده ليــه وضع خاص وجلســة خاصـة ومذاق خاص 00

أخر إجازة لي في مدنى كنت بعد الفطور الحاجـة تقول لي إنتظر أشرب الشاي 00 بقول ليها ما مشكلة أنا بشـرب في السوق
يقوموا ناس البيـت يضحكوا ويقولوا لي ( أوعى من الهكــوك ) !! أنا أقول ليهم ( الهكــوك ) ده شنو كمـان !! يقولوا لي ده
( الهكوك ده البنسيك أمك وأبوك ) بختوه ستــات الشاي في القهوة والشاي عشان الرجــال يفضلوا قاعديـن جنبهم وينسوا
أي حاجــة وما يكون عندهم شغله غير شراب الشاي والقهوة0 وهم يكسبوا 0

0 طبعا دى مجرد قفشـات كده أو مجرد غيرة بطلعوها النسوان في البيوت عشان رجالهم ما يقعدوا من ستات الشاي 0

( وأوعـــوا يا الماشين إجازات من الهكـــــــوك )

[عزيز عيسى]

يا ضياء وينك يا راجل..
آظهر وطمئن أخونا ابراهيم..
الراجل الظاهر عليه عايز يعرس
ويمشي محلات الصاغة يجيب الدهب
ويمر يشرب كباية شاي من ستات الشاي
الزول دا بنط من العرس لو إستمريت في غيابك.
تعال عشان يمشي إن شاء الله يودي قولة خير.
وشكرا لودهاشم على تبحت المواضيع الجميلة.

[نزار حسن محمد]

[SIZE=5]العريس ضياء لك الود على هذه البوست الرائع .. تعرف ياضياء بهذ البوست جمعتة ناس مدنى وكانهم جالسين باحدى البرندات .. وذى ماقلت ياضياء كل اهل مدنى تجمعهم هذه البرندات والله ياضياء انا رجعت لزمن بعيد بداية ببرندة الترزى عثمان ملك البناطلين فى الزمن داك بناطلين الشارستون و بعد ماتشترى الجزمه من محلات ساتا الخواض وبعدين تصلح الساعه فى البرنده وتخشى محل بابو الهندى عشان الريحه وكده وبالمره تدخل مكتبة الفجر ولا الوطنيه ومن هناك الواحد اشوق سوق الصاغه عشان امشى لبنك الادخار وفى طريقى للبنك كنت بدخل على الاخ عبد القدير لزوم اخر اخباروكان اهلينا ارجنتينا ... بالمناسبه انا مسافر قريب وذى ماقال الاخ ابرهيم الله ياستر من الهكوك مع خالص الود اخوك ودحسن[/SIZE]

[السلامى]

أظنك أخى محظوظ اليوم داك ما جات مع المطره كتاحه كان حتشرب شاى بنكهة الغبار مع رائحة سوق العيش وسوق الساتك وسوق العناقريب والجلود الزكيه

[معتز حمدتو]

عاوز اجدد ليك الشوقي عن ست الشاي بعد طول غياب بشاي عند النسابة
تحياتي ضياء وينك ياراجل من حر المطار ما نشوفك الا في ذكريات ست الشاي .

[خالد أحمد الصول]

طبعا أنا عندي حساسية من ستات الشاي
أول حاجة تديك وش حلو و ريق لذيذ بس .. أول ما تلبس وش الكرتون تلقاها الله يكرمك كانها حلبية ..
وطبعا ستات الشاي بتجمع حولهم مرافيد البوليس و المتعطلين و السماسرة .. يعني تلقي الواحده حافظة من القانون
ما يمكن أن تضر بيهو الناس و تأخذ من علاقاتها بالجماعة ديل أسواء ما عندهم من السماسرة العباطة و القطامة و اللذوجة و من
المتعطلين الاحتيال.. أحذر كل الشباب أولاد الناس منهم .. ما تقول لي الواحدة ظروفها .. و أخير تشتغل مما تعمل البطال و الله شغلها دة البطال بي عينو .. و غايتو ده رأيي

[محمد حسين (المميز)]

اخوي ضيــــــــاء الدين
اول حاجه طبعا خليتني سرحت مع ستات الشاي مش في شخصهم
لكن في طريقة السوق والناس زي ماقال ليك كل الشباب واللمه
والونسه وكل الحاجات الحلوه البسيطه الفي بلدنا وبقينا محرومين
منها بسبب الغربه..
فعلا مدني جميله بكل صعابها وشقاوتها لكن حلوه
الحاجه التانيه

الف الف الف مبروووووووك
على الزواج
انا يمكن مابعرفك
لكن على حسب كلامك ومكان سكنك الفي الدرجه التانيه
وكمان اسمك
عاوز اسالك انت ضياء الدين اللي اتزوجت بنت محمد خير اخت وسيلة وياسر؟؟؟؟؟
,,,,,,,,,,,,,,,,,,,,,,,,,,,,,,,,,,,,

[الجندي المجهول]

يا الضو يا ابو امسية البوست رائع جدا ويا ريت تتذكر معايا الفول في عمدة وبي جنبو طوالي باسطة سلا راجل المرة دا حلو حلا خلو الجمجرة ولك كل الاشواق يا غالي وبطل غياب وسلامي بلا حدود

[TARIQ]

طبعا سلامي للأخ ضياء الذي عرفته من هذا البوست الظريف و أنا لي صولات وجولات في هذه الفرندات و لنا شلة ظريفة أيضا كانت تتحفنا بالشعر و النكات وكل ما يشرح الخاطر ... أنا أصلا ما من مدني بس من الجزيرة ودرست في مدني ( جامعة الجزيرة - إقتصاد ) الدفعة من 1987 - 1992م وسكنت الدرجة جنب بقالة مطر وسكنت النشيشيبة وكنت في المساء أتسكع في شارع الدباغة و آآكل الأقشي و لا أنسى و أنا راجع النشيشية أمر على فرندة سينما رودي عشان الشباب أكيد حيسألو من الفيلم الليلة شنو ولازم يكون عندي رد .. وعلى طول هذه الطريق التي أحب أن أمشيها على الأقدام كانت لي صداقات .. بتاع الفول , بتاع الأقشي , بتاع الكوارع وكاسرة المواصلات ( الفرد ) و كانت كلمة يا ( فردة ) تتصدر قاموس مفرداتي المحببة ... تحياتي لمدينتي ( أم المدن في السودان ) مدنـي .... و لسة في كلام ...

[abosnoon]

الله علي مدني يا الله............................الله يرد غربتنا يارب.......................