قبل رمضان بفترة اسبوعين او اسبوع كان دائما يتم تجهيز دكه في الحي بالرمله ويتم تزينها بالطوب الاحمر من الخارج للزينة وايضا لعمل ساتر للرمال من الهروب من داخل الموقع ويتم يوميا رشها بالمياه اول يوم في رمضان قبل المغرب بحوالي ساعه يتم فرش السباتات وهي مصنوعه من السعف للجلوس عليها وذلك بعد رش الرمله وملء الاباريق للصلاة وغسيل اليدين بمناسبة غسيل اليدين وبما ان الذكري اتت امس كنت بشاهد في برنامج في قناة النيل الازرق اسموا حاجة كده عامرين مجموعه من البنات والاولاد قاعدين بشرحوا ليهم كيف يتم اعداد وجبة او طبق اليوم امس الحلقه ادهشتني كانت تتكلم عن استعمال الفوطه التي توضع علي الارجل قبل بداية الاكل بالمطاعم والمدهش جدا لدي انا ان الفوطه لها وضعيات خاصه ومتعدده وكثيره يصعب زكرها هنا ولاكن علي سبيل المثال لا الحصر لو قمتا من الكرسي ماشي وجاي ما تخت الفوطه في الطاولة فمعني وضعها في الطالولة انك خلصت الاكل... في حالة انك خلصت الاكل يمكن وضعها في الطاولة بطريقة خاصه في شكل مثلث وعلي شمال جلوسك بالطاولة كما ان هذه الفوطه لا يمكن ان يتم مسح الخشم او العرق بها الكلام ده حسب ما بتقول فيهوا اللبنانية مقدمة البرنامج في النيل الازرق واخيرا قالت ليهم الفوطه دي ما ممكن نربطها في جعبتنا ونرقص بيها يعني لها استعمالات خاصه...... دي ثقافة القنوات الفضائية في رمضان والحداثه مع اللبنانيين في نهار رمضان ... نرجع لي موضوعنا بعد حضور الناس لي دكة الفطور وبعد الاذان تلقي الناس بتنيش علي الصينية المدنكله يعين فيها ملاح روب سمح مع السمن وصلطه وشوية كسرة رهيفه مع العصيده شايفين الرفاهيه كيف الكلام ده كلوا بدون فوطه في الارجل .. احنا طبعا شعب كريم والدلال علي ذلك انو بنفطر في الشارع عشان نكرم الماشي محصل الافطار في بيتوا والزمن ضايقوا ومن شدة كرمنا حصل موقف لي واحد اخونا من اهلنا ناس الجزيره جاء السعودية قعد كم سنة كده ما مشي اهلوا كان شغال هنا في الرياض في سوق السراميك بعد ما اتملطش في البلد دي الله فتحا عليهوا ونزل اجازة بالطيران دخل الطياره قعد في الكرسي المضيفة كانت ظريفه معاهوا قفلت الدرج الفوق في راسوا معاها ابتسامه اها بقت ماشة وجايه صاحبنا اعاين ليها القاها مبتسمه طبعا فكر المسألة دي ليهوا هو براهو يعني دي ما طبيعة عملها قبل الطياره ما تقوم اخذت ليها وقفه تتاكد وتعاين للناس صاحبنا حلف طلاق ما اقعد في الكرسي لازم الزوله دي تقعد في مقعدوا عيب هي حرمه تكون واقفه دي من انواع الشهامة بتاعتنا والرجالة في واحد جمبوا سوداني لابس بدلة قعد اشرح ليهوا وإفهموا حكاية البنيه دي مع الوقوف شنو حتي قعد بعد شوية جات ماشة قدامه الاكل في طاولة الطيران المتحركه بعد الابتسامه والاسئله عن نوعية الاكل المتوفر لديها قدمت ليهوا الاكل بعد استلم الاكل طلع قروش من جيبوا اديها ليها.... بعد الاهتمامات من المضيفه..... حاولت تفهموا زولنا قعد احلف حرم تمسكي وواقف علي حيلوا تاني اخونا ابو بدلة عايز اشرح ليهوا حكاية الاكل عاين ليهوا وقال ليهوا هوي يا زول والله تفتح خشيمك ده كان ادفع للطياره دي كلها مالك ناطي لي كل مره عامل الداهية المربوطه في رقبتك دي زي لسان الكلب طبعا هو اقصد الكرفته الحمرا مع البدله ...... احنا شعب بسيط وكريم ما بتاعين فوط نكرم المضيفه في طيارتا
رد مع اقتباس
المفضلات