أحكي ليكم قصة مليارات أختنا مدنيّة؟؟؟!
حاضر
أختنا مدنيّة ماشاءالله من شدة ماقروشها كثيييرة , عاملين ليها خزنة جوة خزنة , وسعوا الخيال شوية كدة , وشوفوا معاي الوصف ده :
أول ما تجي داخل الخزنة الأولى ( وهي عبارة عن غرفة مستطيلة والطول * العرض * الإرتفاع = 4*3 *4 تقريبا كده ) , قدامك على بعد 3 أمتار حيطة عرضها من خلال إتجاه نظرك إليها مباشرة 4 أمتار , ويسارك على بعد 3.5 متر حيطة ودي عرضها 3 أمتار , وأكيد الباب في حيطة ودي عرضها 4 أمتار! كدة بقوا 3 حيِّط , نجي للرابعة , ودي يمينك وبتكون على بعد نصف متر من وقفتك في الباب , وعرضها متر , تمشي داخل لجوة , تلقى ممر ( ده بيبدأ مباشرة بعد نهاية المتر الأول للحيطة ) , الممر ده أكيد حيكون عرضو 2 متر , أما طولو 3 أمتار , طبعا وأنا داخلة على الخزنة حسبت ده كلو (ماشاءالله عليّ) , نجي للوصف التاني , واللي هو وصف محتويات الغرفة والممر , وفي نفس الوقت حأحكي ليكم قصة دخولي لأهم غرفة عند مدنيّة لدرجة إنها مركبة فيها .... لحظة أعرفوهو من خلال باقي القصة
طبعا أختكم دخلت وفي يدها شنطة صغيرة وفيها أدوات إقتحام ( جاية أسرق مدنية) وشايلة برضو جهاز لاسلكي (بتكلم بيهو مع أعواني في الإقتحام
) ووصلت الممر , وأنا بتفحص في الممر فوق في الحيطة اللي على يميني زي 3 نوافذ تهوية صغيرة ودائرية قطرها 20 سم تقريبا , والحيطة اللي قدامي فيها صندوق حديدي صغير محكم القفل , وداير ما يدور في الغرفة والممر في زي مواسير صغيرة جدا لونها أبيض على لون الغرفة والممر موصلة بالصندوق وهو أصلا جهاز إنذار! , وفي الركن اليمين على الحيطة جنب جهاز الإنذار في زي كاميرا للمراقبة , طبعا حتفكروا مدنيّة وين مني الزمن ده كلو ؟!!!
مدنيّة هي ومدير الشغل بيراقبوا فيني من خلال الكاميرا , وهي بتتكلم معاي باللاسلكي , وأنا بعمل في تجربة إقتحام للغرفة ومحاولة إيقاف لجهاز الإنذار ( لو جاء حرامي شفت عايز يسرق وقدر يتخطى كل الحواجز وكدة , لأنو جهاز إنذار الغرفة غير عن جهاز إنذار الخزنة الثانية واللي نسيت أقولها ليكم , ودي مكانها في الغرفة ( شفتو التفكير ده أول ما تدخل الغرفة بتلقى الخزنة على اليمين , وعلشان تفتح الخزنة لازم تدخل الممر وتمشي لجهاز الإنذار توقفوا لأنو التوصيلات ديك كلها علشانو والمواسير جواها أسلاك الإنذار وداخلة جوة وبرضو برة الخزنة) ده لو حرامي جاي يسرق المكان , أما لوحضرت مدنيّة هي اللي حتفتح الخزنة , عندها بصمتها وهي الوحيدة اللي ممكن تفتح الخزنة !) وبرضو بشوف لو في مشكلة في الغرفة , واحد من نوافذ التهوية فتحاتو الضيّقة مفتوحة بسيط , قلت لمدنيّة دي ممكن تساعد الحرامي برضو , وأثناء ما أنا ماشة للصندوق بشاغل في مدنيّة قلت ليها الليلة جاية أسرقك , قالت لي نحن بنربي فيهم!!!!!!
ومشيت وبطريقة فنية وحرِّيفة قدرت أنزل الصندوق , بتكلم مع المدير نظام بفكّر بصوت عالي وكدة : فتحت الصندوق ( الصندوق غايتو فيهو جنس حاجات وكثرة أسلاك وتوصيلات وألوان ) وهنا في سلكين بالأزرق وهنا في ........................................
فجأة صوت باب يفتح وصوت بينادي صليتوا ؟؟ قوموا صلّوا , طبعا أختكم صحت مخلوعة وقرّبت أسأل أمي أقول ليها صلاة شنو ؟ الصبح وصليناهو , لكن قلت يابت قبل ماتتكلمي شوفي الساعة كم ؟ لقيتها 12 والدقايق شفتها لكن ماركّزت , أصلو الحلم شتت تفكيري,المهم إنو وقت الصلاة كان مافات والحمدلله , والحلم ده عاجبني شديد , التقول فِلِم!!!!
رد مع اقتباس
المشاركة الأصلية كتبت بواسطة moram
المفضلات