شخصيات من عندنا

[درديري كباشي]

الشخصية السودانية وبشهادة الجنسيات الاخرى تتسم بالطيبة وفي ذات الوقت حدة الطبع .. هذا المزيج المتناقض انعكس على جميع شخصياتنا نحن السودانيون ... ولد فينا ما يعرف بالطيبة لدرجة العنف .. او الكرم العنيف يعني مثلا في المواصلات تتعرف على شخص ربما يكبرك سنا ولكن اول ما يصل الكمساري ليحصل المبالغ تدخل يدك في جيبك تجد قريبك او صاحبك نط بعنف شديد ومسك يدك . وحرم ما تدفع انا حلفت والله ما تدفع ... خلاص يا عم ما راح ادفع بس فك يدي ما تكسرها .... او تزور احد المعارف في عز الظهر مثلا توصل امانات .. تجد صاحب البيت ... او والد صديقك صاحب الامانات يحلف بجميع انواع الحلائف انك ما تخرج من غير غدا .. ودون ما يتاكد من اهل اليت فعلا انه في حساب لغدا ولا لا..لانه بالتاكيد غداء الضيف يختلف من غداء اهل البيت ... انا الان وعبر هذا البوست لا اريد ان اتحدث عن الصفات المشتركة او الموحدة في شخصياتنا السودانية ... لكن اريد ان اتحدث عن شخصيات مميزة منتشرة تقريبا في كل مجتمعاتنا .. بمعنى هم اناس يتسمون بصفات خاصة بهم وتقريبا تجدهم في كل مجتع من مجتمعاتنا .وهؤلاء الاشخاص او هذه الشخصيات ليست سالبه او مؤذيه بل بعضها فعال جدا ووجوده ضروري كما ان بعضها مزعج ويسبب غيظ وضيق الاخرين..
وانا لكي اقرب الصورة ساستعين باسماء خيالية ومستعارة من واقعنا وانوة .. الى ان هذه الاسماء لاتشير باي صورة من بعيد او قريب الى اشخاص حقيقيين اعرفهم ولو صادف احد من معارفكم تطابقة معه الاسم والشخصية قطع شك انا لا اعنيه لا اعرفه . والى الشخصية الاولى :
1/عمنا سعد مغالطة :
سعد مغالطة شخص ينبئ اسمه عن شخصيته ... فهو شخص يعتقد دائما ان الناس على خطا وهو الوحيد الذي يعرف الصاح ... واذا جرت المقارنة بين زمن وزمن قطع شك زمنهم هو الاجمل .. وكذلك بين بلد وبلد وبين نادي واخر .. ولانه شخص مدمن للمغالطة فهو لا يثبت على نادي كروي واحد ... وتشجيعه للهلال والمريخ مثلا يتوقف على عكس الوسط الذي يجمعه بالاخرين اذا كان الغالبية مريخاب فهو هلالابي او العكس تماما .. اكثر الاماكن التي يستمتع بها عمنا حسن مغالطة هي بيوت المناسبات حتى يتجمع الناس في والصيوانات ..
شباب الحي ادمنوا حضوره وتهييجه وذلك بطرح المواضيع التي تتقبل المقارنة .. مثلا في اخر بيت مناسبة ... نظر احد شباب بطرف عينه لحضور عمنا سعد مغالطة للخيمة وغمز بعينة لزملاؤه في اشاره لانه سيفتح باب الغلاط بموضوع جديد ...
وانتظر حتى اقترب من جمعهم وبادر الشاب ..
- انتو يا اخوان صحي في مجاعة في اثيوبيا والصومال وعمرها ما حصلت ..
عم سعد : السلام عليكم يا اولاد .. ها زول ها مجاعة شنو الماحصلت ... علي باليمين في سنة خمسة وتمانين جاتنا مجاعة هنا في السودان ..... يا زوول لدرجة انه الكلب دا كان عاوز ينبح فيك الا يتكئ في الحيطة ... تقولي مجاعة ماحصلت ... هازول ها .
- لكن يا عم سعد قال ليك الناس ديل لدرجة انهم حفروا بيوت النمل عشان ياخذوا مخزون النمل ...
عم سعد :: هم ما دام عندهم نمل معناها ما عندهم مجاعة ... نحن في الزمن داك النمل ذاته الا تقيف صف عشان تاخد لك كمشة نمل مقلي .. تقولي بيت النمل .
- لكن يا عم سعد الناس ديل بقو ضعاف بس تقول هيكل عظمي ...
عم سعد : يعني شنوضعاف نحن في زمن مجاعتنا ديك علي باليمين المره كانت عطست ساي الا تمسك في مرق الراكوبة عشان ما تطير .
احد اهل المناسبة يتدخل ... يا شباب انتو اتغديتوا ..
- الشباب ابدا يا الاخو لسع ما اتغدينا ..
عم سعد : لا يا الاخو الشباب ديل متغدين ...
- يا عم سعد مين القال ليك نحن متغدين ..
- عم سعد : علي باليمين انتو متغدين .
- يا عم سعد انت تغالطنا في نفسنا ونحن كان اتغدينا قاعدين نعمل شنو وعرفتنا كيف نحن متغدين .
- عم سعد : هسع جنس نضميكم دا وغلاطكم دا ما غلاط زول متغدي .
- يا عم سعد هسع انت ما غالطت واتكلمت اكتر مننا ..
عم سعد : هو انتو شفت كلام علي باليمن نحن كنا زمان الواحد يتكلم كدا جرة واحدة للصباح ..

والشخصية القادمة
صالح شلاقة
والشخص الشليق هو الشخص الملقوف كما يطلق عليه في منطقة الخليج والذي يتصرف قبل ما يتاكد من المعلومة التي وصلته .

[درديري كباشي]

قبل ما نخوض في قصص الملقوف او صالح شلاقة... هؤلاء النوع منتشرين تقريبا في كل المجتمعات ... وانا لي قصة شخصية معهم قبل عدة سنوات ... كنا نجلس شلة امام بيتنا في كسلا
فجاءه جاءاحد هؤلاء الشلقاء بعد ما سلم علينا بادرني كالتالي:
هو : شنو يا درديري ياخ كملتوا تراب البلد
انا : طبعا ما فهمت اي حاجة .... تقصد شنو كيف يعني ؟؟.
هو : يعني ميدانكم ردمتوه ردم صاح كل قلابات المدينة شغالة قصادكم ....
يعني انا يتخيلي لو كان القى امامي السلام الوطني الصيني كان فهمت اكتر من الان .. ولكن هو كل ما يحاول يشرح يعقد الموضوع اكثر ..
هو عندما شاف انه حيريتي زادت بدا يشرح ... ياخي الملعب بتاع النادي بتاعكم ما ردمتوه بالتراب عشان يكون عالي ..
اخيرا انقذ الموقف احد الجلساء ... وقال له ياخي انت فاهم خطا .. داك رئيس نادي الميرغني اسمه درديري الباشا ودا درديري كباشي ....وانفجر الجميع بالضحك .... وانا يمكن لو كان عندي فكره عن الردميه فقط كان فهمت قصده ..
صاحبنا بعد ثواني غلبه الجلوس وقال استاذن انا يا جماعة عندي ضيوف جايين الان .. وراح متخارج ...
*******************************************
اما اخينا صالح شلاقه فهو شخصية ساعدت فيها ربما بنيته الجسمانية النحيفة وخفة وزنه في انه يسمع نصف الخبر عند المصدر والنصف الثاني في الطريق وهو يريد ان ينقل الخبر ..... يقف شلة من شباب الحي امام الدكان كالعادة ...
تقف امامهم سياره ينزل ينزل منها رجل محترم ... يا اخوان انتو من الحي هنا .
- احدهم : نعم يا عمنا اي خدمه ..
الضيف : لا انا جاني خبر من السعودية الان انه خالد ولد حاجة فاطنة دي اتوفى في حادث بالسعودية .... ولازم تكونوا حذرين في نقل الخبر بالتدريج لانه عندها سكري مرتفع وخايفين يحصل ليها حاجة لو فاجاناها ....
طبعا الجزء الاخير دا كله صالح شلاقه ما انتظره ليلتفت الشباب فجاه ليجدوه فتح باب الحاجة فاطمة وبادرها بالفاتحة لتسقط متكومه في الارض مغمى عليها وتسعف للمستشفى ..

[درديري كباشي]

فخر الدين فشخره
عندنا نوع من الشخصيات في مجتمعاتنا يحبون التفاخر بكل ما يملكون وبما لا يملكون ايضا والتفاخر ماهو دعونا نخوض في شخصية فخر الدين ...
اوووو فخري كيفك وينك الزمن دا كله غائب (احد اصدقائه ) ..
فخري : تعرف يا ماجد اختنا جات من لندن وانا طول الفتره الفاتت دي كنت لافي معاها عايزة تشتري فيلا .. واصرت الا في الصافية ... وقدر ما حاولت اقنعها بالعمارات او الرياض او اركويت ... قالت لا مساحتها ضيقة وهي عاوزة حديقة ,,,,,.
ماجد : طيب ما كان تظهر مره مره فقدناك اها كيف ما حاتجي معانا الرحلة الجاية دي ..
فخري : بحاول لكن ما ضروري اجي معاكم في الباص ممكن هيثم ود اختي دا انا وهو نجي بالمارسيدس .. او الليكزس .... الجاهزة منهم .. انتو لسه مصرين على خزان جبل اولياء ....
ماجد : عندك لينا خيار تاني
فخري ما قلت ليكم تعالوا نمشي جنينة ناس عمتي في الكدرو فيها طبعا فيلا ومسبح وممكن نقضي يوم جميل ..
ماجد : انت ماقلت عمتك باعت الجنينة لمياردير سعودي بخمسين مليون دولار ...فخري: صحي باعتها لكن الراجل لسع ما دفع ولا استلم ..
لاحظ انه الونسه دي ممكن تكون في وسط كافتريا مكتظة بالناس او الطلاب في الجامعة مثلا .. وهو متعمد يرفع صوته بحيث يسمع حديثه من جميع الاركان .. لكن الحمد لله ظاهرة التفاخر في السودان غير منتشرة وسط الرجال كثيرا ونادره ويتخيل لي من النساء تكون خفيفة ومقبولة شوية ...
اذكر مره انا هنا في الرياض ارسلت لي اغراض مع زوجة احد السودانيين .. وانا شخصيا لا اعرفه ولكن ارسل لي رغم تلفونه برساله لكي اتصل به ....اتصلت وبدا يوصف لي في بيته كالتالي ..
اولا نحن ساكنين في شارع العليا العام حي الملك فهد (احد ارقى احياء الرياض ) ... تروح في شارع العليا العام لمن تصل اسواق طيبة (من الاسواق الفخمة ) تتوقف على يمينك في عماره كبيره مكتوب عليها عمارة العودة ... تلف من عندها تمشي زي ماية متر .. لاحظ علي يمينك ... تلاقي عربية دودج واقفة بالمناسبة العربية دي حقتنا تمشي منها زي خمستاشر متر تلاقي عربية كابرس واقفة .. برضو حقتنا ... تدخل مدخل العماره ... تلقى الشقة في الدور الثاني ......... وو رايكم شنو تفتكرو مشيت جبت الحلومر ولا قلت انسى ..

[مدنيّة]

عارف يادرديري
سعد مغالطة دا متفور بصورة مباااااااااالغة عندنا

بالله الواحد يغالطك × اسمك

[درديري كباشي]

عارف يادرديري
سعد مغالطة دا متوفر بصورة مباااااااااالغة عندنا

بالله الواحد يغالطك × اسمك

سلام يا ام جمال وكل عام وانتم بخير

ممكن طلب صغير لو سمحتي تدينا موقف من مواقف سعد مغالطة بطرفكم

[درديري كباشي]

اخوان العريس..
هم شلة من الشباب الطيبين الشهمين تقريبا موجودين في كل مدن السودان ... يحبون العمل الطوعي في بيوت المناسبات ... وخاصة الاعراس وخاصة عندما يكون العريس ذكر ... هم يمكن ان يتواجدوا في زواج البنت ... لوكانت البنت من حلتهم طبعا ..
اخوان العريس ليس بالضرورة ان يكونوا عطالى عن العمل .... لكن لايوجد اي عمل في الدنيا اهم من عرس فلان ... وفلان هذا مثل السين في الرياضيات يعني ممكن تكون انت ممكن اكون انا ممكن يكون غيرنا ...
انا احتكيت باخوان العريس كثير في السابق قبل الاغتراب عندما كنت اعمل مديرا لمطبعة كباشي بكسلا .... كان هؤلاء اخوان العريس تبدا رحلتهم الطوعية من طباعة كروت الافراح ..... يعني يجي العريس المطبعة لكي يطبع كروته وفي معيته نفر لايقلون عن عشرة اشخاص .... والطريف انهم يبداون يوزعون المهام على بعض دون ان يتلقوا اي اوامر او تعليمات من العريس نفسه ... يعني مثلا ...
طارق : انت امشي لعمك خضر بتاع الفرن واحجز منه الف رغيفة ليوم الخميس قل له حانجي ناخذهم منك يوم الخميس الساعة عشرة ..... استنى ماشي كدا ساي ما لازم تدفع عربون .... يلا يا عريس اطلع بمائة الف عربون بتاع الرغيف ...
وواحد تاني : يا عثمان انت امشي افراح المدينة احجزوا الصيوان والكراسي منهم وما تنسوا الحفاظات بتاعة الموية .... يلا يا عريس اطلع بمائتين الف بتاعة الصيوان ...
وتلاحظ انه اخوان العريس ما عندهم اي مساهمات مادية ... ولا حتى يدعي احدهم انه من سيدفع (يكشكر يعني ) .... ولكن يبداون في اجراءات الزواج دون مشاورة العريس بل ان على العريس ان يعرس ويدفع فقط ... ويوم ان ينخرب بيته ويسافر لشهر العسل ينصروفوا منه لعريس آخر ... اول ما يعود يستقبلونه بعباره فاتره .... شنو يا عريس ما بقيتو تلاته وبالمناسبة ... افراح المدينة قال حسابه ناقص خمسين الف ...... وبتاع البيبسي برضوا عاوز باقي حسابه .... العريس يقول باقي حسابه كيف ؟؟ .. هو البيسبي مش فضل نص ورجعتوه ؟؟ ... رجعناه شنو يا عريس ما تصحى معانا هو في بيبسي بيرجع تاني ... بعد ما انت سافرت عملنا بارتي حفلة وداع ليك ..
ساعود لباقي اخوان العريس لان مواقفهم كتيره

[مدنيّة]

تامر يادرديري

معانا واحد محاسب في الشركة

يوم استاذنت لليوم البعده اني ماجاية الشغل

اها اديت المحاسب دا ظرف مفترض يرسله بالدي اتش ال

لما جيت اليوم البعده ونزلت
سالته من الايصال بتاع الدي اتش ال "باعتبار انه مفترض ح يكون رسله"

اها قعد يقولي بالتقطعه انه ماشاف الظرف ابدا
وانه قالي اخليه في درجي انا
وووووو

اها قلت ليه خلا استهدي بالله وخلينا نفتش مكتبك
قالي اصلوووووووووو ما ح نلقاه
لو فتشناه لبكرة
لانه واثق تماما "علي باليمين بتاعتك دي"
مااستلم مني الظرف

يالله الله اقنعته اننا ما ح نخسر حاجة لو فتشنا

اها مع اول بحث في المكتب اطلع ليك الظرف المايغباني

غايتو قلت ليه تغالط الزول × اسمه ياسعد

[درديري كباشي]

عدنا لاخوان العريس
كما ذكرت انا لي عدة مواقف مع اخوان العريس او اصدقاء العريس . والذين قلنا انهم شباب شهمين متطوعين يقومون بواجبهم كاكمل وجه لاتمام اجراءات ومراسيم زواج اي شخص وهم منتشرون تقريبا في كل مدن السودان ... بل تجدهم يحضرون انفسهم للزواج المرتقب قبل العريس نفسه .... يعني مثلا قالوا عرس ركس دا الشهر الجايي ... تجدهم يدور بينهم حوار كالتالي :تعرف انا جاني قميص هدية خزنته للعرس ... وعندي مقطع بنطلون بتاع عماد اخوي حا اوديه الترزي .. وكدا انا اكون جاهز للعرس .... اها اونت جديدك شنو يا كشره ...... انا عندي تي شيرت كدا لبسته مره واحده ..وبنطلون جنز كان رسله لي عصام اخوي من امريكا ... وهكذا تدور حواراتهم في تحضير انفسهم لزواج مرتقب بعد شهرين .. في حين ان العريس نفسه ربما يكون لم يفعل شئ سوى انه خطب لكن كيف سيتم الباقي لازال راسه ضارب.
ومن مواقفي مع اخوان العريس اذكر في مطلع التسعينات كان زواج اخي الاكبر .. وقبل الزواج بيومين اكتظ بيتنا باصدقاء العريس او اخوان العريس كما سميناهم في الاول .. حين انا شخصيا شقيق العريس كنت مداوم بعملي بالمنطقة الصناعية بالمطبعة ... اما اصدقاء العريس كانوا يتجولون معه بالسياره في حملات التحضير ... في مروره علي بالمطبعة .. نزل احدهم بعد ان ركبوا السيارة وجاني ودار معنا الحوار التالي .
هو : يا ابو الدر ضروري لازم تشوف لينا شوال مليان نشارة خشب ..
انا: قلت حاضر يا درش .
وعاد مسرعا والطريقة التي طلب بها نشارة الخشب تنم على ان الموضوع مهم جدا .. لذلك ناديت اتنين من العمال وارسلتهم لورش النجاره جارتنا .. ولكن تفاجات بان العمال عادوا وقالوا كل ورش النجاره قالوا ماعندهم نشارة اليوم ... ما اكترثت للموضوع .. ولكن صاحبنا عاد مره ثانية .. وسالني يا ابو الدر حضرت لي النشارة .. قلت للاسف ما لقينا ... كيييف الكلام دا معقولة منطقة صناعية ما فيها نشارة خشب .. لازم ضروري تهتم بالموضوع حتى لو تتحرك بنفسك ... انا فعلا شعرت باهمية الموضوع .. وقلت لايمكن اكون سبب في (فركشة) زواج اخوي . حتى لو اشتري الواح خشب واطلب من النجار يفرمها لنا .. وفعلا سالت صاحب ورشة خشب قربنا عن سبب اختفاء النشارة .. وقال لي ظهرت منظمة تابعة للامم المتحده تعمل في مشروع الطاقة البديلة .. لذلك هم اصبحوا يشتروا النشارة من النجارين بدلا ما كان النجارون يحرقونها في الزباله ...( انا اعتقد ان عداوتنا مع الامم المتحدة بدات منذ ذلك التاريخ ) وعاد صاحبنا بتاع النشارة وانا شرحت له سبب اختفاء النشارة من الاسواق .. وسكت على مضض وهز راسه امتعاضا ومضى.. الحمد لله تم زواج اخي من غير نشارة .. وانا تابعت كل مراسيم الزواج من العقد الى ان سافر العريس الى شهر العسل .. ولم اجد اي موقع لاستخدام النشارة ... تاني يوم جئت لشلة اصدقاء العريس والذين كانوا لازالوا متجمعين في ظل الشجره امام البيت وسالت صاحبنا ... انت يا درش النشارة كنت عايزها لشنو ؟...
قال لي : رد بغيظ ما للتلج يعني حايكون لشنو .
الطريف في الموضوع ان الزواج كان في عز الشتاء والتلج ظل بعد الزواج يمكن يومين بدون ما يذوب وبدون نشارة .. ولا احد يحتاجه ولا يستخدمه ...لان الجو بارد جدا بالعكس يمكن لو كان في نشارة كانت لصقت بالثلج ووسخته .

[عبدالله الصديق]

مواضيعغك شيقة يا درديري
تحضرني قصةلاحد السودانيين في احد قرى مدني وقد ظهرت صورته بالصدفة مع النميري لاحد زيارته لمدني ..صاحبنا قد الناس بصورتو دي وكل ما يجلس في مجلس يجيب سيرة الصورة .. مرة راكب في البص متجه لمدني وبدأ في سرد قصة الصورة فقام احد الركاب عمل معه رهان على ان يسكت حتى وصول مدني واعطاه خمسين الف مقابل سكوته وظل الرجل صامت وعند مشارف مدني قال احد الركاب الصورة الظهرت دي ما صورتك عندها انتفض صاحبنا واخرج القروش من جيبه وقال شيل يا اخوي قروشك دي علي الطلاق ياها صورتي

[درديري كباشي]

تامر يادرديري

معانا واحد محاسب في الشركة

يوم استاذنت لليوم البعده اني ماجاية الشغل

اها اديت المحاسب دا ظرف مفترض يرسله بالدي اتش ال

لما جيت اليوم البعده ونزلت
سالته من الايصال بتاع الدي اتش ال "باعتبار انه مفترض ح يكون رسله"

اها قعد يقولي بالتقطعه انه ماشاف الظرف ابدا
وانه قالي اخليه في درجي انا
وووووو

اها قلت ليه خلا استهدي بالله وخلينا نفتش مكتبك
قالي اصلوووووووووو ما ح نلقاه
لو فتشناه لبكرة
لانه واثق تماما "علي باليمين بتاعتك دي"
مااستلم مني الظرف

يالله الله اقنعته اننا ما ح نخسر حاجة لو فتشنا

اها مع اول بحث في المكتب اطلع ليك الظرف المايغباني

غايتو قلت ليه تغالط الزول × اسمه ياسعد

تمام يا مدنية حقيقة سعد مغالطة بتاعكم من فصيلة ( ان طارت عز) القصة الشهيرة لزعيم الغالاطين

[درديري كباشي]

مواضيعغك شيقة يا درديري
تحضرني قصةلاحد السودانيين في احد قرى مدني وقد ظهرت صورته بالصدفة مع النميري لاحد زيارته لمدني ..صاحبنا قد الناس بصورتو دي وكل ما يجلس في مجلس يجيب سيرة الصورة .. مرة راكب في البص متجه لمدني وبدأ في سرد قصة الصورة فقام احد الركاب عمل معه رهان على ان يسكت حتى وصول مدني واعطاه خمسين الف مقابل سكوته وظل الرجل صامت وعند مشارف مدني قال احد الركاب الصورة الظهرت دي ما صورتك عندها انتفض صاحبنا واخرج القروش من جيبه وقال شيل يا اخوي قروشك دي علي الطلاق ياها صورتي

سلام يا عبد الله وكل عام وانتم بخير

قصتك ذكرتي مقطع من كتاب مذكرات الولد الشقي للكاتب الساخر والرائع محمود السعدني .. وقال انه اول مقال نشر له في جريدة كان عن الطماطم .. وهو ظل اي موضوع يدور عن اي شئ هو يلفه بقدرة قادر ليصب في مصلحة الطماطم ويقول هو بعدها انه هو من كتب المقال الاخير عن الطماطم في الصحيفة الفلانية .ز

[ابوخالد]

دومآ أخى بحرٌ من الإبداعِ .....

لا بل قل .... هو الإبداع عينه .......

صورٌ واقعية بكل ما تحمل من معانى ....

تأناسنا بها ..... فأمتعتنا ....

تجالسنا معها ..... فنعم الجليس يوم الخميس .....

وهيهات أن تكتم فى الظلام مشاعلٌ .... أخى

وأقول ...

بأن الشريف إذا تَقوىَ تواضع والوضيع إذا تَقوىَ تكبر ....

فكن سامقآ دومآ أخى ... ودع لنا الظلال لنسترييح ...

.
.
.
.
.
.
.
.

دُم بخيرٍ أخى والأسرة الكريمة ....

كلمنا قليلآ عن العيد الكسلاوى ....

[درديري كباشي]

دومآ أخى بحرٌ من الإبداعِ .....

لا بل قل .... هو الإبداع عينه .......

صورٌ واقعية بكل ما تحمل من معانى ....

تأناسنا بها ..... فأمتعتنا ....

تجالسنا معها ..... فنعم الجليس يوم الخميس .....

وهيهات أن تكتم فى الظلام مشاعلٌ .... أخى

وأقول ...

بأن الشريف إذا تَقوىَ تواضع والوضيع إذا تَقوىَ تكبر ....

فكن سامقآ دومآ أخى ... ودع لنا الظلال لنسترييح ...

.
.
.
.
.
.
.
.

دُم بخيرٍ أخى والأسرة الكريمة ....

كلمنا قليلآ عن العيد الكسلاوى ....

نشكرك يا باشمهندس يا صاحب الحضور الانيق

نعدي زحمة العيد ونستحضر باقي الشخوص

[طائر النورس]

والله قمة الابداع يا لدرديري

وتسلم الانامل

[حاتم مرزوق]

المتميز درديري

كل عام وانت بخير



براعة التناول و القدرة علي التشريح اصبحت سمة تميزك عن غيرك لا سيما حين تتناول بالدراسة والتشخيص بعض السلوكيات الشاذة التي تصدر ربما من اشخاص ... اسر ... قبائل او مجتمعات تتناولها بالنقد البناء الذي يهدف الي التغيير.

لا نخص مجتمعنا وحده بهؤلاء الأشخاص الذين تطرقت لهم في هذا التناول الجاد ... بل كل المجتمعات بلا استثناء ولكن للتفريق ربما تتفشي هذه السلوكيات والظواهر في مجتمعات اكثر مما تتفشي في اخري !!! وبما ان مجتمعنا غني بهذه الشخصيات فيجب علينا ان نبين الأسباب والدوافع التي ادت الي تفشي هذه الظواهر في المجتمع.

في تقديري الخاص ربما المجتمعات نفسها هي التي تساعد في نشؤ شخصيات من هذا النوع وتدفع بهم الي تبني مشاهد او سلوكيات او تصرفات غير واقعية من شأنها ان تجاري المجتمع الذي تعيش فيه او تتفوق عليه، اذن هي مجاراة الفقراء للأغنياء مثلا في سلوك الفشخرة علي الفاضي او الأغنياء تجاه الأغنياء لبلوغ التميز المنقطع النظير.


الدارسون لعلم الأجتماع والنفس يستطيعوا ان يفسروا هذه الظواهر ومسبباتها اكثر منا.


احييك اخي درديري علي تميزك المعهود والهادف.