العيد الذي افتقدته

[معتصم عيدروس]

مع شلة نادي الأمل .. بعد الانتهاء من آخر توزيعة كوتشينة ..
- يلا يا جماعة نمشي السوق ..
معروف ماشين نشتري شنو؟
انا عايز مركوب جلد أصلة ..
انا عايز مركوب جنينة
انا ماشي اشتري الشال
انا ماشي اشتري طاقية
يا جماعة انا داير امشي احلق

هكذا هو الحال يوم وقفة العيد بالليل..
هذا هو البرنامج
بي ركشة
بي عربية
بي رجلينا
المشوار ما بعيد
من نادي الامل للسوق
كل الشلة الآن تتماثل شخوصهم امام عيني
جمال الخطيب .. السر حسن .. محجوب .. ابودقوم .. خالد فيصل .. و .. و.. و..
انتهينا من البرنامج دا رجعنا البيت

الصباح .. صباح العيد
بين بيتنا والمسجد قطعة ظلط
اصحى على صوت المؤذن.
الله اكبر .. الله اكبر
لا اله الا الله
الله اكبر ولله الحمد

مؤكد انني لا اصحو لوحدي ..
العزيزة الوالدة الحاجة .. ام الكل "خديجة" .. خجو" عند احفادها... هي التي تتولى هذه المسؤولية


قمنا واتجهزنا للصلاة..
دائما ما استغل ان الباب قريب من مسجد جامع عبد الباسط .. فاخرج متأخراً .. وادخل المسجد وفي يدي مصلايتي..
آه من هذه الذكريات
مرت الآن 3 سنوات و5 أعياد لم اعش هذه المشاهد التي تعودت عليها طيلة عمري..

حتى وانا متزوج وزوجتي من الخرطوم لم يحدث أن حضرت العيد هناك في البندر ..

العيد في مدينتي لا يتم استبداله بأي عيد في مكان آخر .. اللهم الا اذا كان في الأراضي المقدسة التي لم ازرها حتى الآن..

مكان واحد في صلاة العيد وامام واحد
اما المكان فهو ما يجعلك بعيداً عن مرمى عيون الشيخ حسن عبد العزيز .. والد صاحبي ودفعتي مرتضى .. وقريباً جداً من مجموعة الشباب وفي مقدمتهم عاطف ابو..
تنتهي الصلاة فننزوي خلف شجرة ونبدأ في الونسة
يا سبحان الله .. هذه الأشجار قمنا بزراعتها قبل سنين لتصبح وارفة الآن وتحمينا من عيون شيخ حسن .. وتمنح آخرين الظل .. .. نعلق على خطبة العيد التي طالت .. او على ما يدخله الشيخ من سياسة غير محببة لأغلب الذين يستمعون الى خطبته .. الاطالة جعلتنا نشرد لنصلي التراويح في الجزيرة في كل رمضان.. يشجعنا ود الخطيب .. رغم اننا نذهب في اغلب الاحيان راجلين الا اننا لا نحس بالتعب فالصلاة مع الشيخ محمد احمد عووضة ليست بالطويلة واما المشوار فهو تراويح لما في البطن من اكل الفطور.

تنتهي الصلاة .. نبدأ بالسلام على كل من في المسجد .. من تعرف ومن لا تعرف ..
يا الله في واحد ما سلمت عليه .. امشي اسلم ..
واحد لقيته مشغول بالسلام .. خليه بجيه راجع... مؤكد انني ساجده ..
ابحث عن المغتربين لتسلم عليهم..
انتهينا من السلام حتى على الشيخ حسن عبد العزيز رغم اطالته للخطبة والكل سعداء وفي حبور..

عيدي عيدين .. فانا في شوق للجميع.
الان لنخطط سنذهب اولاً لمن كانت لديهم حالة وفاة .. ناس فلان مات ليهم فلان .. وناس فلان .. وناس فلان..

لنرسم الخطة .. سنذهب بي شارع شبو .. ونطلع بي عند ناس ابو .. ومن هناك بي عند ناس ابوشيبة .. وبعداك وراء الجنينة علي ناس عادل ابوكدوك... وهكذا الخ.

طيب يا جماعة دقيقة .. مستحيل امشي المشواير دي كلها قبل ما اسلم علي ست الكل .. اخرج من المسجد وانا ابحث عنها بعيني .. فهي تصلي العيد والجمعة في المسجد ..
احياناً اجدها في الشارع واحياناً لا .. وعندها لنذهب الى المنزل .. امي .. اخواتي عيد مبارك..
نمشي ناس عم يوسف الجاك نسلم .. وبعدها ناس الدخيرة .. وناس عم عوض الفاضل رحمة الله عليه وهكذا ..

لنواصل الجولة .. على بيوت الحي .. بيت بيت ..
العصر هناك مشاوير اخرى .. الاصدقاء والاصحاب .. اسامة وتاج الاصفياء وعثمان وصلاح ونور الدين وغيرهم وغيرهم..


انتهى -

هذا هو العيد في مدني
مؤكد ان عيدي هناك يشبه اعياد كل ابناء المدينة ...


هذا العيد هو ما افتقده في هذه الغربة ..
الصلاة الساعة 5:30 صباحاً ..
انتهينا منها عدنا الى البيت
لم احس للعيد بطعم .. حتى الاطفال كذلك .. لم يكلف واحداً منهم نفسه عناء طلب ملابس العيد أو العاب العيد..

فهل تحسون للعيد بهذا الطعم مثلي

[ام نوران]

معتصم عيدروس

كلنا نفتقد هذا العيد الذي تفتقده,,,وياله من عيد,,,هنا العيد لاطعم لالون لارائحه,,,اللهم الا فرحته القلبيه الموجوده عند كل المسلمين ,,اما مظاهر الفرح فلا وجود لها,,,
تحياتي

[معتصم عيدروس]

معتصم عيدروس

كلنا نفتقد هذا العيد الذي تفتقده,,,وياله من عيد,,,هنا العيد لاطعم لالون لارائحه,,,اللهم الا فرحته القلبيه الموجوده عند كل المسلمين ,,اما مظاهر الفرح فلا وجود لها,,,
تحياتي

ام نوران .. صباح الخير فالساعة الآن 2:30 صباحاً

هو أرق الغربة .. الذي يجعلك ساهراً تبحث عن أي شئ ..
الغربة مرة ومؤلمة.. تمنحك اشياء .. ولكنها تأخذ أجمل الأشياء..

[بدر الدين احمد الطائف]

معتصم كل عام وانت والجميع بالف خير
وتحياتى وتبركاتى للوالده خديجة ولكل الاخوان
بالعيد السعيد
وحقيقة يا معتصم هذا هو العيد الذى افتقدته
وتفاصيل العيد التى ذكرتها
اكيد مشتركه
وانا اقراء فيما كتبت واتخيل كل المشهد
والتفاصيل الجميلة
وذكريات العيد
مع الاهل والجيران
والاصدقاء
عيد سعيد
اخى معتصم
ومشكور على هذا السرد الجميل
وتحياتى لكل من ذكرت ومن لم تذكره.
وبدون فرز.

[أبوبكرحامد]

العيد فى مدنى له طعم ولون ورائحة ، المرور على الجيران والتصفيق عند الدخول ومداعبة الناس كباراً وصغاراً ، رجالاً ونساءاً ، شيباً وشباباً ، يامعتصم مالك مقلِّب علينا المواجع ، خلينا مع عيد الغربة ، الصلاة 5:45 دقيقة صباحاً ، صلينا جينا اتخمدنا نمنا صحينا المغرب ودينا العيال الحدائق لزوم الترفيه وكسر الروتين ، حليل الطوطحانية والقلاّبة وايجار العجلات وام بارونا وحيدر قطامة الله إرحمو واحسن إليهو .

[معتصم عيدروس]

بدر الدين كل عام وانت بألف خير

ناس حسن عبد العزيز .. ناس الطايف .. ناس كبروس .. ناس علي فرح .. ناس عراقي .........

[معتصم عيدروس]

الصلاة 5:45 دقيقة صباحاً ، صلينا جينا اتخمدنا نمنا صحينا المغرب ودينا العيال الحدائق لزوم الترفيه وكسر الروتين .

هكذا هو العيد .. بالظبط يا صديقي ود الماذون .. اعادنا الله واياكم الى بلادنا غانمين سالمين"

[مدنيّة]

العيد الذي افتقدته

معتصم
تبدل





ربنا يرجعكم بالف سلامة

والله عيدت السنة دي في الخرطوم
ماعنده اي طعم
وباب البيت ماشفته الا اليوم عشان نزلنا شغل

الله يعينا

همسة : كل سنة انت والاسرة بالف خير يارب

[معتصم عيدروس]

عيدت السنة دي في الخرطوم
ماعنده اي طعم

كل عام وانتم بخير وصحة ...

هو شنو في الخرطوم العنده طعم.!!؟؟

[عزيز عيسى]

يا معتصم ليك وحشة..
إضافة لكلام ود المأذون بعد ما تعيد على الجيران
والأصحاب والأقارب في الأحياء القريبة والبعيدة
تمشي على الميادين تلقى ناس ود المأذون
وأبوشوارب وبابكر ودالصول بيلعبوا في البريمو
وشختك بختك وملوص ولعبة القزاز .. والبوليس يطارد فيهم.
وناس خالد هاشم وخالد الصول وعماد الصادق
مأجرين عجلات ويتفسحوا بيها من شارع لشارع..
ويعملوا في الحركات ذي عمك قسم.
وهم مبسوطين اليوم كله 24 قيراط ومليانين كعك وخبيز لي حلقهم.
وفي المساء تلقاهم كلهم مشوا على السينما الوطنية
أو السينما الخواجة (تكلوا) العجلات بالقرب من حلواني سنترال
يأكلوا في السندوتشات والباسطة ويشربوا في (الهيلا هوب)
وبعد ما ينتهوا يمشوا يقيفوا في صف الشعب ويدافروا مع
عابدين ليشاهدوا فيلم سراتانا من بطولة كلنت إيستوود أو فيلم ديجانقو
من بطولة ترنس هيل وصحبه بود سبنسر
أو فيلم هندي جانوار أو غرام في طوكيو من بطولة شامي كابور
وممتاز (سبنا) والخائن بران.
أو فيلم آخر من بطولة راجي كابور..
وفي داخل السينما تلقى الصادق أبو العافية حاجز كنبة لوحده
وود الفتلي حاضن قدحه ويشمشم في البنزين.
والله مدني كانت حلوة حلا بناسها شيء ما إعتيادي.
بلاد الخليج مابتحس فيها بالعيد..
أنحنا هنا في بلاد العم سام نحمد الله على نعمة
العيد.. نلتقي فيها بكل الحبان وبنتلم كلنا في مكان
واحد بعد الصلاة ونواصل المعايدة والأطفال اليوم
كله بيلعبوا على الأقل بتحس بشوية بالعيد.

تفتكر أيام زمان ترجع تاني من جديد؟

كل عام وأنتم والوالدة خديجة وأهل مدني كلهم
بخير.

[معتصم عيدروس]

يا معتصم ليك وحشة..
تفتكر أيام زمان ترجع تاني من جديد؟

.

العزيز عزيز .. والله مشتاقين .. الشوق بحر ..
نقول للزمان ارجع يا زمان..
كل ما ذكرته واضف اليه هناك رحلات ام بارونة .. وام سنط .. والمباريات بين الاحياء في شكل مهرجانات .. وغيرها من الفعاليات الجميلة التي كانت تميز مدينتنا ..
الزمن لن يرجع بالتأكيد .. ولكن العيد في مدني ما زال يحتفظ بنفس نكهته .. على الأقل عندنا في دردق .. كل الطقوس ما زالت تمارس .. ولكننا نحن من ابتعدنا .. ربما بطوعنا أو للقسمة .. ولكن نتمنى ان نعود لأننا سنجد كل الطقوس في انتظارنا .. فهذه الممارسات هي من أكثر ما يحرص عليه أهلنا في مدني.

وناس خالد هاشم وخالد الصول وعماد الصادق
مأجرين عجلات ويتفسحوا بيها من شارع لشارع..
ويعملوا في الحركات ذي عمك قسم.
وهم مبسوطين اليوم كله 24 قيراط ومليانين كعك وخبيز لي حلقهم.
وفي المساء تلقاهم كلهم مشوا على السينما الوطنية
أو السينما الخواجة (تكلوا) العجلات بالقرب من حلواني سنترال
.[/size][/color]

ما أجمل الأيام يا دنيا لما تحني

[حبيبة]

معتصم ازيك

كل سنة وانت بالف خير

اعاده الله عليك وعلينا باليمن والخير والبركات...

والله يامعتصم الحال اتبدل كتير..وطعم العيد اختلف جدا من زمان...

حتى للفى البلد..

حليل اللمة اولاد الخال واولاد العم...اتغير كتير جدا والله..حتى الناس اللى بيجوا من الجامع مازى زمان..

صح يااخوانا ولا الشئ ده فى فريقنا بس؟؟

[معتصم عيدروس]

[quote=صح يااخوانا ولا الشئ ده فى فريقنا بس؟؟[/quote]

يا حبيبة المسألة دي شكلها في فريقكم بس. وامكن في فرقان أخرى..

بس نحن في دردق الحال ما اتغير..

[نزار حسن محمد]

العيدروس ود دار جعل .. كل سنه وانت بالف خير والعيد الجاى بين الاهل والحباب بس قول يارب
والله يامعتصم الدخلته فينا الغربه لا بتتحكى ولا بتتوصف مرت عشرين سنه وانا احلم بكل ماذكرت
لكن الله غالب ..
وتجى مدنيه وتقول تبادل !
غايتو يالمعتصم خطوات كتبت علينا ..
كل عام وانت بالف خير وسعاده .

[معتصم عيدروس]

العيدروس ود دار جعل .. كل سنه وانت بالف خير والعيد الجاى بين الاهل والحباب بس قول يارب
والله يامعتصم الدخلته فينا الغربه لا بتتحكى ولا بتتوصف مرت عشرين سنه وانا احلم بكل ماذكرت
لكن الله غالب ..
وتجى مدنيه وتقول تبادل !
غايتو يالمعتصم خطوات كتبت علينا ..
كل عام وانت بالف خير وسعاده .

أولاً كل عام وانت بألف خير .. وعيدك الجاي ان شاء الله بي هناك في ارضا المليون ميل مربع شوق..

20 سنة غربة يا نزار .. يا اخي انت مافي فرق بينك وبين مدنية .. انت مغترب في الخليج ومدنية في الخرطوم ..
هي ما فارقة معاها ممكن تمشي .. لانها اصلاً عايشة في غربة .. وغربة لي غربة أخير بي ريال

[كارلوس2008]

[quoteكل الشلة الآن تتماثل شخوصهم امام عيني
جمال الخطيب .. السر حسن .. محجوب .. ابودقوم .. خالد فيصل .. و .. و.. و..
انتهينا من البرنامج دا رجعنا البيت
][/quote]

اخونا العيدروس كل سنه وانت طيب شوقتنا لتلك الايام ويالها من ايام دردق ومايو والسوق الكبير وودجيحا وسوق بانت ويالها من ايام جميله التحية من علي البعد لاخوانا جمال الخطيب والسر حسن ومحمد حسن والاستاذ عثمان حمرون ولكل شله نادي الامل

مرت الآن 3 سنوات و5 أعياد لم اعش هذه المشاهد التي تعودت عليها طيلة عمري..

يادوب انت في عمر الزهور قدامك اعياد واعياد بس قول بسم الله وربنا يوعدك كمان بعيد مكه والمدينه وياله من عيد


مع تحياتي لك وللاسرة

[معتصم عيدروس]

[quote=ويالها من ايام جميله التحية من علي البعد لاخوانا جمال الخطيب والسر حسن ومحمد حسن والاستاذ عثمان حمرون ولكل شله نادي الامل [/quote]


أخونا كارلوس شكلك كده من ناس الرابطة

عموماً تحياتك توصل .. وكل عام وانت بخير..

ويا حبيبنا عمر الزهور شنو.. سنة ولا اثنين بالكتير بتلقانا رجعنا ان شاء الله