إقلاب ومقولبات..

[أشرف صلاح السعيد]

نستعمل كثير من الجمل فى عكس ما تحمله فكرتها..وكثيرا ما نبنى قوالب عن آخر أو آخرين إستنتاجا ..
فكرة هذه النافذة بسيطة جدا وهى إستحضار كل ما نعرف عن الفكرة الخطئ وكيف يمكننا تقويمها وإن عاشت بيننا ردحا طويلا..
أرجو من الجميع الدخول هنا لا للرد فقط ما أمكن بل تسجيل مشاهدات معكوسة حتى نستفيد جميعا..

الإقلاب : عكس المفهوم..أو قلب المعنى..
القولبة : عمل فكرة مبنية على ملاحظات قد تكون إستثناءات وتعكس قصور بفهم الآخر..


مشهد ..1 (وليد حوار بينى وبين الحبيب ود مصباح)

كثيرا ما يمرض الشخص ويغيب أو يحتجب عن الظهور وعندما يقابلنا يدور حوار كالتالى:

- سلامات يااخى وين ما ظاهر سألنا عليك وقالو لينا شوية بعافية..

* يااخى تسأل عليك العافية "ويستمر الحوار"..

تسأل عليك العافية!!!!!! هى العافية دى كان تمنيناها تسأل عليو معناها الزول دا يمرض ويشتاق للعافية لغاية ما تسأل عليو..يعنى الدعوة هنا عكسية ولكأنها "إن شاء الله تمرض لغاية العافية ما تفتش ليك وكان مالاقتك تسأل عليك"..ولا كيف؟؟
والشى الخطير جدا جدا بأن الدعوات لا تستجاب حسب النيات إن صادفة باب إستجابة الدعوة مفتوح بالسماء..يعنى المرة البتدعى ولدا ولا بتها برغم عدم تمنيها الحقيقى لما قالت يمكن دعوتها تستجاب وبعدا الندم بيكون..علينا أيها الأحباب توخى الحذر الشديد فى مسألة الدعاء بقدر الإمكان حتى تكون الإستجابات لما يفيد وليس لما يضر..

همسة: عقبة اتمنى أن اكون بريت بوعدى ومستنى إضافاتك..

[عوض صقير]

تأكيداً لما أسلفت يا باش هناك مقولة :

"اللهم إني لا أسألك رد القضاء ولكني أسألك اللطف فيه"


فهذا دعاء لا أصل له ، ومعناه غير صحيح ،
وأيضاً فيه منافاة للحديث : "لا يرد القضاء إلا الدعاء"

وقول العلماء فى ذلك : أما قول القائل: إني لا أسألك رد القدر فهذا كلام لا يصح، وليس له اعتبار ولا أصل له في النقل فهو دعاء مبتدع. والحاصل أن هذه العبارة لا ينبغي ذكرها في الدعاء، بل يدعو الإنسان ربه بالصيغ الشرعية المأثورة، وعلى الوجه المشروع، والله أعلم.

[العاقب مصباح]

اشرف اخوى
اضافة شنو المستنيها منى
ياخى انت بتبالغ
كدى الشوف ود خالتك ود المأذون بعد يجى يدينا الاضافة
وخلينى اعرج بيك للنفاج شويه
تقديرنا للجمال :-
فى نوع كدا يا اشرف إذا عايز يوصف ليك بنت جميلة يقول ليك :-والله جميلة جمال صاقعة بس ...
الصاقعة التقع فوقو هسع عليك الله فى صاقعة سمحة ولا جميلة دا كلام دا
وفى نوع تانى يقول ليك والله حلوه حلوه ملالة بس ... الملالة هى النار لمن تقعد فيها ...كدى واحد يجرب يقعد ليهو فى نار النشوفه كيف بيكون ...
وفى نوع تانى يقول ليك والله حلوه حلا نار الله الموقدة .... يا زول ها ربنا ينجينا وينجيك منها وسماحة زى دى بتودى النار والشمار تقيل انا تانى ما بجى ...

إضافة جد جد :-
فى نوع كدا تقول ليهو فاقدك ...
يرد عليك :- ما تفقدك شينة إن شاء الله ..
اها لمن نجى نفلسفها ليك يا اشرف .. بنجد إنها بتعنى إنك تكون على الدوام ملازم للشينة يعنى قاعد فى محل الشينة ...الشينة دى ممكن تكون اى حاجة ما حلوه ... ما دام هى ما فقدتك معناها ملازم ليها ...
لو قلنا ما تفقدك حاجة حلوه معناها انت عائش فى الحلو على طول ...
يبقى مافى داعى نقول الكلمة دى صح
اها انا ماشى كان اتذكرت لى حاجة بجيك تب

أوفيت وكفيت ومنتظرين الإضافة من الشباب خاصة درديرى المترجم

[سماحة]

الرائع دوما أشرف

لو واحد قال لك مثلا اجيب ليك معاي شنو تقول ليه ما عاوز حاجة بس سلامتك
طب كيف يديك سلامتو؟؟؟
وبرضو تعقيب لكلام اخوي مصباح
واحد يوصف ليك بنت يقول ذي الليل او طلقة بس
فهل الليل جميل ولا الطلقة حتى تأثير الطلقة ما جميل ولا شنو؟

[أبو جودي]

أخونا أشرف :
في بعض الناس يقولوا ليك :

يا أخي ما جننتنا عديل كدي

المقصود هو جمال الفكرة ،،، لكن أكان مشيت للمعنى التاني "الجن ده " ربنا يكفينا شره.
أخي أشرف ومداخلة برأي صغير كدي لو سمحت ،،،
في اعتقادي بأن من يملك ناصية اللغة العربية وخاصة القواعد منها الجناس والطباق والتشبيه والتمثيل وكثيراً من ضربوها ،،، من تتملكه ويجيدها إجادة تامة من الصعب أخي أن يتورط في قلب المعاني أو فهمها بطريقة مقلوبة .

ولك تحياتي ،،،،

[سماحة]

صح يا أبو جودي العسولة
فالسعوديات دائما يقولو الحاجة دي تجنن أو تهبل وهم قاصدين أنها في قمة الروعة

[أشرف صلاح السعيد]

تأكيداً لما أسلفت يا باش هناك مقولة :

"اللهم إني لا أسألك رد القضاء ولكني أسألك اللطف فيه"


فهذا دعاء لا أصل له ، ومعناه غير صحيح ،
وأيضاً فيه منافاة للحديث : "لا يرد القضاء إلا الدعاء"

وقول العلماء فى ذلك : أما قول القائل: إني لا أسألك رد القدر فهذا كلام لا يصح، وليس له اعتبار ولا أصل له في النقل فهو دعاء مبتدع. والحاصل أن هذه العبارة لا ينبغي ذكرها في الدعاء، بل يدعو الإنسان ربه بالصيغ الشرعية المأثورة، وعلى الوجه المشروع، والله أعلم.

حبيبنا صقرة تحياتى يا استاذ..
تعرضت لاخطر انواع المقولبات وهى التى تمس الدين..ودى اضافة من النوع الماااكن..
جزاك الله خيرا يا استاذنا الخلوق..

[أشرف صلاح السعيد]

اشرف اخوى
اضافة شنو المستنيها منى
ياخى انت بتبالغ
كدى الشوف ود خالتك ود المأذون بعد يجى يدينا الاضافة
وخلينى اعرج بيك للنفاج شويه
تقديرنا للجمال :-
فى نوع كدا يا اشرف إذا عايز يوصف ليك بنت جميلة يقول ليك :-والله جميلة جمال صاقعة بس ...
الصاقعة التقع فوقو هسع عليك الله فى صاقعة سمحة ولا جميلة دا كلام دا
وفى نوع تانى يقول ليك والله حلوه حلوه ملالة بس ... الملالة هى النار لمن تقعد فيها ...كدى واحد يجرب يقعد ليهو فى نار النشوفه كيف بيكون ...
وفى نوع تانى يقول ليك والله حلوه حلا نار الله الموقدة .... يا زول ها ربنا ينجينا وينجيك منها وسماحة زى دى بتودى النار والشمار تقيل انا تانى ما بجى ...

إضافة جد جد :-
فى نوع كدا تقول ليهو فاقدك ...
يرد عليك :- ما تفقدك شينة إن شاء الله ..
اها لمن نجى نفلسفها ليك يا اشرف .. بنجد إنها بتعنى إنك تكون على الدوام ملازم للشينة يعنى قاعد فى محل الشينة ...الشينة دى ممكن تكون اى حاجة ما حلوه ... ما دام هى ما فقدتك معناها ملازم ليها ...
لو قلنا ما تفقدك حاجة حلوه معناها انت عائش فى الحلو على طول ...
يبقى مافى داعى نقول الكلمة دى صح
اها انا ماشى كان اتذكرت لى حاجة بجيك تب

أوفيت وكفيت ومنتظرين الإضافة من الشباب خاصة درديرى المترجم

تحياتى عقبة..
تعبير البعض عن الجمال جد بقى كارثى واللذيذة الجكسوية الحليوة بتكون مبسوطة بكارثيتها يااخى معقول!!
وتقول ليى ما بتضيف ؟ هو الاضافة دى كيف؟؟
والله ابو الدر بيصمت دهرا وبعدا بينطق دررا الزول دا ما بتعرفو بيظهر متين لكن اكان ظهر الا بحيرنا جد..
خليك قريب ومستنين باقى الفت..

[أشرف صلاح السعيد]

الرائع دوما أشرف

لو واحد قال لك مثلا اجيب ليك معاي شنو تقول ليه ما عاوز حاجة بس سلامتك
طب كيف يديك سلامتو؟؟؟
وبرضو تعقيب لكلام اخوي مصباح
واحد يوصف ليك بنت يقول ذي الليل او طلقة بس
فهل الليل جميل ولا الطلقة حتى تأثير الطلقة ما جميل ولا شنو؟

الاخت سماحة تحياتى..
الروعة بشوفوها الرائعين..بس لكن جيتينى فى جرح "الرائع دوما" المعنى جميل ولكن يفتقد كثير من الحقيقة فالديمومة كلنا نستعملها كقول "كن دوما بخير" فالديمومة فقط لله سبحانه وتعالى.."ندمتك على الكلمة الشى ما نجامل؟"..
وصحى بعد ما يديو سلامتو تانى ببقى ليو شنو؟..

[أشرف صلاح السعيد]

أخونا أشرف :
في بعض الناس يقولوا ليك :

يا أخي ما جننتنا عديل كدي

المقصود هو جمال الفكرة ،،، لكن أكان مشيت للمعنى التاني "الجن ده " ربنا يكفينا شره.
أخي أشرف ومداخلة برأي صغير كدي لو سمحت ،،،
في اعتقادي بأن من يملك ناصية اللغة العربية وخاصة القواعد منها الجناس والطباق والتشبيه والتمثيل وكثيراً من ضربوها ،،، من تتملكه ويجيدها إجادة تامة من الصعب أخي أن يتورط في قلب المعاني أو فهمها بطريقة مقلوبة .

ولك تحياتي ،،،،

سلام ابو جودى..
هو صحى اكان جنا كان بيعرف انو جنا؟..
ابو جودى اخوى معظم البقعو فى الاخطاء دى ما ناقصا علم ولكن التركيز وتوارث عبارات من غير تفنيد معانيها يعنى "دقسات مش جهل"..

[أشرف صلاح السعيد]

كدى نقلب شوية على المقولبة..ودى طبعا الاعلام بيلعب فيها لعب بجيب خماسيات وعشان ناس الهلال ما يزعلو برضو بجيب ثلاثيات ..يعنى لما التلفزيون يعرض المسلسلات البتدور فى القرى ومعظم شخصياتا ناس دقينتى راحت وناس بسيطة تعدت مراحل السذاجة بهناااك.. ناس المدن خلاص بيختو ناس القرية ديل لو مشيت ليهم لابس بنطلون ممكن يفتكروك خواجة..
ولا زى قزازة السمن البقت ناس اهل العوض كلهم متلقين حجة واصحاب مسامير جحا..
اتعرضت بصفة شخصية لمواقف لما يسألنى واحد من وين الاخو واقول ليو من مدنى ..طوالى يقول ليى يعنى من اهل العوض!!مع انى لا معاى قزازة سمن ولا جاى ابيت عندو!!ولكن الاشارة بتكون للسذاجة ..
ومرات لما تقول لواحد انا من مدنى تلاقيو ابتسم ونظرة خبيثة فى عيونو بتقول "ناس مدنى ال......" ودا طبعا ناتج لانو بيوت السكر والدعارة بأنواعها كانت فى زمن ما متركزة بمنطقة معينة وكل الناس الساكين المجن بيمشو هناك وما بيكون شاف لمدنى الا وجه واحد ولما يرجع منطقتو بيحكى عن مدنى الشافا هو بإنائه الذى نضح فيها..مع انو هذه الظاهرة لا تتفرد بها مدينة عن اخرى وكلنا فى البلوة سواء ولربما هناك مدن حوت اضعاف ما بمدنى من ذلك الجانب المظلم..

[أشرف صلاح السعيد]

"الله لا يجيب يوم شكرك"..

دى ما أمنية بتودى هسى فى سيتين داهية؟..
يقصد الناس بهذه المقولة ألا يموت الشخص وبعد موتو الناس تشكرو لأنو إحنا فى بلد أصلو بقى التشكر لناس القبور "إلا من رحم ربى"..
الموت جاى جاى كان دعونا للزول شنو ما دعينا..
الكارثة إنو الدعوة إذا أستجابت الزول دا ما مابتلقى ليو شى يشكرو بيو..يعنى أعمالو تكون زى وشى كدا وما أظلم وشى "خلقتو شريفة" بتبقى شينة وما بتشكر عليها..يعنى الدعوة إتضمنت "الله يقبح أعمالك وما تلقى اليتشكرك عليها"..أها دى سوء خاتمة وحياة كمان..
قال الله لا يجيب يوم شكرك قال!!! يعنى يجيب يوم نبذو ولا شنو؟؟؟..

[أبو جودي]

سلام ابو جودى..
هو صحى اكان جنا كان بيعرف انو جنا؟..
ابو جودى اخوى معظم البقعو فى الاخطاء دى ما ناقصا علم ولكن التركيز وتوارث عبارات من غير تفنيد معانيها يعنى "دقسات مش جهل"..

" أخي أشرف ومداخلة برأي صغير كدي لو سمحت ،،،
في اعتقادي بأن من يملك ناصية اللغة العربية وخاصة القواعد منها الجناس والطباق والتشبيه والتمثيل وكثيراً من ضربوها ،،، من تتملكه ويجيدها إجادة تامة من الصعب أخي أن يتورط في قلب المعاني أو فهمها بطريقة مقلوبة ".

أهه أخونا أشرف من حسه بقيت تقلبن الكلام ،،، يا أخي داير تجننا عديل كده ولا شنو الحاصل ،،، حسي الجاب كلمة جهل هنا شنو ،،، أنا قلت يتورط أو يفهمها بطريقة مقلوبة ،،، ما تخلينا " نقوم نقلبه حسي معاك"
طول بالك أخوك اليومين ديل بقى يقيف في كل كلمة ،،، واعتقد ده المفروض عشان الواحد ما يدقس زي ما قلته .

[أشرف صلاح السعيد]

" أخي أشرف ومداخلة برأي صغير كدي لو سمحت ،،،
في اعتقادي بأن من يملك ناصية اللغة العربية وخاصة القواعد منها الجناس والطباق والتشبيه والتمثيل وكثيراً من ضربوها ،،، من تتملكه ويجيدها إجادة تامة من الصعب أخي أن يتورط في قلب المعاني أو فهمها بطريقة مقلوبة ".

أهه أخونا أشرف من حسه بقيت تقلبن الكلام ،،، يا أخي داير تجننا عديل كده ولا شنو الحاصل ،،، حسي الجاب كلمة جهل هنا شنو ،،، أنا قلت يتورط أو يفهمها بطريقة مقلوبة ،،، ما تخلينا " نقوم نقلبه حسي معاك"
طول بالك أخوك اليومين ديل بقى يقيف في كل كلمة ،،، واعتقد ده المفروض عشان الواحد ما يدقس زي ما قلته .

والله يا ابو جودى صحى البتسلع من اللبن ينفخ فى الزبادى..يااخى مالك يااخ؟..والله فهمتا قصدك بس بأأكد فيو..وبعدين بقلبك الطيب دا مداوسات شنو البتقدر عليها ..والله خايفك فى نص العركة تضحك "قلبك ما ميت هههه"..
أدقس يااخوى زى ما عايز هو احنا فى محكمة؟؟..واذا الاخوان ما مشو لبعضم سجم الاخوة والتلحق ابوات طه..
هرشة : اكان راجل طالعنى برا..ههههههه "عليك الله هسى القلبو ميت فينا منو؟"..

[أبو جودي]

أهه يا اخوي أنا قصة طالعني برهههههههه وكده ،،، أنحنا يا أخوي يا اشرف زي ناس زمان ،،،، أفندية ساكت ،،،، أهه يا اخوي الأفندية ديل والنسوان يجوا بي جاي والرجال بي هناك عرفت أنا مع منو ،،،،
دي دايره ليها شرح أنت يا أخوي ما صغير وجاهل ،،،
زمان كان الأعراس في مدني أمكن دي يعرفوها أخوانا ناس أبو نبيل ،،
كان لم يجوا يفرتقوا الحفلة بقولوا للأفندية والنسوان تعالوا بي جاي ،،، والرجال يجونا بي هناك أهه يا اللخو عرفتني بي ياتو جهة أمشي ساي شوف ناسك

[أشرف صلاح السعيد]

أهه يا اخوي أنا قصة طالعني برهههههههه وكده ،،، أنحنا يا أخوي يا اشرف زي ناس زمان ،،،، أفندية ساكت ،،،، أهه يا اخوي الأفندية ديل والنسوان يجوا بي جاي والرجال بي هناك عرفت أنا مع منو ،،،،
دي دايره ليها شرح أنت يا أخوي ما صغير وجاهل ،،،
زمان كان الأعراس في مدني أمكن دي يعرفوها أخوانا ناس أبو نبيل ،،
كان لم يجوا يفرتقوا الحفلة بقولوا للأفندية والنسوان تعالوا بي جاي ،،، والرجال يجونا بي هناك أهه يا اللخو عرفتني بي ياتو جهة أمشي ساي شوف ناسك

لكن يا ابو جودى لقيتك نساى جنس نسيان..القصة دى ما حكيتا ليك على لسان الوالد لما كنا فى بيت التيجانى فى رمضان وكنا بنتكلم عن الفتوات ومضاربات الجماعة وشكلت البحر والسواطير وكيف جنابو مرتضى كان بيمشى يجيب الزول من بيتم..
خرفتا قبل يومك يااخوى حليلك ..صغير وجاهل والزهايمر يا الافندى جاك..

[أبو جودي]

" الزهايمر اللي جيك في كرعيك المعوجات ديل يبرى راسك "
أهه يا جماعة أنا أكان قعدته مع ود السعيد ده بطلعكم بره الموضوع
يالله يا ود السعيد شوف بوستك وخليها الحاجات دي بره بره

[أشرف صلاح السعيد]

" الزهايمر اللي جيك في كرعيك المعوجات ديل يبرى راسك "
أهه يا جماعة أنا أكان قعدته مع ود السعيد ده بطلعكم بره الموضوع
يالله يا ود السعيد شوف بوستك وخليها الحاجات دي بره بره

شكيت محنك يا ابو جودى كريعاتى ما بشتنتهن بشتنة هن ناقصات..بره احسن بنقدر نستر الافندية ..خلاص تعال بجاى انا زاتى بدورلى واحد يخاوينى..