اللورى حل بيى..

[أشرف صلاح السعيد]

فاصل اعلانى..

اللورى حل بيى دلانى أنّا فى الودى..
حبيبى جننى..
حبيبى ود الناس بقى ليا وناس..









همسة: سماحة وابو آية دقستو يا فرد..

[esmat]

الليل انا ما بنوموا الليل انا
بعِد في النجوم الليل انا
واللوري في الخرطوم الليل انا
جاب لي معاه ...... الليل انا

- اكمل الفرغ

[عبدالرحمن مدثر]

انا حاجز الصندقة فووق لانها بتديك احساس

انك اغنى زول واسعد زول واجمل زول خاصة

لما يكون المشوار لسيرة .. فى اللحظة دى انت اسعد

من العريس ذاتو ...

ياود سعيد ختينى السيخ انا مابقدر على ركوبو

[أشرف صلاح السعيد]

الليل انا ما بنوموا الليل انا
بعِد في النجوم الليل انا
واللوري في الخرطوم الليل انا
جاب لي معاه ...... الليل انا

- اكمل الفرغ

عصمت يااخوى فى داعى للإحراج؟؟..اخوك توقف بيو الزمن بالثمانينات واغانى بعد كدا
جلا
وجلا
وجلا
وجلابية بيضة مكوية يا عصمت بسحروك ليا..

[أشرف صلاح السعيد]

انا حاجز الصندقة فووق لانها بتديك احساس

انك اغنى زول واسعد زول واجمل زول خاصة

لما يكون المشوار لسيرة .. فى اللحظة دى انت اسعد

من العريس ذاتو ...

ياود سعيد ختينى السيخ انا مابقدر على ركوبو

الحبيب المتدثر والمعتلن جمالا سلام..
التندة ما زى مقدمة تايتنك بس اوعاك تفك يديك فى ريدة ام شداد البتقلب اللورى فى الدقداق..
السيخ بختيك ليهو وقول للناس الورى ديل نظام رجل جوه ورجل بره أنا ما مسعول من نتايجو..والنسوان الفرادى ممنوع عليهم حمل الطوب او الحجر..

[أشرف صلاح السعيد]

اللورى حل بيى فكرة مختلفة عن الركشة ام تلات كراعات على قول الحبشى..العزف فيه ليس عذف منفرد والبقية ما بين محلل وقارئ..الجميع رواه يحكو قصة فيها معنى ولا حكمة ولا مشهد بديع بالذاكرة خرطة..الراوى ليس ود السعيد ولن يمنع من الحكى ولكن فليكون اللورى للجميع وبكل مرة سيحكى أحدنا قصة مر بيها اللورى حقيقة أو خيال ..ليست لعبة وإن صارت لعبة لا يهم وما يهم من اللعبة العبرة ..ومسموح للورى التطواف فى المليون ميل مربعة فلا حدود ولا دروب لا يستطيع ألا يتجاوزها..
وابقو داخلين..

[alanssary]

نجمنا الساطع...أشرف صلاح السعيد...
لك التحية ...ياصاحب الاسطول...
سؤال براء المقرر....
علاقة شنو مع المرور....

[صلاح ودالطاهر]

قصه لايمكن نسيانها مع السفر باللواري واطرفها تلك القصة منذ زمن بعيد ........وسفري باللوري الي ارض الشمال والمرور بطريق ابوضلع وتسميته لانه شبيه الاضلاع وتحس نفسك كأنك تركب علي ظهر قعونجه من النطيط ومروراً بقهوة ام الحسن كان السفر قاسي يومين ربما ثلاثة ايام وانت يا المساعد خت الصاجات عشان اللوري ما يوحل في الرمال وانت والليل والمساء والنجوم علي ظهر اللوري والطريف توقفنا في تلك القهوه من اجل الراحة وانزال الزواده واخوك عامل حريف بالرغم كنت صغير السن في تعزيل لحم التيس الصغير الهش ودفر العظام الي الجلاكين مستنداً علي الظلام وكان ما لا يحمد عقبه مع ماء البير الممزوج بالقطران المدهن به الحبل والقربه تفاعلات الكمياء ما بين طعم القطران ولحم التيس الهش وعينك ما تشوف الا النور ومن ديك فرق لحم التيس ذي فراق الطريفي لجملو وصحيح اللوري حل بيي

[ود الجعلي]

انا حاجز الصندقة فووق لانها بتديك احساس

انك اغنى زول واسعد زول واجمل زول خاصة

لما يكون المشوار لسيرة .. فى اللحظة دى انت اسعد

من العريس ذاتو ...

ياود سعيد ختينى السيخ انا مابقدر على ركوبو

عن اذنك يا اشرف

بس تصحيح للمعني للخرباش الصندوق الفوق اللوري اسمو (((((التندة)))) يا حلو

[أشرف صلاح السعيد]

نجمنا الساطع...أشرف صلاح السعيد...
لك التحية ...ياصاحب الاسطول...
سؤال براء المقرر....
علاقة شنو مع المرور....

خى النصرى تحياتى..
والله بديتا بالحافلة ومريت بالركشة والقصة شكلها بقت ادمان..
أكون ياربى زمان عشان كنتا عايز ابقى طيّار وابوى قطعا ليا فى راسى الحكاية دى عملت ليا عقدة وبقى جنى أيى حاجة تنساق ياربى؟؟..
والله انا زاتى ما عارف شنو الشبكنى فى المتحركات دى غير انها بتمر بكل الدروب الواسعة ديك والضيقة ديك وبتشهد كل ما جناه الانسان وما بناه الانسان..

[سماحة]

المبدع أشرف
لك التحية و أنت تعطر أجواء المنتدى بكلماتك
ولا يهمك إنت واصل وربنا معانا
أهم شئ راحة من في المنتدى

[سماحة]

وحقيقة أروع شئ السفر باللوري ورجعتني لأيام زمان
لما السفر كان باللوري وما أنسى فرحتي وأنا أركب ورى رغم اصرار الجميع على ركوب قدام
وما أنسى كمان في مرة من المرات ونحن مسافرين للشمالية لزيارة جدتي لما ضل اللوري طريقه
والصحراء واسعة لا ماء ولا ذاد فقد نفذ المعانا حتى لاح في الافق ضوء وووجدنا الطريق في اليوم الرابع

[سماحة]

وما انسى كمان خبر وفاة ابن عمتي وهو سائق لوري عندما ضلوا الطريق هو والكمساري المعاه من الجوع والعطش
وبحثوا عنهم في الصحراء بالهيلكوبتر حتى وجدوهم والغربان تنهش في جثثهم
اللللللللللللللللللللللللله يا أشرف رجعتنا لأيام جميلة وحلوة
ونسيتنا المنافسة للفوز

[أشرف صلاح السعيد]

قصه لايمكن نسيانها مع السفر باللواري واطرفها تلك القصة منذ زمن بعيد ........وسفري باللوري الي ارض الشمال والمرور بطريق ابوضلع وتسميته لانه شبيه الاضلاع وتحس نفسك كأنك تركب علي ظهر قعونجه من النطيط ومروراً بقهوة ام الحسن كان السفر قاسي يومين ربما ثلاثة ايام وانت يا المساعد خت الصاجات عشان اللوري ما يوحل في الرمال وانت والليل والمساء والنجوم علي ظهر اللوري والطريف توقفنا في تلك القهوه من اجل الراحة وانزال الزواده واخوك عامل حريف بالرغم كنت صغير السن في تعزيل لحم التيس الصغير الهش ودفر العظام الي الجلاكين مستنداً علي الظلام وكان ما لا يحمد عقبه مع ماء البير الممزوج بالقطران المدهن به الحبل والقربه تفاعلات الكمياء ما بين طعم القطران ولحم التيس الهش وعينك ما تشوف الا النور ومن ديك فرق لحم التيس ذي فراق الطريفي لجملو وصحيح اللوري حل بيي

ود الطاهر إليك ما استفدت منه من قصتك اللذيذة:

1/ إنك كنتا دنى وطفس طفاسة ..
2/ كنتا قاسى القلب ولا ترحم كبيرا..
3/ كنتا كسلان جدا لقيت الموية طعما متغير وبرضو شربتها..
4/ موية البير ولحم التيس أدبوك أدب المدايح وبالنهاية بقيت ولد كويس واستاذ تمام.."وسلم ليا على الوالدة"..
هسى الصفات الزى وشى دى فى داعى تفضح بيها نفسك؟؟والله تنفع حلقة فى" لا يا عزوز"..

[أشرف صلاح السعيد]

عن اذنك يا اشرف

بس تصحيح للمعني للخرباش الصندوق الفوق اللوري اسمو (((((التندة)))) يا حلو

ود الجعلى يعنى لازم تشير انو ود مدثر بقى حنكوش بقعدة الخرتوم يااخى؟..ما فى ردى عليو وصلت ليو التندة وربطها ليو بتايتنك مجارارة مع الخرتمة وكدا وبكون لقطة يااخ..

[أشرف صلاح السعيد]

المبدع أشرف
لك التحية و أنت تعطر أجواء المنتدى بكلماتك
ولا يهمك إنت واصل وربنا معانا
أهم شئ راحة من في المنتدى

هوووى يا ناس امان البرى ما جاكم جية ووحاتكم الاستيكة بفوتا بهناك..

[أشرف صلاح السعيد]

وحقيقة أروع شئ السفر باللوري ورجعتني لأيام زمان
لما السفر كان باللوري وما أنسى فرحتي وأنا أركب ورى رغم اصرار الجميع على ركوب قدام
وما أنسى كمان في مرة من المرات ونحن مسافرين للشمالية لزيارة جدتي لما ضل اللوري طريقه
والصحراء واسعة لا ماء ولا ذاد فقد نفذ المعانا حتى لاح في الافق ضوء وووجدنا الطريق في اليوم الرابع

أدينا التفاصيل ..قصتك التلغراف دى كدا ما بتخارج..إنداحى هو الكلام بقروش؟؟..

[أشرف صلاح السعيد]

وما انسى كمان خبر وفاة ابن عمتي وهو سائق لوري عندما ضلوا الطريق هو والكمساري المعاه من الجوع والعطش
وبحثوا عنهم في الصحراء بالهيلكوبتر حتى وجدوهم والغربان تنهش في جثثهم
اللللللللللللللللللللللللله يا أشرف رجعتنا لأيام جميلة وحلوة
ونسيتنا المنافسة للفوز

الله يرحم فقيدكم وموتى المسلمين..
يعنى شنو الملاوزات دى يعنى نفك الرورى دا هسى ولا شنو وقت القصة بتجبلها موت..
اديتك المقترح واستنيتك يوم كااامل اها تانى اتقطع؟؟..اليوم بزمن الدشششة"من دِش" بقى بيعادل سنة وحليل زمن الدششة "من دُش" والمهلة..

[سماحة]

والله يا أشرف أخوي أنا في محاضرة وبكتب ليك يعني يمكن تلقى كلام غلط
بس قصة اللوري دي شدتني وبديت أكتب
وفي داخلي كلام كتير

[خالد 000 ابقرجة]

فاصل اعلانى..

اللورى حل بيى دلانى أنّا فى الودى..
حبيبى جننى..
حبيبى ود الناس بقى ليا وناس..









همسة: سماحة وابو آية دقستو يا فرد..

أنا ما رااااااضي 000

البوست ده حقي 000 (ود النور تغيرو بي إسمي هسيييييييي دي )

تاني ما حا أضرب ليك نلفون


عارف أطتر حاجة زمان كانت بتعجبني في اللواري 000

المساعد الشفت 000

لمن يكون متلب من فوق 000

يدينو لي تحت ما سك فبي الحديد 000

وقالب نص هوبة للواطة 000 ( علي وزن نص طوبة ) 000

بجيك تاني 000

ما حا أسافر 000

حا ابقي ليكم كومسنجي في الموقف 000

ألقط الفيها النصيب من المسافرين 000

ومن الراجعين 000

ألقط الخبورات 000

ياخي الكومسنجي ده لو بقي مراسل فضائية 000

أنسي بس 000

[أشرف صلاح السعيد]

والله يا أشرف أخوي أنا في محاضرة وبكتب ليك يعني يمكن تلقى كلام غلط
بس قصة اللوري دي شدتني وبديت أكتب
وفي داخلي كلام كتير

هووى يا شابة ركزى فى المحاضرة ما يقولو اللورى حل بيك فى الملاحق "الف بعد الشر"..
الغلط بتصلح ..ما شفتى اخوك كتب خطرا بدل خضرا "وعقبة وود المأذون" كشفو حالى كشف..كلنا بنصلح كلنا ..
انداحى واكتبى ولك منتظرون..

[أشرف صلاح السعيد]

أنا ما رااااااضي 000

البوست ده حقي 000 (ود النور تغيرو بي إسمي هسيييييييي دي )

تاني ما حا أضرب ليك نلفون


عارف أطتر حاجة زمان كانت بتعجبني في اللواري 000

المساعد الشفت 000

لمن يكون متلب من فوق 000

يدينو لي تحت ما سك فبي الحديد 000

وقالب نص هوبة للواطة 000 ( علي وزن نص طوبة ) 000

بجيك تاني 000

ما حا أسافر 000

حا ابقي ليكم كومسنجي في الموقف 000

ألقط الفيها النصيب من المسافرين 000

ومن الراجعين 000

ألقط الخبورات 000

ياخي الكومسنجي ده لو بقي مراسل فضائية 000

أنسي بس 000

الفردة الاحلى من وردة اب قرجة سلام..
بلغة الكماسرة الكاسرين فيك ضلعة:
شنو يا برينسة ما قالو ليك اهم شى الريتينزة؟
قلت بتجى بأبيض ضميرك وعملت لينا أضان جلد وحمد لبد ..قلنا لو استنينا بنتأخر وبتضيّع علينا القلبة والفردة ..
هووى يا أبو آية السلبطة عليك شنو؟ الرورى دا غير روريك ..روريك مكتوب عليو "السفر نية سمحة ولقية فرحة"..وانا روريى مكتوب عليو "تتصلح فى الطريق ولا اقوم أجيك"..
يااخى الطريق بتاع الروارى دا ما وسيع تعال بروريك النترافق الطريق..
والله بينى و بينك نص الهوبة فيها حركة إكروباتية..الجنى التقول قرد ظط ظطط تلاقيو تحت زى الما عمل حاجة..بس هووى يا ابو آية إياك تفكر تطبقا وتخلينا نتجارى من إستبالية لإستبالية "برية من الإستباليات" وأكان ولا بدن رصرصلك كدا اتناشر مرتبة والله كريم انت ونصيبك..

[الملكة اسماء ( ام محمد )]

خياااااااااانة

تشتروا لوري وماتعزموني ؟


مبروكات كتارات والله


تخريمة : انت يااستاذ اشرف الناس ماشيا لقدام وتشتري في البصات السياحية ماااااااالك راجع حركة وراء وجايب سيرة اللوري تاني ؟

الله يستر ماتنزل ناس مدني من الاتوز وترحلهم (بالكنتر - او كمايقال الدفار )



همسة اعجاب وشكر :
صراحة مساحة رائعة استشف من خلالها الكثير من الافكار
وقادمة باذن الله .. للتحليل و لسرد بعض شوار الذاكرة
احتراماتي

[أشرف صلاح السعيد]

الطوبة..

كنت حينها أعمل مع الفرقة البتنفذ فى بكبارى البتربط طريق القضارف دوكا..وأنا ماشى الى القضارف من قرية كساب كان قدامى لورى بيقيف كل مرة وبيشيل الركاب..والشارع كعب خلاص كان وانا ماشى وراو "تفحط ما فيو"..أها اللورى عدا بمرة لابسة توب أبيض وما وقف..قلتا فى نفسى يااخ السواق ما عايزة تتبشتن واللورى قدام بيكون اتملى ومافى مكان ليها والمرة كبيرة فى السن..وقفت للمرة الكبيرة "تقريبا مابين الخمسين والستين" وقلت ليها ماشة للقضارف يا والدة؟..فأجابت عليى بإنها متقدمة لقرية اخرى بالطريق..قمت قلت ليها اتفضلى ياوالدة ..الحاجة مشت بعيد عكس اتجاه البوكسى الحيكومى وشالت حاجة من الأرض وجات ركبت بعد أن فتحت لها الباب من الداخل لبساطتها فى التعامل مع العربات..وأتفاجأ بأنها تحمل بيدها حجر وقد وضعته بأرضية العربية قبل أن تركب..ودار حوار بينا:
أنا : يا والدة دا شنو.."انا ناقش الفكرة بس استهبلتا"..

هى : دا يا ولدى حجر..

انا : ليه شايلا ليك حجر؟..

هى : انتا يا ولدى ماعارف المرة عارضا "نحسها" معاها؟..وناس اللوارى اصلو ما بيخلو الواحدة لو براها تركب الا معاها حجرا..وهسى اللورى العدا دا وانا حتى بحجرى ابى يقيف ليا..

انا : ياامى دا كلام ما صاح والناس ديل ما بيفهمو شى وبيؤمنو بخرافات ..المرة هو فى زول زيها؟..ماهى الوالدة والزوجة والبت والاخت..وأكان هى عارض العارض بيلد عارض والراجل ببقى عارض زيها..

حاولت جاهدا ألا تدمع عينى ولكنها أبت إلا ذلك..تخيلو إمرأة جاوزت الخمسين قد أقنعها بعض أناس من مجتمعنا بأنها نحس..بأن ركوبها وحيدة مع الرجال ستجلب لهم المتاعب "أستغفر الله العظيم".."قالوا طآئركم معكم لئن لم تنتهوا لنرجمنكم وليمسنكم منا عذابا أليم"..غسلت عقول بعض النساء وأقنعن بنحسهن..

آآآه يا بلد لم الأم فيك تكون كسيرة
مغلوبة وصيروها زى البهيمة
ومن منو ؟ من الموضوع ألما وبى وجيعة
آآآه يا زمن يالحوا بقت فيك نحس
ومن رجال كفرو كسّر عقولم بؤس
وسياسى ومثقف بالكرسى محبوس حبس..

[الملكة اسماء ( ام محمد )]

غسلت عقول بعض النساء وأقنعن بنحسهن..

لا اعرف ماذا اقول لكني كنت اظن وحتى عهد قريب ان هذه خرافة وانها انتهت بنهاية عهد الجاهلية !!

والله شي يحير
زمن غريب صراحة

لما سمعت بداية القصة كنت متوقعة يكون السبب خوف بعض السواقين من قصص (الجن) والخرافات المتداولة احيانا عن ( فلان وقف العربية لواحد في الشارع اتضح انه _بعاتي_) وغيرها الكتير
اما قصة المرة والحجر دي جد غريبة
طيب علاقة الحجر بالنحس شنو ؟
عشان نشوف لينا ( طابوقة ) من الشارع بعد كدا