أفيدكم بأنني قد نمت بعد أن تعوذت من الشيطان الرجيم .. ورددت المعوذتين ... وكل الأدعية التي تحفظ النائم بما فيها دعاء "أعوذ بكلمات الله التامات كلهن من شر ما خلق" ... وأفيدكم بأنني ... نمت مطمئنا رغم الهم والغم الذي الذي سببته لي متابعة أخبار السودان ... والجزيرة .. والإنفصالات التي تلوح في الأفق !!!!
رغم ده كلو ... حلمت يا الحبان حلم مزعج !
السودان إتقسم
الغرب بقى دولة
والشرق بقى دولة
والجنوب بقى دولة
والشمال بقى دولة
من دوله واااااااااحده بقن أربعة دول
لكن ده كلو هين
أكتر حاجه أزعجتني في الحلم ده
موقف ناس الوسط أو ولاية الجزيرة أو أهل الجزيرة
لا عرفوا يمشوا على ناس الجنوب
ولا عرفوا يمشوا لى ناس الغرب
ولا عرفوا يمشوا لى ناس الشرق
ولا عرفوا يمشوا لى ناس الشمال
وبقت حالتهم صعبة جدا جدا
تلقى الجذورو من الشمالية مثلا .. زول إتولد في الجزيرة .. وجد جدو مدفون في الجزيرة وهو الزرع أرضها وعمرها وخدرها .. محتار ؟؟ يمشي وين يا أخوانا ؟؟
المهم .. ختونا في موقف صعب .. الإنفصاليين ديل "في الحلم طبعا"
آخر منظر شفتو في الحلم ده .. وإنتزعت نفسي منو إنتزاع عشان أصحى
كان
منظر أسر بكاااااااااااملها تشردت وتفرقت
مضت الأم لأهلها في الشمال
ومضى الأب لأهله في الشرق
وضاع الأبناء في مفترق الطرق
اللهم أجعله خير
ووقي وطننا العزيز .. شر الفتن ما ظهر منها وما بطن
وستظل جزيرة الخير والعطاء .. وأهلها الطيبون المتسامحون .. رمزا من رموز الوحدة في بلادي...... "صاعين نكيل الصاع .. وللسلم راياتنا"
اللهم أجعله خير،،،،
رد مع اقتباس
المشاركة الأصلية كتبت بواسطة العاقب مصباح
المفضلات