طيبتك للبلد

[محمد النور محمد يوسف]

طيبتك للبلد

جميل أن تجد ما لا تتوقعه عندما تبحث عن أشياء أخرى, في زمن تختلط فيه المفاهيم الجميلة بالشك, وتجد كيان لايوازي واقعك الغير مستقر , ذاك الكيان موجود أمامنا يفرض وجوده في دنيانا بخصائصه البسيطة.
إلى حبيبتي ,الخالة, والأم الوطن, المرأة السودان, الخاله مريم. التي تعد لنا الشاي ممزوجا بحنية وطن ضاربو الخريف , لابس توب الأهل أخضر نضيف , أمي مريم تجي تحكي ليها ومن الكلام كمان تضيف , بتضايق لضيقك وبتحسو وتشوفو فيها برضو ما بتقدر تقيف, تحكي همومك والقراية حتى كمان هم الرغيف , تجي مجمع السنتر في الجامعة ولازم عندها أول تقيف , قيلت كيف والصحة وقرايتك كيف؟ وما بتقدر تدس أو تعمل حريف أو إنك من الهم خفيف , حافظانا بنشرب شنو قهوة أو شايا خفيف , وتستر حالك لو كنت يوم فيهو المضيف .
ويوم تلقاها مافي كل يومك يضحى مافي ويبدا السؤال وينو مرساي الكنيف ؟ والشوق يولع ناراً في وكت المصيف , قلبك يقيف , ولمن تجي تحيى وتقيف. ما بقدر حتى أفكر كيف أشكرك يا مدرسة الأدب والفن الأصيل والدين الحنيف , وإنو كيف أفضل شريف تسلمي وطيبتك للبلد.

يا خالة يا مريم
الفجر عليك سلم
ووليدك اتكلم
حالف يمين يحلم
كل البلد تتلم
وسوداني بلد الهم
كل ده حيضحى وهم
ودمقراطي يبقى حكم
شان حالا يتحول
ونبدا من الأول
شرقي... أني بلدي
غربي... أني بلدي
شمالي... أني بلدي
جنوبي... أني بلدي
وأرجع من الأول
يا خالة يا مريم
الفجر عليك سلم
ووليدك اتكلم
حالف يمين يحلم
كل البلد تتلم
ونشيل منك هم
باسمك الأخضر
جوانا يتسطر
وريدك يتحكر

ابنك/

محمد النورمحمد يوسف
29\6\2009م

تم أخذ الصورة بواسطتي أنا محمد النور محمد يوسف قبل مدخل مدينة الأبيض

[أبوريلان]

المثل بقول
ود الفار حفار
صحي أديب من ظهر أديب
مرحب بيك في بيتك ووسط أهلك وناسك
وبداية موفقة يارب .

[النويري]

ليس مستغرباً أن تكون أبن الأستاذ الكبير فخر منتديات ودمدني وبنقول ليك ألف مرحب بيك محمد النور ذلك الشبل من ذاك الأسد دعواتنا لك بالتوفيق وما أجمل مدينة الأبيض عندما يأتي الخريف تمتزج الرمال بحلاوة أشجار القنقليذ وهنالك البان جديد وكل شيء جميل فيك يا مدينة الرمال

لك مني خالص التحيات والتقدير وتقبل مروري

[محمد النور محمد يوسف]

المثل بقول
ود الفار حفار
صحي أديب من ظهر أديب
مرحب بيك في بيتك ووسط أهلك وناسك
وبداية موفقة يارب .

الأستاذ ياسر عبدالرحمن
ليتني أصبح مثله ولكنكم جميما أساتذتي وأبائي فادعو لي بالتوفيق وان أستفيد من هالتكم المعرفية

[محمد النور محمد يوسف]

ليس مستغرباً أن تكون أبن الأستاذ الكبير فخر منتديات ودمدني وبنقول ليك ألف مرحب بيك محمد النور ذلك الشبل من ذاك الأسد دعواتنا لك بالتوفيق وما أجمل مدينة الأبيض عندما يأتي الخريف تمتزج الرمال بحلاوة أشجار القنقليذ وهنالك البان جديد وكل شيء جميل فيك يا مدينة الرمال

لك مني خالص التحيات والتقدير وتقبل مروري

الأستاذ الفاضل /النويري
كل التحايا والتقدير وأنتم ترسمون الابداع في أركان منتداكم العامر بكم, فجميل أن نستفيد من الكم المعرفي و الثقافي المتمثل في مقامكم السامي ,وأنتم من تسبقونا وتعاصرونا في تلك الأحلام المرتسمة في أذهاننا أن كيف يا سودان تجمع ابنائك حولك.
شكرا أستاذي

[ودالعمدة]

الابن محمد النور محمد يوسف

نعم كما قلت ياأخى طيبتك للبلد كما طيبتك البلد
كل المحبة لمريماتنا الأخرى الأم الخالة العمة والحبوبة
وحيث ترعرعنا فى مدرسة الأدب والفن الأصيل والدين الحنيف
وتعلمنا ليصبح كل منا أفضل شريف و تسلمي وطيبتك للبلد.
فكانت جذورنا عميقة وفروعنا فى السماء مثل التبلدى ..
وكل من تمسك بالجذور تعلق بالسماء ..
وفقك الله و ننتظر منك الكثير طالما نهلت من بحر اسمه ( النور محمد يوسف )

[محمد النور محمد يوسف]

الابن محمد النور محمد يوسف

نعم كما قلت ياأخى طيبتك للبلد كما طيبتك البلد
كل المحبة لمريماتنا الأخرى الأم الخالة العمة والحبوبة
وحيث ترعرعنا فى مدرسة الأدب والفن الأصيل والدين الحنيف
وتعلمنا ليصبح كل منا أفضل شريف و تسلمي وطيبتك للبلد.
فكانت جذورنا عميقة وفروعنا فى السماء مثل التبلدى ..
وكل من تمسك بالجذور تعلق بالسماء ..
وفقك الله و ننتظر منك الكثير طالما نهلت من بحر اسمه ( النور محمد يوسف )

الأستاذ العمدة/ ودالعمدة
لك مني كل التحيات الطيبات وأشكرك على الأمنيات الطيبات لكل مهيرة ولكل خالة مريم فكل سودانية تملك داخلها خالة مريم تساعدنا على تحمل ملامح الغبش المتحكرة في الوطن وواعدانا ببكرة جديد
لك جزيل الشكر

[درديري كباشي]

سلام ما شاء الله يا ولدنا محمد

داخل علينا بشبحات كبيرة تبشر بمقدم شبل بقلب اسد

اتجلى ونحن نكتف ونستمع ونستمتع


حروفك تنم عما تحتها عن موهبة ستتفجر ويستبشر بها منتدى ودمدني

[عبدالله محمد العقاد]

الحبيب محمد النور

حياك الله في منتديات ودمدني والتحية عبرك لشيخ النور ( والدك )

حقيقة البوست اول ما نزل انا اطلعت عليه و يبدو لي كان نازل باسم والدك شيخ النور
و لا انا يا جماعة اخر النهار دائما بانعس شوية ( و بلخبط )
حتى الان لما رجعت استغربت اسم شيخ النور اتغير ليه
مرحب اخي محمد و سعداء بانضمامك لمنتديات ودمدني
ونقول هذا الطيب من ذاك الصندل

[عبدالله محمد العقاد]

[quote=محمد النور محمد يوسف;447663]

طيبتك للبلد


يا خالة يا مريم
الفجر عليك سلم
ووليدك اتكلم
حالف يمين يحلم
كل البلد تتلم
وسوداني بلد الهم
كل ده حيضحى وهم
ودمقراطي يبقى حكم
شان حالا يتحول
ونبدا من الأول
شرقي... أني بلدي
غربي... أني بلدي
شمالي... أني بلدي
جنوبي... أني بلدي
وأرجع من الأول
يا خالة يا مريم
الفجر عليك سلم
ووليدك اتكلم
حالف يمين يحلم
كل البلد تتلم
ونشيل منك هم
باسمك الأخضر
جوانا يتسطر
وريدك يتحكر

ابنك/

محمد النورمحمد يوسف
29\6\2009م

الحبيب محمد النور

نشكر لك هذه المشاعر الطيبة التي تفيض بها لتنشر عادات الطيبة و تقاليدنا الاصيلة

أذكر كان عندنا خالة في المدرسة الثانوية كبيرة في سنها فراشة و بتسوي الشاي و كان دائما بنشرب عندها الشاي بعد صلاة الظهر
مرة ونحن وقوف عندها بنشرب الشاي سحبت القلم من زميلي من جيبه الخلفي و نحن مجموعة في شكل دائرة ( نشلته يعني )
و كان الخالة شاهد على ما عملت
و التفت الي صديقي و قال لي اديني القلم باعتباري اكثرهم هذار
و قلت ليه ما شلته انا ياخي
و التفت على الخالة لكي يستفسرها
فما كان مني في حركة تلقائي ( ان غمزت للخالة بعيني ) عشان ما تقول الحقيقة لصاحبي
و لدهشتي و دهشة الجميع دخلت الخالة في حالة من الضحك العميق
بعدها كلنا ضحكنا لضحكها و بعدها اعدت القلم لصاحبي دون كلام
و حقيقة انا سعادتي كانت كبيرة كون قدرت ادخل الفرح لقلب هذا الخالة ولو للحظات بسيطة تمثلت في ضحكها من الاعماق

[ابوالنور]

طيبتك للبلد

جميل أن تجد ما لا تتوقعه عندما تبحث عن أشياء أخرى, في زمن تختلط فيه المفاهيم الجميلة بالشك, وتجد كيان لايوازي واقعك الغير مستقر , ذاك الكيان موجود أمامنا يفرض وجوده في دنيانا بخصائصه البسيطة.

مرحب بأبن الكبير ود العم
ان شاءالله الدار ترحب بيك

[محمد النور محمد يوسف]

أستاذي /عبدالله محمد العقاد
جميعنا سوداني, ينبش باحثا السعادة ولو كانت معنوية ان لم نستطع, لنبثها داخل بعضنا, مالئين أجواءنا وذكرياتنا بما هو مشهود لنا من طيبة وسماحة مجتمعنا على طول امتداد أجياله. فلنتمنا أن...نلقا البلد اضحت ناس قادرة تدي الحب الصافي والدواخل النقية برغم الوضع الحرن ,وأن نلقا كل الناس خالتي مريم , تلك المراه مربية الأيتام والطلبة , مع ذلك لا يجهدها العطاء , حالها كحال كل أم سودانية.
فلك مني كل التحية والشكر والتقدير.

[محمد النور محمد يوسف]

سلام ما شاء الله يا ولدنا محمد

داخل علينا بشبحات كبيرة تبشر بمقدم شبل بقلب اسد

اتجلى ونحن نكتف ونستمع ونستمتع


حروفك تنم عما تحتها عن موهبة ستتفجر ويستبشر بها منتدى ودمدني

أستاذي الجليل/درديري كباشي
كل عام وأنت بخير
وفي الحقيقة انتم هم من تنيرون سماء المنتديات السودانية
وذلك بزخمكم الثقافي المتجلي في اعمالكم الثقافية والتى أتمنى أن أستفيد منها وكل من في المنتدى شكرا يا أساتذتنا الأجلاء

[محمد النور محمد يوسف]

مرحب بأبن الكبير ود العم
ان شاءالله الدار ترحب بيك

أستاذي الموقر/ابو النور
أشكركم لترحيبكم لي يا أصحاب الدار العامرة بيكم
واقول ليك...
كل النور باين في اسمك
وحأسلك دروب الريد برسمك
حاشاك شر يقدر يقسمك
الفيك بصوت ولو كان بصمتك

شكرا لترحيبكم جميعا

[moh_alnour]

بلدا ً هيلي نا دموعا دموعي نا
أساها أساي نا ضميرا ضميري نا
كل أمالي نا السلام يملاها يطلع من هنا
و الحمام يتشابى
= = = =
تقدل طفلة حلوة و بين إيديها كِتابا
و الحبوبة تمسح بالحنين أتوابا
و القمرية تصدح تستريح دبابة
و القطر القبيل يمشي و يشق الغابة
البالمبو يفتح للقلوب أبوابا
و النُقارة زي أم كيكي و الربّابة
= = = =
البلد الحنين سميتو يُمَّة و يابا
بين العالمين عزة و جمال و مهابة
الحُزن القديم تمطر تزيلو سحابة
لا أطفال حزانة لا نازحين و غلابة
= = = =
في العصرية شُفع جارية لي ألعابا
و الشاي في المغارب ذكرياتو صبابة
أشجار التبلدي العامرة بالترحابا
و أشجار النخيل و قُدرتا الخلاّبة
= = = =
ناس من كل لون إتعمّرت أنسابا
و النيل في الهجير دوَّزن وتر أعصابا
سمحة الدنيا بيك و بين إيدينا حبابا
يانا أهل بلدنا و قُدرتم غلاَّبة

<object width="425" height="344"><param name="movie" value="http://www.youtube.com/v/sjJFEL9023Y&hl=en_US&fs=1&"></param><param name="allowFullScreen" value="true"></param><param name="allowscriptaccess" value="always"></param><embed src="http://www.youtube.com/v/sjJFEL9023Y&hl=en_US&fs=1&" type="application/x-shockwave-flash" allowscriptaccess="always" allowfullscreen="true" width="425" height="344"></embed></object>

الأخ : محمد النور محمد يوسف
كما ذكر الأخوة فأنت شبل من ذاك الأسد الهصور الذي زمجر فابدع و ملأ المنتدى موضوعات خالدة
أهلته لأن يكون نجم كل الشهور بلا مُنازع و هو ولا شك نجم نفخر بتواجده بيننا
فأهلا ً و مرحب بك أمتداد لذلك الإبداع الذي لا ينضب ومرحب بك قلم متميز بداياته القوية تؤكد ذلك

[محمد النور محمد يوسف]

الأستاذ الموقر/ moh_alnour
كل عام وأنتم بخير أشكرك لمشاركتك الرائعة
وأقول بلدا ً هيلنا نحن ليلنا كلنا, بلدا حيسعنا كلنا
بلدا حيقبلنا كلنا بلدا بيتتكون وحيتكون في دوخلنا كل ثانية
بلدا حنبنيه جوا العيون بلدا فداه كل القلوب.

[أبوبكرحامد]

السامق إبن الأسمق محمد النور محمد يوسف ............ تحايا ومودّة

سعادتى لاتوصف بهذا العطاء والإبداع المستمد من والدكم القامة النور محمد يوسف ، حق لنا أن نسعد بتوالى الإبداع ، يدهشنى فى سباقات التتابع تواصل العطاء بين السابق واللاحق فى مسعى حميم لبلوغ ذرى المجد والنجاح ، وهكذا أراك مواصلاً لعطاء صديقى الرائع النور محمد يوسف وهو عطاء نرجوه متصلاً ومجسراً للهوة التى تفصل بين إبداعات الأجيال المتعاقبة ، كل الأمنيات لك بالتوفيق والسداد ولن أسرف فى نصحك وإرشادك فدونك النور محمد يوسف الذى ننهل جميعاً من معين عطاءه الذى لن ينضب بحوله تعالى.

[ابوالنور]

أستاذي الموقر/ابو النور

أشكركم لترحيبكم لي يا أصحاب الدار العامرة بيكم
واقول ليك...
كل النور باين في اسمك
وحأسلك دروب الريد برسمك
حاشاك شر يقدر يقسمك
الفيك بصوت ولو كان بصمتك

شكرا لترحيبكم جميعا

طاف الخيال كايس حروفك يا جنا عشان الوانك يخططا
لقاها كلها ما بتليق بالنسبة ليك ما منصفة
بس كلمة وحدة بحبها المنتدي بريدا و بهتفا
هي انت ضيف عزيز وموضوع واحد ما كفا
مرحب بجدو كناية عن تركيب الاسم

[محمد النور محمد يوسف]

أشراف وقامات المنتديات السودانية
/أبوبكر حامد
و
/أبو النور
والله تشرفت كثيرا فرحت جدا بمشاركتم معي في هذا البوست
ووالله لم أكن يوما أحلم بأن أجتمع بهالات ومقامات مثل مقاماتكم السامقة والشامخة شموخ بلادي
أنتو ناس الفرحة جيتو لا المدامع وقفتكم ولا الحكايات الحزينة
ووعدا لكم بأني سأقدم أقصى ما عندي لنتشارك جميعنا في إزدهار المنتدى
لأني لست ضيفا فيه بل هو مسكني الجديد إنشاء الله
شكرا كتييييييير.

[أبوبكرحامد]

أشراف وقامات المنتديات السودانية
/أبوبكر حامد
و
/أبو النور

لأني لست ضيفا فيه بل هو مسكني الجديد إنشاء الله
شكرا كتييييييير.

يازول ده مسكنك منذ بدء الخليقة ، مادمت إبن الرجل القامة النور محمد يوسف فلديك عود رجال وحق شفعة لأن أباك سكن الحنايا قبل البوستات فله كل التركة فى علم مواريث العشق.

[النور محمد يوسف]

ورسالتي عبركم الى الخالة مريم ...كفيتِ وأوفيتِ وماقاله محمد الا غيض من فيض...فلماذا لاتكون مريم كما رآها محمد حنية ومودة وكفاح وتضحية مادام الرجال هنا امثال الاساتذة ياسر عبدالرحمن (ابوريلان) النويري وودالعمدة ودرديري وعبدالله العقاد وابوالنور ومحمد النور ودالجاك ومحور المنتدى واساس حراكه أبوبكرحامد ... يتفاعلون مع كلمة حنان من مريم ومع كل فلس حلال من مريم ومع كل سؤال عن اولادها الطلاب مريم وتعبها في تربية الايتام مريم...اليك تحيتي مريم واسمى النياشين وارقاها اليك مريم من ابنائك الرجال أعلاه:

رجال في الملمات ...في العوزة ديمة كــرام
رجال اذا ما دق النحاس زي الاســـود قــدام
ما فيهم الفـــــــــزرة في الحارة ضُّــمة تمـام

وقديما ابني محمد قلت عن مدني واهل مدني مخاطبا اخي الوليد عمر شاعر الجدعات الهميم وهو من اولاد ودعشا جنوب بركات وابن اخت استاذي عبدالعزيز درسني بالحوش المتوسطة مادة اللغة الانجليزية ..والذي اتمنى ان يعود لاثراء المنتدى بكلماته ومواضيعه وجدعاته الفطرية الفكرية المسبوكة ...قلت لوليد عن ناس مدني:

مليون قطرة دم كتيرة تب في شــــــــاني
لكن يا العزيز من دمي هاك .... ما ببــالي
ليكا وكل زول .....بمدني شاغــــــل بالي
ناس المروءة الزين مزارعي والتربـــالي
ناس العلم والراي العلماء ما جهــــــــالي
مليون قطرة دم بديها ما همـــــــــــــاني
ديل البسندو قفاي ديل البربو عيـــــــالي
ديل البكرمو الضيف ديل العشم والفـــالي
واكرم يا الوليد عقبا أرح طــــــــــــــوَّالي

أوَ لستُ محقا في هذا القول عنهم يامحمد؟؟

[محمد النور محمد يوسف]

أوَ لستُ محقا في هذا القول عنهم يامحمد؟؟

ا

الوالد العزيز الموقر/ النور محمد يوسف
لك كل التحايا والأشواق ,ووالله محق تماما في ما قلته عن هؤلاء الصفوة من الرجال, الذين هم ركائز ثقافية وأدبية وفنية وأكاديمية بل هم سودان مصغر ,فيه من الحنية والوذوق والشهامة ما يكفي وطنا الكبير السودان. ربنا يعطيهم الصحة والعافية والرزق الكريم.
وعبر مشاركة الوالد النور, أشكركم جميعا على إثراء هذا البوست, الغني بقامتكم الراسخة ,فأنتم أشبعتم أكثر من طموحي ,فأنا قصدت بأن تكون أول مشاركة بهذا الموضوع,تقديرا ووفاء لأمي مريم وأمثال أمي مريم ,وأعد بتقدم المزيد إنشاء الله.



لو شئت بلادي... لنثرت دمي حروف إسمك السودانوي