الماديات اصبحت تشكل اولويات الحياة في قروش انت في مافي قروش انت لا وجود لك الحب بدون قروش مسيخ مشيتك في الشارع وجيبك فاضي تكون مدنقر راسك وماشى بحزن زي العامل ليك عمله خجلان منها في البيت لو احد الابناء او البنات قال عايز حاجة وقلت ليهوا والله ما معاي قروش دي مصيبة كبيره لو حاولت تزوق بي ما عندي فكه تلقي الحلول جاهزه الولد في البيت قال عايز ليهو خمسين ريال اشتري سيديهات بلي استيشن فعلا كان ما معاي قروش قلته ليهو ما عندي فكه عندي مئتين ريال مشي مني باعتقادي اتفكيت منوا جاني بعد دقيقتين شايل حصاله فتحا طلع 150 ريال قال لي هاك جيب المئتين... ديل اولاد الزمن ده اما ست البيت كان راجل قول ما عندي قروش ولا مفلس تسمع كلام بس مافي داعي نخليها مستوره ده علي الصعيد المنزلي لو الظروف خلتك عذابي وقررت فجأة تمشي تخطب ليك بت ناس ياما تشوف العجب اول اقولواليك والله احنا بسيطين والزواج البسيط ربنا بباركو طبعا ده كلوا تدردق لمان تقع في الشبكه وقت تجي بصفه رسميه اتغابوا فيك العرفه اول حاجه من اهلك اجو للخطوبه تلقي الابو قاعد اتنحنح ليك:
والله يا جماعه فاجأتونا البت لسع في الجامعه لاكن مافي مشكله البريدوا الله كلوا خير وانا ما من الاهل البضعو شروط صعبه لاكن الاصول اصول.
تعال شوف الطلبات شيء مبالغه يا تتورط تشيل سلفية من البنك أو تكون حرامي او تكون كذاب بتاع وعود تدودر الجماعه بالكذب والاعتذارات لما تزوج والاخيره افضل طريقه بس عايزه ليها محاور جيد خلاف ذلك بتبوظ كل شيء زي حكاية واحد قالوا عايز اتزوج هو عدامان التكتحوا ما عندوا كلها قميصين بمشي بيهم الشغل اصدقائه كلهم عدمانيين مافيهم زول اخلي العين مليانه كان واحد كده فيهوا رقشه شويه عيبوا بتاع مبالغات وكذاب ...قال اهو الزول ده اسوقوا معاي منها لو دخلته في ورطه اطلعني بالاضافة للشكل مقبول شويه.
بعد ما مشوا وشربواعصير الليمون جاتم ام البت ....الله اكبر... الدفار جاء.... قعدت قدام العريس وصاحبو هاك يا اسئله:
يا ولدي انت عندك بيت ولا بتاجر....
نطه صاحبو الراجل ده بيت شنو عندوا بيوت ورثه ده سؤال يا حاجه
العريس شاف الزول ده بي طريقتوا دي بجيب اجلوا عايز اثبتوا ادقوا بي كراعوا واتنحنح ........
والله ما شاء طيب سد المال كم
نط صاحبنا كم دي ما عليها خلاف حقو انتي تناقشي يا حاجة بالعملة المحلية ولا الدولار انا افضل مع الازمة الاقتصادية وجنيهنا الما بأكل عيش ده يوم طالع ويوم واطي مع الاعتزار يا حاجه نفضل دولار ممكن كمان باليورو وباقي المبلغ اسهم بسعر الاصدار تخليها العروس لليوم الاسود.
العريس بي رجلو ضربه شديده معاها تنحنه...........
طيب شهر العسل وين يا ولدي امريكا
نط صاحبنا يا حاجة انتي من زمن امريكا طلعت جزر المالديف وبروناي دي الاماكن السياحية امريكا دي بعدين للولاده عشان الاولاد ياخذوا الجنسية طوالي .
تاني ضربه شديده معاها تنحنه...........
هي يا ولدي لاكن ماشاءالله الولاده الفي امريكا دي... ده العرس الصاح ((ده الشغل يا ولدي))
نط صاحبنا شوفي يا حاجة والله احنا اسماء هنا دي ذاتا عندنا فيها راي انا كان العريس بسمع كلامي اسمي مادونا وجاكسون.
العريس شاف الزول ده بي طريقتوا دي بجيب اجلوا والامور ما ماشه تمام راح بي تحت مديهوا شلوت عديل معاها كحه شديد..............
ام العروس يا ولدي انت مالك عندك نزلة برد بعد الشر عيك تتنحنح وتكح من قبيل
نط صاحبنا والله يا حاجه ده عندوا تيبي وصدروا ده ما خلا ليهوا مرض من امراض الصدريه ما عندو الله اشفي.
رد مع اقتباس
المشاركة الأصلية كتبت بواسطة عباس الدسيس
حاجات كثيرة تحبط وتؤلم الشباب وأصبح الشجص يتحسس رصيده في البنك قبل ان يفكر في طرق الباب خاطبا وقد يستخدم بعض الحيل ويستعير بعض الاكازيب في سبيل اتمام زواجه مضطرا واضعا أسرة الفتاة امام امر واقع كان بعيدا عن الواقع كثيرا ... حقيقة زمن غريب وعجيب شكرا يا عباس الدسيس
المفضلات