هل ناس مدنى متحضرين

[mutasim]

هل صحيح ناس مدنى متحضرين ؟

قبل سنه تقريبا كنت فى القنصليه السودانيه بجده لتجديد الجواز والموضوع اخذ زمن طويل جدا واتعرفت على شخصين كانوا جالسين بالقرب منى وعرفت ان احدهم صحفى مراسل لجريدة الخرطوم وكانوا بتكلموا عن الفنانين وعن القوات المسلحه وشاركتهم فى بعض المواضيع وهم من النوعيه المثقفه حديثهم جميل خلانا نتحمل التاخير واخيرا طلعت جوازاتنا مع بعض كنا اخر ناس تتطلع جوازاتهم المهم فى الامر لما جيت اودعهم سالونى انت من وين لما عرفوا انى من مدنى لاحظت عليهم نظره غريبه وبعدها ردد احدهم عدة مرات ناس مدنى ناس متحضرين مدنى فيها حضارة وكمان قالها باللغه الانجليزيه صدقونى ماعرفت اقول ليه شنو

هل الكلام ده صحيح عايزين رائكم ياناس مدنى واذا صحيح ماهى الاسباب ؟

[محمد السني دفع الله]

معتصم اخوي العزيز وغالي
ليك المحبة يا ابو الحضارة زاتا
مافهمت عليك زي ما بقولو اصحابنا من بلاد الفينيق
يعني اخر سطرين ما فهمتهم !!
مافي ادوات ترقيم ، لنفهم الموضوع !!
هل هم بعد اتونسوا معاك ، اندهشوا من فهمك واستغربوا انك من مدني ؟؟
ولا اتأكدوا من طريقة كلامك معاهم انك فعلا من مدني الحضارة ؟؟؟
انا متاكد انهم حسوا باللطف ،والرقة الفيك ،وعرفوا انو ده طبع واحد متحضر ،ولازم يكون من مدني ....
وطبعا اصحاب الشفتنه ،،والناس التفتيحة ...برضو ناس مدني ...
ويقال انو الناس الواقعة من السما سبعة مرات ....!!! بلزوهم من فوق ،،،،شـــفــــوت مدني ....

[محمد السني دفع الله]

مدني مدينة اتخلقت بي جمال
يعني حينما اسسها الشيخ الولي الصالح ..
(( محمد مدني السني ))
كانت مجرد غابات ،توسطها ،واقام مدرسته الصوفية فيها ،وتجمع الناس حوله طلبا للعلم ..
فأمها طلاب العلم ..وكان من صفات طالبي العلم الأدب ،وحسن الطباع، والشغف بالبحث عن الحقيقة ..
وهذه صفات ناس اتصفوا بالنظافة في البدن، والثياب ،والضمائر. .لهذا توحدوا من كل الجهات التي جاءوا منها ،
ومازال هذه هو ديدنهم ،الى ان اكتشفوا المدينة الحديثة ،واسسوا المشاريع الزراعية ،وجاء العمال للمحالج، والزراع واللقاط ، فوجدوا بلدا تضمهم بحنية ،وتعتبرهم من اهلها ،لتمتد المدينة من مدابغ الجلود الى قرية(( توتو ماتا ))يها كل الوان الطيف السوداني ولكن بعد عاشوا فيها كلهم يقولون لك
انا من مــــــدنـــــــي

[ahmed algam]

مدني الجمال

مدني الثقافة

مدني الزوق والفهم



اهاااااا يامدني

[mutasim]

الاخ السنى فنانا البنفتخر بيهو تحياتى ليك
الحقيقه اننا سمعنا الكلام ده كثير فيحتاج لوقفه مننا
قبل كده الشاعر ابو امنه حامد كان بعمل فى مدنى ضابط شرطه ولما اتنقل منها قال نفس الكلام ناس مدنى ناس سيفيلايزيشن متحضرين
وايضا المهندس صلاح طه المدير الاسبق لاذاعة مدنى كتب كلام كثير فى احد الصحف بعد نقله من مدنى
الراجل قال مادفع حق الفطور ابدا ولا حق الغسيل وما كان عارف مين البدفع الى ان قادر مدنى

وانا لما سمعت الكلام من الاخ فى القنصليه تفاجات لان الحوار بيناتنا كان عادى .

عشان كده طرحت الموضوع للنقاش وانت كنت اول المساهمين
وانا بعتقد انو مدنى اول مدينه سودانيه او جنوب الصحراء تدخلها حضارة البحر الابيض المتوسط مع دخول محمد على السودان طبعا جيش محمد على كان من المرتزقه الاروبيون والشوام واتخذوا مدنى عاصمه لمدة خمسه سنوات وبعد نقل العاصمه لم يرحلوا جميعا فكان لهم اثر كبير مع الاثر الذى تركه الشيخ مدنى السنى وهو التعليم

[mutasim]

مدني الجمال

مدني الثقافة

مدني الزوق والفهم



اهاااااا يامدني

مرحبا بالاخ احمد ابن مدنى
فعلا مدنى حضاره وفن وزوق
الله فوق مدنى

[بنت النيل]

فعلا وبدون تحيز لي مدينتنا الغالية فانا شايفة انو ناس ناس مدني ارقى ناس
من ناحية التعامل مع الاخرين
وهم فعلا ناس مثقفين ويكفي بس الاعلام الموجودين في المنتدى
وانا بتمنى انو جيلنا والجيل البعدنا يواصل في نفس طريقهم ويستلم منهم الراية
بعد عمر طويل ان شاء الله

[mutasim]

فعلا وبدون تحيز لي مدينتنا الغالية فانا شايفة انو ناس ناس مدني ارقى ناس
من ناحية التعامل مع الاخرين
وهم فعلا ناس مثقفين ويكفي بس الاعلام الموجودين في المنتدى
وانا بتمنى انو جيلنا والجيل البعدنا يواصل في نفس طريقهم ويستلم منهم الراية
بعد عمر طويل ان شاء الله

تحياتى بت النيل
وانا معاك بتمنى ان يتواصل حمل الرايه بين الاجيال

[محمد السني دفع الله]