بالجد كدا فى ناس جميلة ووسيمة كيف!!
تملاك فرح تملاك سماح
مرات يخش فى حياتك زول يطول عمرك
ومرات تخش فى حياة
زول تقر عمرو وتملاهو نكد
ناس تهش ناموس هواك
وناس تجيب القمرا ليك
بالاماني تضوي ليل نيلك جواك
بالموده الليها ساهر
شان جرد الحزن ناتج هواي وهواك حب
شفتو فى ناس جميلة كيف ؟؟
ناس تشوت ضربات قليبك جزا ناس تحرز اهداف مناك وفاء
ناس تشجع شان تفوز
وناس تفلع شان تنكس بيرق هواك
شفتو فى ناس كيف؟؟ يقصرو العمر
وانت بس الله ليك منهم !!
ناس تعوس المره كسرة
وناس تبع مشروع حلم مشروع جزيرة
وناس تقسم الوطن الكبير كيمان مراره
وانت ياكا البالع المراره
وانت يا النيل الحزين ماك عارف تمشى وين ؟؟
والناس دى غير الخراب ماليها شى
شفتو ديل بس الله ليك منهم !!
ناس تكفكف دمع عنيك
وناس تفتح لبق جداولا
ناس تزف اجمل بشارة
وناس غير الموات ما تزف ليك
وانت بس الله ليك
ناس تدك حصون العناء وناس تزيد دفق العزاب
ناس تكون شان تضوى ليك وناس ترمد فى عنيك
وانت بس الله ليك
ناس بتضرب شان تعالجك
وناس بتضرب شان تمرضك
وانت بس الله ليك
ناس تشارك عشان تآزر
وناس تشارك عشان تفازر
وناس تشارك عشان تشاكل
وناس تشارك عشان تعال
ناس تجيب ليك العزاب
وناس غير الضحك والقرقراب
مافى مشاركات
شفتو فى ناس جميلة كيف ؟؟
رد مع اقتباس
المشاركة الأصلية كتبت بواسطة ابوالنور
المفضلات