قررت أقابل لي ديكتور نفساني . . أحكي ليهو الحاصل لي في الليام دي . . الليام دي وكت أنوم . . قاعد أحلم أحلام مزعجة خلاس . . و الأحلام القاعدة تجيني في النوم دي . . كلها أحلام مكوجنة و ملخبتة . . يعني مرة حلمت شفت لي صفحة جريدة شايلاها الهبوب . . قعدت أضحك براي . . قلتا اتلقي دي جريدة قووون . . القبحة فوقا جريدة . . لاكين وكت دققت النظر في الجريدة دي . . لقيتها دي ما جريدة قووون . . لكنها ورقة أم عشرة تالاف . . عضيت جلابيتي بي سنوني و جريت وراء العشرة تالاف. . أثناء ما أنا جاري أسمع صوت بي وراي دب دب دب . . اتلفتا وراء . . لقيت لي حمار و زرافة و كديسة جاريات عشان يقبضن الورقة أم عشرة تالاف . . أنا جاري و الحمار و الزرافة و الكديسة جاريات وراي . . الحمار لحقني قبل الزرافة و الكديسة . . قام عضاني من فقرتي . . و جدعني في الهواء . . و قام طار فووووق و ضرني دبل كيك . . لقيت روحي طاير في الهواء . . جات سمبرية لابسة نضارت . . شافتني أسبح في الهواء . . قبضتني بي كرعينها . . و طارت بي . . و أثناء ما هي طايرة و أن ماسك في كرعينها . . قالت لي يا فيفيد الليلة عيلا تديني بوسة من جضمك دا . . قمتا خليت السمبرية تشيل ليها بوسة من جضمي اليمين . . البوسة ظنيتا ما عجبتها . . صرخت . . يا فيفيد طعمك متل الفقوسة النية . . زعلت مني . . رمتني . . و أثناء ما أنا واقع . . شافتني هبوب لابدة وراء شدرة نيمة . . شافتني و أنا طاير في الهواء . . الهبوب حنت علي حالي . . قامت نفخت جضومها . . و أفففففففففف . . نفخت لي سروالي . . و سروالي بقى متل البارشوت . . لامن نزلت بي البارشوت حقي . . لقيت روحي ماسك في قرينات الزرافة . . و الزرافة راكبة فوق ضهر الحمار . . و الحمار راكب فوق ضهر الكديسة . . و الورقة أم عشرة تالاف مغروزة فوق قرن من قرينات الزرافة . . و مقدودة من نصها . . مرقت العشرة تالاف من قرن الزرافة. . عاينت ليها . . لقيتها ما عشرة تالاف . . لقيتا جريدة قووون.
بعدين . . مرة شفت جبارة أب كرشة ماشي في نص الشارع . . قلت أهاظرو شوية . . كوركت ليهو . . يا جبااااارة أب كرشششششة . . و قمت جاري . . جبارة العوير جاء جاري وراي . . قبضني خنقني لامن عيوني وقعن جمب نخريني . . قال لي . . يا فيفيد . . تاني كان قلت لي أب كرشة . . رقبتك دي بكسرها ليك كعععع . . النصيبة . . جبارة أب كرشة دا بقى كل ما يشوفني يجي يخنقني . . حتى كان ما قلت ليهو يا أب كرشة . . الحكاية دي ضايقتني شديد . . و شدة ما ضايقتني جبارة أب كرشة دا بقى يجيني في النوم . . بقيت كل ما أنوم بحلم بي جبارة أب كرشة و هو قاعد يخنق فيني . . الحكاية دي ضايقتني شديد . . و أنا من يومي أحلامي مجوبكة و ملخبتة . . اليوم داك مشيت لي عرس عباس ود محمدين . . لقيت لي عندهم سرير . . قلت آخد لي غمدة فوق سرير ناس عباس دا . . رقدتا نمتا . . حلمتا لي حلم لا ليهو راص لا قعر . . حلمت أني قاعد أحلم . . شوفتو النصيبة دي؟؟؟ . . حلمين متداخلات مع بعض . . و في الحلمين جبارة أب كراع قاعد يخنق فيني و أنا أرفس . . يا الله و يامين قدرت أصحى من الحلم التاني . . وكت صحيت من الحلم التاني . . لقيت روحي مخنوق في الحلم الأول . . الخنقة بتاعت الحلم الأول حااارة . . قعدت أكوس لي الطريقة البترجعني لي الخنقة بتاعت الحلم التاني . . في النهاية قلت بس أسرخ كان في واحد قاعد جمبي بقوم يصحيني . . الساعة السرختا فيها . . صحيت من الحلمين المزعجين . . لقيت عباس أب كراع قاعد جمبي في سرير ناس عباس ود محمد الدين . . و قبضني من رقبتي.
لكن يا أخوانا كان مشيت لي دكتور نفساني . . ما حا يفهم نضميني دا . . أحسن حاجة أقوم شوف لي طريقة . . الدكتور النفساني دا . . يقوم يجيني في الحلم و يشوف الأحلام الملخبتة دي بي عينو.
رد مع اقتباس
المشاركة الأصلية كتبت بواسطة الجندي المجهول
المفضلات