حُرورية القلب كانت صفة مفصلة و مأصلة في أجدادنا . . و جيلنا الهسع دا جاب ليهو خرتوش موية . . و إشششششش طفاها . . و قال دي هبالة شنو دي.
سعيد الشايقي . . جاء رفاعة . . فتح ليهو طبلية في السوق . . بعد حال عليهو الحول . . اتزوج مدينة جارتنا . . مدينة الجعلية . . سعيد دخل علي مدينة قوام قوام . . لكن مدينة ما حملت من سعيد قوام قوام . . لكنها حملت من سعيد بعد معافرة . . و جابت ليو تلاتة بنوت . . البت الفوقانية و التحتانية شايلات طبع أبوهن . . جرجير الكلام و شناة الطبع و الغتاتة المؤسسة . . البت الوسطانية شايلة طبع أمها مدينة الجعلية . . صرصير الوش و الصوت الخشن و حليفة الطلاق.
الحقيقة بنات سعيد شينات و قبيحات و ما يسرن القلب . . و الواحد كان ما ربطوهو بي حبل و كان أيمانو قوي يقع بب. بتظكر اليوم داك سمعت لي صوت جاي من بيت سعيد . . طبج طبج طبج . . قلت ديل منو البتخانقو ديل . . تاوقت بي فوق الحيطة . . لقيت بنوت سعيد يعجنن ليهن في دقيق قراصة . . في ظمتي زي التكنو بخنقن ليهن في عب . . و من موقعي داك شحدت الله يجي حرامي يسرق طبلية سعيد دا . . عشان يمرق لينا من البلد و نرتاح منو و من بناتو.
و فعلا . . الحرامي يجي لي بيت سعيد . . و مدينة و سعيد و بنات سعيد يشوفو الحرامي . . و يشاء الله البنات ما يسرخن . . لكن يسرخ سعيد و بي طول حسو . . الحراااااااامي . . أنا وكتين سمعت قولة الحرامي . . تلبت بي فوق الحيطة . . لقيت الحرامي جاري . . و البت الوسطانية . . شايلة ليها شيئ في يدها . . لا أقول ليكم ضقل شجرة . . لا أقول ليكم . . غزاز صيوان . . الحرامي جاري و أنا و بت سعيد الما بتشبه البنات جارين وراهو . . غايتو أنا عتر لي حجر درشني علي خشمي . . و قنعت من الحرامي . . و قلت في قرارت نفسي . . بت سعيد ما بتقصر . . كان قبضتو بتقبض روحو . . لكن بت سعيد الوسطانية السماء سأل منها الواطة . . محل غتست ما معروف . . يومين سعيد يفتش ليها ما لاقيها . . أنا كان عندي متل بت سعيد دي . . ما بفتش ليها . . بشحد الله يعوضني غيرها . . لكن بعد مرور يومين . . البت جاتهم صادة آمنة و غانمة . . قالت ليهم الحرامي قبضتو و وضبتو . . و سلمتو لي شرطة ود مدني . . و لي هسع نحنا الجيران نسأل . . بت سعيد الوسطانية قبضت الحرامي دا في ود مدني كيفن؟؟؟.
جدنا (أبو الناس) الله يطراهو بالخير . . و يديهو الجنة علي حُرورية قلبو . . اليوم داك دقش السوق . . شايل قفة ملاحو في ايدو . . و عكازو طابيهو في أباطو . . و من طريف السوق . . سمع ليهو واحد سرخ بي طول حسو " الحرااااااامي . . سرقني الحرااااااامي . . أقبضو الحراااااامي . . أقبضو ود المسخووووتة" . . الناس بردلب بردلب بردلب . . الأعمى شايل المكسار . . كلو واحد عاضي جلابتو بي سنونو و جارين وراء الحرامي . . جدي (أبو الناس) رمى قفة ملاحو . . و سلَ عكازو من أباطو . . و جرى مع الناس كايس قبيضة الحرامي . . النصيحة لله الحرامي قالوا يجري وراهو العدو . . متل الكيس الشايلو الهواء . . و من سوق رفاعة قالوا الحرامي دقش بي خلق الله ديل الخلاء . . الناس من الحرامي طلع الخلاء سابتو و جات صادة السوق . . لكن جدي (أبو الناس) من يومو قلبو حار . . و أي مهمة يطلع فيها لازم يجي بالنجيضة . . و حلف بالتقطعو عيلا يجي صادي بالحرامي . . و الحرامي جراي . . و جدي جراي . . و أثناء المطاردة في الخلاء . . الحرامي أتجه لي قرية (بانت) . . و جدي وراهو في خطراتو . . و من قرية (بانت) الحرامي قال لي قرية (التراجمة) جاك حرامي . . و جدي بي عكازو في خطرات الحرامي . . و كت شاف الحرامي متوجه لقرية (التراجمة) حلف بي دينو و ايمانو عيلا يجيب الحرامي دا مجرور من أضنينو . . و الحرامي يستغرب في جدي (العكليتة) . . و من قرية (التراجمة) يتجه الحرامي بي نفس طويل لي قرية (الخريريشة) . . محاولاً تثبيط همة جدي (أبو الناس) . . و جدي نفسو تنفتح للمارثون الصباحي و يقول للحرامي "قلت كدي؟؟؟ . . وحات قفة ملاحي الرميتها في السوق كان دخلت جحر ضب أن وراك . . و يدخل جدي (أبو الناس) و الحرامي قرية (الخريريشة) و مافي واحد فيهم نزلت منو نقطة عرق . . و من هناك من أرض (الخريريشة) الحرامي يقرر انو يجي راجع (تمبول) و جدي (أبو الناس) ليهو ذكريات في (تمبول) و يدخلان (تمبول) سويا و الشمش في كبد السماء . . و من تمبول الحرامي يقرر يجي صادي (رفاعة) تاني كان ينفكا من ورطتو دي. . لكن جدي (أبو الناس) يقبض الحرامي عند ترعة مشروع الجنيد قبل دخوله رفاعة . . و يمسك الحرامي من أضنينو و يقول عيلا يكركرو و يجرجرو لي عند سوق (رفاعة) و يمرق المسروق . . قام سأل الحرامي "انت بالله سرقت شنو" الحرامي قال ليهو "سرقت لي مسواك من خشم واحد . . نفسي دخلت فوقو" . . و جدي يضحك علي الحرامي و يقول ليو . . الله يقبحك . . غور من وشي . . خليني أجري السوق قبل يجي واحد يسرق قفة ملاحي".
رد مع اقتباس
أما الآن فالتسخينات ماشة في تناقص وفي أحلك الظروف..
المشاركة الأصلية كتبت بواسطة أبوريلان
المفضلات