الطـــــــــــــــلائع

[ضياء الدين احمد]

عند مطلع الثمانينات كنا نلبس الكاكي وكانت الدنيا لا تسعنا من الفرح في ذلك الوقت ونحن في المرحلة الابتدائيه ‘ نعم انه الطلائع كان مركزنا هو المدرسة الجنوبيه حيث يبتدئ التدريب عند الثالثة عصرا اما التجمع الكبير فكان عند مركز الشباب تأخذنا البصات اليه وفي ذلك الوقت كان يدربنا شخص اسمه( جمعه) هل منكم من يذكره؟
ارجو ان تجتروا بعض من ذكرياتكم في الطلائع في ذاك الزمان الرخو
ويا ابوبكر اوعي تعمل فيها صغير وما حضرت زمن الطلائع

[أبوبكرحامد]

ضياء ........... تحايا وأشواق
أعتقد الطلائع كانت للمراحل السنية الباكرة فيما كان الكديت لطلاب الثانوى.
هذه هى حدود معرفتى بهذا الأمر ، ولم يسبق لى أن شاركت فى أى نشاط عسكرى أو شبه عسكرى حتى الآن ، ومرد ذلك كراهية والدى عليه رحمة الله للعسكر عموماً ونميرى خصوصاً ، وقد كان والدى مديراً لمدرسة جبرونا الإبتدائية حتى تقاعده قبل الوفاة ، وقبلها كان مديراً لمدرسة أبو زيد الإبتدائية وكان الوكيل الأستاذ محمد المبارك والد مبارك وأحمد وأبوبكر ، عفواً للتفاصيل وأعود للموضوع فأقول كان والدى مأذوناً لمنطقة بانت وبعض الأحياء المجاورة وكانت لديه كراهية مفرطة تجاه الكاكى وأذكر بعد إكمالى للثانوى إستشرت والدى فى رغبتى فى الإلتحاق بكلية الشرطة ، فضحك عالياً وأجابنى بعفوية
" عاوز تبقى بوليس "
ومن ساعتها لم تراودنى الفكرة ولم يرق لى إفساد العسكر لصفو الحياة .

ود الماذون

[ضياء الدين احمد]

الرحمه والمغفره لعمنا حامد
والله كلامو في محلو

[أبوبكرحامد]

شكراً ضياء...........
من الطرائف التى حكاها لى والدى عليه رحمة الله أنه فى نهار أحد الأيام وبينما كان عائداً للبيت وداخل إحدى مركبات المواصلات وكان والدى يتصفح إحدى الصحف وطالع تصريحاً لنميرى يتمنى أن يكون الشعب السودانى فى بحبوحة من العيش ، وقد استفزت كلمة بحبوحة والدى الذى استنكرها جهراً وكان بجواره شاب فى مقتبل العمر سعى لتهدئة خاطر الوالد قائلاً :
ربما يعنى نميرى كلمة بحبوحة المشتقة من مصطلح الأطفال " باااابح " .
هنا ضحك الوالد وانفرجت أساريره وحرص على التمسك بحقوق النشر والتوزيع .
مع مودتى
ود الماذون

[ضياء الدين احمد]

هههههههههههه
والله دي قلبو فيها هوبا
تسلم يا ابوبكر

[rasheed]

الأخ ضياء أحمد تحياتي ،،،
كنت تريد ان تجتر ذكريات الطلائع لكن الأخ أبوبكر ود المأذون - مع خالص تحياتي له وسلامي الشديد وسؤالي عن أحواله والأخ عمر وكواره وبقية الأخوان إن شاء الله بخير - أزاحك عن الطريق وشايفك لبته وياخي عيب عليك دي ما ذكريات ويفترض إنك تعتز بها لكن بس أنت لو مشيت في الطلائع مشية طويلة كنت ما رضيت كلام أخونا ود الماذون وهو كان بسببو وكلنا كان كنا سمعنا كلام أهلنا كنا نكون لسه عايشين في الخمسينات مع العمر مع التحفظ على سماع الكلام وإختلافه يعني في كلام تاني لازم نسمعوا منهم عشان هم الكبار والخبرة والخير والبركة وده ما فيه شك ،، لكن تكوين الشخصية كان ببدا من الطلائع ، وشوف ناس الطلائع وين هسع وأسأل منهم وشوفهم حاصل عليهم شنو . وطبعاً بدافع عن الطلائع دفاعاً مستميت عشان شكلت حياتي وغرزت حبي للسودان وهم أي الطلائع أكثر الناس حباً للسودان في الوقت الراهن بغض النظر عن أنها كانت في زمن نميري ،، لكن أعتقد زمنا داك ما كنا بنعرف نميري من النواحي الأخرى غير أنو نميري أبونا وأمنا بثينة والراجل ما قصر معانا كأطفال ،، حقيقة لما وصلنا المراحل القدام عرفنا هو قصر لكن كل زمن نديهو حقو وما نبقى أمعات الناس قالوا كده نكون كده وأهو زي ما قال أخونا ود الماذون - شيخ حامد رحمه الله تعالى وتغمده بواسع رحمته وكان أبونا كلنا مش أبو أبوبكر ولا عمر ولا كواره وكان زمنا داك كل راجل كبير من الجيران أو الخيلان او الأعمام هو أبونا - أنو أبوه أثر فيه لأنو ضحك عليه وإلى لقاء أخر حتى لا يطول الكلام ونعود ونجتر صفاء ذلك الزمن بالنسبة لنا وطرائف الطلائع من الناس الكبار وطرائف أمنيات الصغار ومنها أنو واحد أبوه سألو قال ليه داير تبقى شنو لما تكبر قال ليه داير أبقى نميري قال ليه يا ولدي إلا نميري ده ولا من هسع شوف ليك بيت امشي أقعد فيه ،،، هها هاهاهاها وتحياتي ليك يا ضياء وود الماذون مع إعتذاري وتحياتي لك ولأفراد الطلائع والرواد والسواعد وجمعة يا ضياء وهو ساكن في ود أزرق مع ناس أزهري عبد الفتاح كان بتعرفوا فاتحين على بيت الشياطين الولدونا فيه وهسع بقى جامع منو ،، وبعدو لكوندة خضري الوقعت وبعدها مركز الشباب . ويازمن أرجع شوية أهدي لي ذكريات هنيئه وبعدها 000

[أبوبكرحامد]

أخونا الرشيد .......
ياخى بلاش فتن وضياء راجل حبيبنا ، حقيقى أنا فى غاية الشوق لأى سرد تاريخى بغض النظر عن الإتفاق أو الإختلاف مع الموضوع المطروح ، وصدقنى مازلت فى لهفة لمطالعة ذكريات ضياء عن الطلائع وذكرياته أيضاً عن الدرجة وذلك لأهمية الموضوعين ، وكذلك لأن الأخ ضياء كاتب جيد وصاحب قلم مبدع وفكر خلاق وقد سعدت حقيقةً بالتعرف عليه وهو إضافة حقيقية للموقع.
يارشيد - شنو سر تسمية حى البان بالقرية 8 ؟؟
تحياتى لكل ناس حى البان وأرجو مراجعة رسالتى لك على بريد المنتدى .
مع مودتى
ود الماذون

[ضياء الدين احمد]

التحيه اولا للاخ رشيد
بالمناسبه انا وكت اتفقت معاهو مش عن فترة الطلائع لانو الموضوع اخد منحي عن البوليس وانا اتفاقي معاهو وانا في اللحظه دي يعني بتفكيري الحالي مش قبل ثلاثة وعشرين سنه لانو الحكومات اتغيرت ونظرتنا للجيش والبوليس الزمان مش زي هسع وبالمناسبه انا للان بحب نميري ودايما بقول انو انا ما ندمان علي شئ الا طلوعي للشارع فرحان ايام الانتفاضه
(وكل زمن نديهو حقو وما نبقى أمعات الناس قالوا كده نكون كده )دي طبعا يارشيد بدون تعليق
ومشكور اخي ود المأذون على هذا التقريظ وان كان اكثر من ما ينبغي علي شخصي الضعيف

[أبوبكرحامد]

الأخ ضياء ....................... سلام

مازلنا فى انتظار إبداعاتك فدع الكسل .

أما قصة حبك لنميرى فأكيد حب الناس مذاهب ، ولايقدح ذلك فى تمسكنا بأنك

رائع حقاً .

ود الماذون

[ضياء الدين احمد]

لانو الناس الرائعين بشوفوا الحواليهم رائعين
مشكور يا ود المأذون