السلام عليكم .........
رأيكم شنو ياجماعة نفتح مدرسة محو الحنكشة ونعمل ليهم امتحان زي ده
يجب قراءة التنبيهات التالية قبل الشروع في الإجابة:1-
ممنوع دخول هياثم الخلا.
2ـ يمكنك أن تغش في الإمتحان وأن تشاور الـ (ماما) والـ (بابا) .
3ـ الباص 20 من 100 والتصحيح تحت الجذر.
السؤال الأول:
اشرح المصطلحات التالية باختصار:
الدلوكة، الشتم، الودك، اللخوخة، الرحط، الضريرة، الفركة، الشملة،
النطع، الموليتة، الحسكنيت، الرانتوق، التبش، التبر، الضريسا، الكنتوش،
القرقريبة، الدوكة، المشلعيب، المرحاكة، الحسوَّة، الرتيلا، الجقر،العتيد
البرم، المسلَّة، المقشاشة،الخُرُج ، البربندي،الِّلبا، القلاَّبة، الكجَّامة، الفرار.
السؤال الثاني:
حول هذه القصة إلى لهجة الحناكيش:
عمنول عشة وكت جاتا الوردة مشت لي حكيم شفخانة الحلَّة الحكيم قال ليها
لازم تمشي حكيم الاسبتاليا الفي البندر، انخمَّت وفاتت.
أها وكت سعلا موجوعه من شنو قت ليهو:
قاعورد، عندي شحتفت روح، وخمة نفس، والقلب طاحونة ود الكريل التح التح ، والفقر العب الطالع فوقن ،والبوادرين الجريوات البنهشن فوقن، والخشم
عرديب، واللضنين يسون صنننننننن
السؤال الثالث:
(الدِعا) بكسر الدال من الأشياء المنتشرة في مجتمعنا السوداني، أي الدُعاء
على من تغضب عليه، فأكمل العبارات التالية بالجمل أو الكلمات المناسبة
كما في المثال:
1ـ تعال ، تجيك الطاوية حبالا.
2ـ .......، يطير نوم عينك.
3ـ أنزل، ....................
4ـ أطلع ، ...................
5ـ ......، نعامة تزازي بيك
السؤال الرابع:
اشرح الأمثال السودنية التالية:
1ـ مرق بي قد القفة.
2ـ العاجبو حلقو ببلع اللالوب.
3ـ ام زمبيري أكلي وطيري
أعزائي الحناكيش مع خالص أمنياتي بالنجاح والتفوق،،
سارعوا بالتسجيل المقاعد محدودة
ماتقهو ساي وتقولو الرطانة دي شني ( منقول
[/color]
رد مع اقتباس
المشاركة الأصلية كتبت بواسطة ود المطامير
المفضلات