--------------------------------------------------------------------------------
قبل ما يرك الحمام في موقف الباصات امونة ركت بي بمبره وهزت الكانون من رماد امبارح الانتهى ولملمت الورق والحطيبات واوقدت لي فحما وبي هبابتها زاد اشتعال النار الا النار الجواها الديمة مولعه اليوم ده كانت ذايده ومذوده وزادت في التهبب وسرحت بي خاطرها لي ايام زمان وايام البلد وقبل سفر زوجهاا للديش في الجنوب والخبرو انقطع من تسع سنين لا شوفةً تبل الشوق ولا رداً يطمئن ،، ولما اشتد بيها الحال بعد ما أبوها العجوز غلبو الشغل في الرعي والزراعة، والمطر الوقف من ذنوب العباد،،، لمت لي دلقها وعلى البندر كان السفر، عشان هناك الشغل السمح والعيش الرضي وكمان للعلاج للابو الراقد زمن، وفي طرف المدن استوطن الهم واندفن، في العشوائي كان السكن وبدت المرمطة من اسبتالية لي اسبتالية والحكماء الدخول ليهم حُكم .. في شان ده امونة بقى ده ياهو حالها ...ورك الحمام والنار في طقطقة اللهب ذاد اشتعالها، وصوت باص حاج علي من هناك جاي ما هو كمان بعاني نومو في اليوم ساعتين وقف الباص وجا على امونة صباح الخير ..اهلا عم علي الشاي طلع دقيقتين بس .. وفي ده كلو امونة شايها بي مزااااج تعدل في ريسان الناس ولي كيفهم تكد وتجد والا هي راسها خلاص قرب يطق والنارفي طقطيقتا .. فر الحمام وبدت الحركة كل اصناف البشر تمر في وهمها في شاي الصباح قبل العمل والفلاح وامونه بدت العمل من قبل ده،،،،،
امونه
رد مع اقتباس
المشاركة الأصلية كتبت بواسطة انور النور محمد
المفضلات