ساعة العصاري..........
الضل يمد فوق الجروف يكسي التبيسات بالطرح
عين الشمش تنزل خجيلاني وتكوّع بين شديرات البلح
الغيم ينقّط من دموعو على الصفيقات السبح
أمونة تمسح من خديداتا وتكوّن قوس قزح
*****
نور عيونن
ما بتشوف غيرك سما ح ياامونة إنت سمحنا بس شالنا وفتح
يا عز وجوهاً شارقة في عز الصباح تلقانا بالرضا والفرح
يا بت رجالاً من جريدن ومن وريدن يلفوا ضيفن بالقدح
إنت المهيرة الفي ضراهن يا ضراهن قبلة الجار والنزح
إنت الزهيرة الفي نداهن شابي بي خيرن طمح
إنت عيدُن
وضي مسيدُن
وكفة إيدُن ياندى الإيد النضح
وانا شان بريدُن من جديدُن أقول وازيدُن
أكيل عيون الكون غُنا:
أمونة إنت وحاة عيونك طلة الخير والمنا
عاشق أنا وغنّاي
أوشوش للزمن همسات غناي ما دام أنا
حاضن حكاوي الريد سنين
أمونة جاشت في ضلوعي ملحّنة
*****
أمونة في فرح البلد
عقبال وفال وكلام هنا
رنة جبيري وخيت حريري
ونور هلال فوق الجنا
أمونة حُق أم العريس مكمود ضريري مخزّنة
ساعة يدوب غنايّ انا
وبي نقنيق سلوكو يرطِّنا
ساعة يجوا الغايبين عيون الفال تسالمنا وتشيلنا تضمنا
ويا امونه تتفتح مشاعرنا ونقش عرق الدروب المزمنه
ونغني
ما فرحة عيونك تلهم الناس الفرح
وااااااااااااااغربة الما حجّ في فرحة عيونك وانجرح
محمد عبد الباقي ( شعراً ) + صديق أحمــد ( غناءاً )
مشاققة :
وحات الله ووحات الرسول القصيدة دي سمحة جنس سماحة لدرجة تخليك تقراها كم مرَّة .. وجـع عديل
رد مع اقتباس
المشاركة الأصلية كتبت بواسطة mahagoub
المفضلات