من قلب العاصمه المثلثه .. انقل لكم .. حي ووب

[التيمان]

الليله موضوع جد غريب شويه ..
طبعا انا في الخرطوم ومضهب وفرحان من الجكس والحوامه وبكره يوم حافل بالضهب غالبني النوم قلت اقوم انجر ليكم موضوع كده ..
وفجاه سمعت غنيه الوليد الضيف ..

الوليد الضيف

غرقتنو كيف؟

جيبو لي هدومو الراقدة فوق القيف

خلوني النمنّح بالقرع والسيف

وا سواد امو الاهلو في الجريف

اهلي العرب الغنيه دي زمان بتزكرنا بشنو ؟ النواح والرديح ..
طبعا زمان اهلنا لمن كان يموت زول يجبو ليك طش وفيه مويه كدي و3 قرعات قويات ومعاهن عصايتين ويدقن وينوحا .. وبتجي كم واحده كدي تخش ليك دورانيه الرديح وتشبكه ليك حي وب حي وب وصحن مليان رماد في نص الدارة..دارة الرديح... كل مرا تجي فترفع ايدها فوق وتصفقن ثم وبعد ان تسكلب ثلاثا او اربع سكليبات معتبرات ذوات قيمة... تخم ليها هين رماد( الهين هو ملية الكفيّن )..وتكبو فوق راسا.....ولو الرماد خلص تشيل هين واطا.... وتدخل وتقعد تردح....على ايقاع النقارة المتوارث وهو( حي .. ووب).. . مع ضرب الكرعين بالواطا وتعقبها نطة لفوق وصفقة الايدين فوق الراس... بايقاع مدوزن ومتزن.... ثم صمت وتنبري مرا ذات صوت جميل وتقعد تمنّح. وتعدد كل مآثر المرحوم وحسناته وربما اضافت اليها من عندها حاجات مافيهو كلو كلو..

.. لو شاف الزول الميت ما يبذل من اجله يقوم ويقول انشاء الله اموت مليون مرة. ..تكون هناك بعض الرادحات تلبس هدوم الميت وتشيل سيف وتقعد تردح.ما زي موت الزمن دا...قبال روح الزول تمرق عديل يكونو ختوهو في الحفرة وقعدو يدفنو..ورجعو شربو الشربات ثم الشاي ثم ونسة في هلال مريخ وانت الميت تاكل نارك..... ويزيدوا من ذنبوك وممكن تكون انت الميت بيسعولو فيك في القبر.... وممكن يسعلوك من السعودي وراجي وكافوري.....وانت تطرطش وما تعرف تقول شنو؟
لكن وين عااد لي بكي الزمن ده..
اول شي النسوان مع احترامي ليهم الواحده زي الماشه حفله اخر مكياج واخر عطور وحنه ورسم كمان وقالو في رسامه للبكيات انا ماعارف دي اشاعات ولا حقيقه ..
والواحده تخش ليك في ام الميت اييي يا المبتعرف الغش يالجبتنا لينا الدش .. يا الماشراب سيجار وما بتاع بوبار .. احي انا يايمه صغير وجاهل وجاب الكار ومالعاب قومار ..غايتو شغله ما ترفا بكي غزل بوبار شنو بالظبط كده ..
تخش علي صيوان الرجال تجي مادي يدينك الفاتحه ولا يشلوها معاك يقولو ليك هنداك فلان ولد الميت مثلا ..وتلاقهم ماسكين ليك ماعارف كاس العالم في قطر وسادمبا قال .. وياخ عندي عربيه داير ابيعها وكب الشاي ياولد وينو الغداء وجيب شطه .. فاتحين نفسهم ..
والمفاجاءه وين النغمات : عمك تلقي كبير خاتي غنيه وري وري .. ولا نغمه مزعجه وشايل ليهو تلفون صيني كده مزعج الصيوان كلو وما عايز يرد .. ولا مشغل الرادي وقاعد ..
نجي لي جيلنا الشباب ..
ياخ والله ناس البكي ديل جاهم جكس عجيب .. ارح نخش جوه نكشف نعمل فيها عايزين نشيل صينيه شاي اي شي .. ولا اقول ليك ارح نجيب ليهم العيش ويبدا في الحنك ..
كدي يا جماعه والله قلت العندي وعيوني خشت في بعض وبكره راجاني لفه في الخرطوم طويله ودنيا حلوه لكن قلت اعزكم بموضوع نظام خرمان ليكم ..

ياجماعه للامانه في حبه حاجات منقوله

[ام قبس]

التيمان والله بالغتوا دا كلام شنوا
الدنيا اتغيرت
ولا انا بقيت متخلفه
اتمني اكون انا المتخلفه ولا يكون دا هو الحاصل
والله ولا البكي الاول والا الفشخرة الثانيه بيعجبوا
وبيني وبيكم كدا الناس بقت تفتش للضحك في بيت العزاء
من كترة المأسي
الله يهدي ناس الخرتوم ويعمي ناس مدني من جنس دا

[moh_alnour]

للأسف هذا ما يحدث هذه الأيام في بيوت العزاء
ولا عزاء لأهل الميت
شلاقة : يا مصطفى إنت الزول البغني في التوقيع بتاعك دا بقول شنو ؟

[تغريدا]

وليداتى الله يديكم العافية وماتشوفوا بكا أبداً كان زمان ولاهسى وكلامكم لذيييذ زى العصير ودا ياهو الواقع وعيش كتير تشووووووووووف كتير الله يهدى

تكميله: الغنية مجنووووووووونة عديييييييييييل

[مدنيّة]

عندنا واحد زملينا في الجامعة
لما اتوفي
قريبة زوجته
جات في ساعات البكاء الاولي الحاااااااااااااااااااارة ديك
مطقمة كله
توب وشبشب وشنطة
موته كانت حاااااااااااااااااارة وصعبة علينا جدا
فاتخيل المنظر
ولد في عز شبابه
وتجي وحدة تعزي فيه بالشكل دا

--------
اليوم التاني للبكاء بتحكي لزوجته
عن اشكال الحنة
وياتها فيهم السمحة
والموضوعة الطالعة شنو!!

[mahagoub]

كلام ما قدر عمركم
الحاجات القديمه دى شوف ولا سمع
لانه وصف زول قاعد فى الدايره متحكر
اما بالنسبة للعزاء فى هذا العصر حدث ولا حرج

[naz_imam]

والموضوعة

مدنية خطك بقي شين ياخي

التيمان : تسلموا والله ونشوفكم بعد الرجعة ماتطولوا في الخرتوم

[التيمان]

والله ياجماعه بقى ده الحاصل

البكى بقى برنامج والناس تتم صفقات البيع والشغل فى الحتات دى

[المارشال]

الليله موضوع جد غريب شويه ..
طبعا انا في الخرطوم ومضهب وفرحان من الجكس والحوامه وبكره يوم حافل بالضهب غالبني النوم قلت اقوم انجر ليكم موضوع كده ..
وفجاه سمعت غنيه الوليد الضيف ..

الوليد الضيف

غرقتنو كيف؟

جيبو لي هدومو الراقدة فوق القيف

خلوني النمنّح بالقرع والسيف

وا سواد امو الاهلو في الجريف

اهلي العرب الغنيه دي زمان بتزكرنا بشنو ؟ النواح والرديح ..
طبعا زمان اهلنا لمن كان يموت زول يجبو ليك طش وفيه مويه كدي و3 قرعات قويات ومعاهن عصايتين ويدقن وينوحا .. وبتجي كم واحده كدي تخش ليك دورانيه الرديح وتشبكه ليك حي وب حي وب وصحن مليان رماد في نص الدارة..دارة الرديح... كل مرا تجي فترفع ايدها فوق وتصفقن ثم وبعد ان تسكلب ثلاثا او اربع سكليبات معتبرات ذوات قيمة... تخم ليها هين رماد( الهين هو ملية الكفيّن )..وتكبو فوق راسا.....ولو الرماد خلص تشيل هين واطا.... وتدخل وتقعد تردح....على ايقاع النقارة المتوارث وهو( حي .. ووب).. . مع ضرب الكرعين بالواطا وتعقبها نطة لفوق وصفقة الايدين فوق الراس... بايقاع مدوزن ومتزن.... ثم صمت وتنبري مرا ذات صوت جميل وتقعد تمنّح. وتعدد كل مآثر المرحوم وحسناته وربما اضافت اليها من عندها حاجات مافيهو كلو كلو..

.. لو شاف الزول الميت ما يبذل من اجله يقوم ويقول انشاء الله اموت مليون مرة. ..تكون هناك بعض الرادحات تلبس هدوم الميت وتشيل سيف وتقعد تردح.ما زي موت الزمن دا...قبال روح الزول تمرق عديل يكونو ختوهو في الحفرة وقعدو يدفنو..ورجعو شربو الشربات ثم الشاي ثم ونسة في هلال مريخ وانت الميت تاكل نارك..... ويزيدوا من ذنبوك وممكن تكون انت الميت بيسعولو فيك في القبر.... وممكن يسعلوك من السعودي وراجي وكافوري.....وانت تطرطش وما تعرف تقول شنو؟
لكن وين عااد لي بكي الزمن ده..
اول شي النسوان مع احترامي ليهم الواحده زي الماشه حفله اخر مكياج واخر عطور وحنه ورسم كمان وقالو في رسامه للبكيات انا ماعارف دي اشاعات ولا حقيقه ..
والواحده تخش ليك في ام الميت اييي يا المبتعرف الغش يالجبتنا لينا الدش .. يا الماشراب سيجار وما بتاع بوبار .. احي انا يايمه صغير وجاهل وجاب الكار ومالعاب قومار ..غايتو شغله ما ترفا بكي غزل بوبار شنو بالظبط كده ..
تخش علي صيوان الرجال تجي مادي يدينك الفاتحه ولا يشلوها معاك يقولو ليك هنداك فلان ولد الميت مثلا ..وتلاقهم ماسكين ليك ماعارف كاس العالم في قطر وسادمبا قال .. وياخ عندي عربيه داير ابيعها وكب الشاي ياولد وينو الغداء وجيب شطه .. فاتحين نفسهم ..
والمفاجاءه وين النغمات : عمك تلقي كبير خاتي غنيه وري وري .. ولا نغمه مزعجه وشايل ليهو تلفون صيني كده مزعج الصيوان كلو وما عايز يرد .. ولا مشغل الرادي وقاعد ..
نجي لي جيلنا الشباب ..
ياخ والله ناس البكي ديل جاهم جكس عجيب .. ارح نخش جوه نكشف نعمل فيها عايزين نشيل صينيه شاي اي شي .. ولا اقول ليك ارح نجيب ليهم العيش ويبدا في الحنك ..
كدي يا جماعه والله قلت العندي وعيوني خشت في بعض وبكره راجاني لفه في الخرطوم طويله ودنيا حلوه لكن قلت اعزكم بموضوع نظام خرمان ليكم ..
ياجماعه للامانه في حبه حاجات منقوله

أعزائى التيمان مواضيعكم فى الصميم لكن برضو عندنا فى مدنى بعض الأحياء المتأثرة بى ناس الخرطوم وبتجارى فيهم . وأضيف ليكم أن هنالك اصبحت الونسة تتم فى المقابر قبل الدفن وأثناء صلاة الجنازة . دون مراعاة لحرمة المقابر والأموات ( كفى بالموت واعظا ) وأخوانا انصار السنة معاهم حق عندما قالوا ينتهى العزاء بإنتهاء مراسم الدفن ..

[التيمان]

حنك جميل بتاع تنتهى مراسم العزاء بنهاية الدفن ومريح زاتو


تسلم مارشالو