الأحباء أعضاء وعضوات منتديات ود مدني .. كل عام وأنتم بخير في العام الهجري الجديد 1432هـ ، وقبل الآخرين .. سنة سعيدة عليكم جميعا في العام 2011م.
بالأمس كنت في زيارة مريض في المستشفى بمدينة الرياض المملكة العربية السعودية، ولفت إنتباهي حمل البعض للزهور والورود، في زيارتهم لمرضاهم عوضا عن ما نحمله نحن عادة من حلويات أو عصائر أو أكل.. وطبعن مباشرة أتقمصت شخصية مهند وكده .. قلت يا ولد بمناسبة العام الهجري الجديد ده .. تدخل علي مرتك وفي أيدك بوكيه ورد ورياحين وتقول ليها كل سنة وأنتي طيبه
وأريتني كان لغيت الفكرةأول حاجه كل المحلات الموجوده جنب المستشفى بتبيع مأكولات وعصائر وحلويات تاني حاجه كل ما أسأل واحد في محل زهور هنا ؟؟ يجاوبني لا
وأحس كده إنو في نفسو قال : يا سوداني مالك ومال الزهور تسأل منها
.
المهم ... قلت الليله لو أقلب الرياض دي كلها لااااااااازم أدخل البيت بـ زهور .. وبعد مشاوير وبحث مضني لقيت محل زهور،، قلت لصاحب المحل : دايرك تظبط لي بوكيه حق ورد علي مزاجك وما تسألني من أنا داير شنو؟؟ لأنو بصراحة دي أول مره أشتري فيها زهور
بالله دا كلام دا ؟؟ زول يشتري زهور بعد ما يصبح عمرو أربعين سنه؟؟
صاح الواحد قاعد يجيب هدايا لأمه أو أخوانو وأخواتو ،،، وأصحابو ومرتو و أولادو لكن أصلا ما كانت يوم زهور .. تتجه أغلبها للمأكولات أو العطور أو الأكسسوارات ألخ ... هييييييييييييييه غايتو ثقافتنا في الهدايا أصلو ما فيها زهور يمكن عند الحناكيش موجوده .. حتى في غنانا دا القاعدين نرددو الشاعر مع حبيبتو في الحديقه كان جعان قال ليها "أهدي لي تفاحه بس أو برتكانه"
خلاصة الموضوع : كما قال الحبيب المصطفى صلى الله عليه وسلم : تهادوا تحابوا .. لكن لييييييييه نحنا في ثقافتنا كسودانيين أو عرب عموماً ... قليلا ما نهدي لبعض الزهور في المناسبات؟؟ وشنو أفضل ليك إنت يا قاريء أهدي ليك بوكيه ورد ولا حاجه متعود عليها؟؟
جعل الله كل أيامكم حب وسعادة وهدايا وعطايا من رب العباد،،، وكل سنه وإنتو طيبين
رد مع اقتباس
(وما صحي)
المشاركة الأصلية كتبت بواسطة مايسة
المفضلات