ضربه معلم...جلده معلم...دقه حلوه كده

[التيمان]

بسم الله:
مدخل:
القصه انو المدارس السودانيه تمتاز بى الضرب المبرح لى اى طالب غير التعليم طبعا يعنى حتبقى دكتور بى الدق تمتع متعه وتعيش زى الفل ..من الصباح الاستاذ بجيك شايل صوت او سوت لانو قال الصوت بسمع والسوت بتحس فلسفه معلمين وكده ويكون مجهزو من بى الليل وانت بتحفظ فى الاناشيد وتكون خمسين بيت وعايز تسمعا الصباح معقوله ياخ انا ابن سينا احفظ 50 بيت شعر ..

الرصه:
المهم اى زول عندو جلده فى حياتو مابنساها لمن يموت زاتو وانا واخوى ده شخصيا الضرب الانضربناهو بلال بن رباح ماانضربو وياريتو بى فايده يعنى مره انا بتزكر واحده كده مره جاى متاخر من المدرسه وفى استاذ واقف فى الباب لقيت لى خرطوش واقع مريح كيف اسمو عب الواطه اللهو خرطوش المويه الاسود للحناكيش المهم قلت اديهو ليهو رشوه اديتو ليهو قلت لى ده هديه ليك يا استاذ مسكو جلدنى بيهو جلده واجعانى لى هسي وفى النهايه قال لى اجدعو بره وتعال دى وجعتنى ليك اكتر..


مخرج:
المهم انا ماعارف قصه الجلد دى شنو ؟ مفروض نكون زى ناس تامر ووايل وهيثم ياتامر قوم حل التمرين وكده عيب يابابا انحنا فى التعليم ده مظلومين والله حاجه تحير

مشاققه:
كدى كلو واحد يحكى لينا دقو فى المدرسه لى وسوى شنو ؟؟انا عارف فى ناس شقيين هنا

مع تحياتى
التيمان

[moh_alnour]

أنا و أخوي ده شخصيا ً الضرب الإنضربناهو بلال بن رباح ما إنضربو وياريتو بي فايدة

قلت لي ده هدية ليك يا أستاذ مسكو جلدنى بيهو جلده و اجعاني لي هسي وفى النهايه قال لى أجدعو بره و تعال دي وجعتني ليك أكتر

تستاهل عشان تاني ما تكسر تلج للأساتذة

[التيمان]

هههههههههههههه

انت يازول وين

مشتاااااااااقين والله

[همسات]

التيمان تحياتي
والله بالحيل موضوعكم مهم
ياريت اي استاذ قبل مايتوظف كاستاذ
يكون عنده شهاده كورس بانه درس
كيفيه معامله الطالب واكتساب ثقه الطالب
وكيفيه تعليم الطالب حب الماده التي يدرسها


انا مره غايتو الاستاذ جا يضربني
قال لي افتحي يدك ومديت يدي
وقعدته ارجف ويدي ترجف
الاستاذ عاين لي يرجف شديد
قال لي خلاص امشي خليتك
دي المره الوحيده الكان حاانضرب فيها

[ابو لوزة]

مخرج:
المهم انا ماعارف قصه الجلد دى شنو ؟ مفروض نكون زى ناس تامر ووايل وهيثم ياتامر قوم حل التمرين وكده عيب يابابا انحنا فى التعليم ده مظلومين والله حاجه تحير




التيمان مالهم نا س هيثم ووائل وتامر
والله انجلدوا جلد لمن ربنا غفر ليهم
وعندي قصة بحكيها بعدين عشان تشوف
جعولية ناس هيثم

[بحيرى]

تستاهل عشان تاني ما تكسر تلج للأساتذة

انت من زمان بتكسر تلج
والله كلام ود النور فى محلو !!

[mahagoub]

الناس ديل بتزاوغوا مالم
اذكر جلدتين واحده على وواحده لى
كنت فى رابعه ابتدائى بالقديم
الاستاذ سمع لينا وكنت من الحافظين
قال : كل واحد يكتبا عشرة مرات
اخوك حافظ وما كتب فى الصباح قال كل واحد يطلع الواجب
الجماعه طلعوا ورقهم وانا بعاين
لمان وصل عندى سالنى وين الواجب
قلت ليه انا حافظ وعينك ما تشوف الا النور
شدونى ليك وادانى خمسة عشر سوطا
من النوع ابو كديس تلاته ايام وانا ما بقدر اقعد على صلبى

كنت ماسك النشاط المسرحى وكنت فى الفصل السادس
وقلت عاوز واحد بعرف بغنى عندى ود اخوى رفع ايدو
مع مجموعه بصراحه كنت قاصده
قلت ليه تعال غنى وحاتك وقف اتبكم
وبقيت اديه بالسوط فى اى موقع وهو يغنى بخاف اسأل عليك الناس

[ودسمير]

جد يا بحيرى ضحكتنى ب كسير التلج !! ومن زماااان ما ضحكت كده ( ضحكه كاتم صوت )

[التيمان]

ههههههههههههه

والله د ى قصه غريبه

[ودسمير]

اصحاب أخوانى ...التيمان لكم التحايا ..
الضرب فى العالم المتحضر ممنوع فى المدارس ، أما عندنا فى السودان فبصراحه التلاميذ الضرب ينفعهم والعلم يرفعهم بس أنا ضد الضرب الشديد القاسى .
ولكم تحياتى