انتو كان رقتو انا بوصف الشفتو

[HaSsOoN]

احبتى
غناء البنات ارتبط عندنا بالتصوير والوصف الدقيق لاغوار حال المجتمع
السودانى بكل متغيراته واختلاف طبقاته البيئية والثقافية ... وكان اغلب
غناء الفتيات للرجل السودانى ووصف محاسنه وكيفية كسب رضاءه سواء من اجل
( النقطة ) فى النظرة القريبة ... او من اجل الزواج منه فى النظرة
البعيدة وبمختلف الطرق المشروعة وغير المشروعة .. !! ونديهتهن للشيوخ
فى الاغانى للاتيان لهن بعريس ( بالضرا يااب شرا ان شاء الله راجل مره
) ... ويقولن ان عمنا ( اب شرا ) ماهو الا الفكى الذى يقوم بتجهيز
وعملية الزواج ( بالضرا ) ... وغالباً تلجأ الفتاة الى ( اب شرا ) بعد
ان تصاب باليأس ويطول انتظارها للفارس المرتقب ولكنها لم تعلم ( ان زمن
الفوارس غار ) ... وهى اصبحت تبحث عن الرجل كما تبحث امريكا عن (
الزرقاوى ) ... وبعد رحلة بحث مضنية لجأت الى فكى آخر الا وهو ( الطيب
) ( ابويا يالطيب اكتب لى حجيب ... يجيبو لى قريب ) وبالنداء الآلى (
تعال بالعندك تعال ابوى بسندك تعال ) ... ولجأن الى الامهات فى (
النديهة ) ... ( يمة اندهى لى اقرب فقيراً لى ... انشاء الله جناينى
ازرع معاه البامبى )
وهذا دليل حسن على ان فتياتنا اصبحن لا يهتمين بالوضع المادى او
الاجتماعى للزوج ، المهم عريس والسلام ...
وعندما عجز الفكى ( اب شرا ) عن اداء مهمته فى جلب الزوج لا بالضراء
ولا بالمكشوف ... لجأن الى المجهود الفردى وقالت الفتاة لامها : ( يمة
الزول انا براى بجيب الزول انا ) ... وخرجت فى سعى حثيث عن الزول
واتخذت خططاً جديدة للبحث ولكنها فشلت ايضاً بسبب عدم التركيز ...
وجاءت خائبة الرجاء لامها وقالت لها : ( لاقيتو فى العالى واشرت ليه
بشالى ... لقيتو دة خالى شتت طوالى ) ... فردت عليها امها مرة اخرى : (
جريتى ... جريتى وجعتى كرعيكى ... قطعتى دكتور شول والقسمة عند الله
ماعند زول ) ...
ومع هذا كله تبقى هناك فئة من المتمسكات بكبريائهن وواثقات من انفسهن
... ديل البغنن ويقولن : ( خليهو اليفوت دة ماعندو حق الصعوط ... خليهو
اليطير دة ماعندو حق السرير ) ... وايضاً ( انا مابدور المزارعية ...
بدور الراكب العربية ... بدور البدفع دينارية ... بدور الامو دلالية )
...
احبتى تتنوع التوجهات وتختلف الاراء ويبقى المقصد واحد وتبقى امنية
ونديهة واحدة فى دواخل كل فتاة وهى : ( انا نادهاك ياشيخ اب جودة ...
جيب لى البكندش الاوضة ويجيب الدش دة موضة ) ...
وجات واحدة مؤخراً وغنت ( انتو كان رقتو انا بوصف الشفتو ) .. !!!
والله الشمار كاتلنى ونفسى اعرف بس هى شافت شنو ؟؟

ختاماً ... تحياتى وتمنياتى لكل الفتيات بزواج سعيد ناشئ عن حب وتفاهم
بعيداً عن الشيوخ والدجالين ( بيتهيأ لى انتن فتيات اليوم الصالحات
وامهات الغد العظيمات وانتن واعيات ومثقفات وفهمكن اوسع من كدة
بكتيييير ) ... واللا مش كدة عزيزاتى ..!!
اتمنى ان نصلح هذا الوضع ونبقى نحن الرجال البنغنى ونجرى وراء البنت فى
غنانا زى زمااااااان ... ( هديلك جن تلاتة ... اعرفوا زولتى ياتا ...
البحلف بحياتا ... بهاجر ليها حافى وازور بيت الخياطة ) ...


HaSsOoN

[ياسر فقيري]

شكراً لك حسون على هذا الموضوع المضحك فقد أضحكتني حتى سالت دموعي لك الود

[بابكر]

شكرا لك ياحسسسسسسسسون على الفولكلور الجميل ده

[aborawan]

لك تحياتي اخوي حسون وما شاء الله عليك حافظ شديد
موووووووووووولع ليك مني 3 نجوم ( كان في دلووووكة ليك مني 5 نجوم )

[ابراهيم]

( يمة اندهى لى اقرب فقيراً لى ... انشاء الله جناينى
ازرع معاه البامبى )

ههههههههههههههههههه

يبدو في الاغنيات دي ليها طعم خاص وكمان ليها مناسبات في مرة سمعتهن بغنن (ما بدور ما بدورو الراجل دا لاقيتو في الدكان جاب لي حلاوة لبان) لزوم دلع وكدا وتاني برضو في (دق الباب بشدة وانا مشيت لي مستعدة وانا فاكراو حمادة لقيتو سيد العدة) المشكلة البنات دايرات العرس والرجال كمان برضو عايزين يعرسو كل منهم/ن يهاتي بالعرس في الغنا وفي النكت وفي وفي لكن زي الكل ما قادر ينفذ غايتو ربنا يسهل الامور للجميع اخواتنا واخوان العزابة

والله يا اخوى يا حسون موضوع جميل ومرح ووفيهو توجيه سليم

[سنين]

الاخ حسون لك التحية ..علي كل هذا الالق وهذه الروعة

موضوعك جميل جدا

بس يا حسون البخلي البنات يغنن الغني ده شنو؟

ما زمن هديك الجن تلاتة ..ده زمن ووضع مختلف من اسي ..

العلة مافي البنات العلة في الشباب ....




تحياتي

[HaSsOoN]

احبتي يديكم العافيه على المرور والاطراء وتحيه لحبيبا سنين وارد على سؤاللك انو زمان البنات كان نفس الواحده فيهم تلاقي ليها عريس زي مابوصفوا في اغانيهم لاكن يوم لقو الحكايه ماجايبا حقها والبايرات كتروا خلوها ولو لاحظت الايام دي الشباب مسكو الحكايه عنهم ولحبيبنا ابو روان الدلوكه حندورا المره الجايه وتحياتي للجميع




HaSsOoN

[زيكو منيب]

موضوعك في قمة الروعة اخي حسونة

[خالد هاشم علي]

أخي حسوون.
موضوعك لذيذ وطاعم وبصور حقايق حاصلة.بس عندي عتاب خفيف( بخصوص اب شرا) و(ابويا الطيب) فالبنات في أغانيهم تناولوا أسماء الشيخين الجليلين بإستهتار ولا مبالاه.فالشيوخ لهم مكانتهم ( والفرق كبير بين الشيخ والفكي).والشيخ يوسف أبوشرا (حاجة ماساهلة( وأسألوا ناس أبحراز).
علي العموم قصدت تسجيل هذا العتاب لأن موضوعك عجبني وأود أن يتناوله الجميع بدون (إثارة حفيظة أحد منهم) وأعلم تماما أنك لا تقصد الأهانة ولا التجريح.
أمنياتي أن تتقبل مني هذا العتاب الخفيف بصدر رحب.
والله من وراء القصد.
ودمت....