حــــــــــــكايات عن النسيان

[مصطفى هاتريك]

حكايات عن النسيان
الحكاية الأولى :
البطل " واحد صاحبي
وهشام هذا مشهور بأنه رجل شديد التأمل و الهيام كثير السرحان دائم النسيان ...
في مساء يوم خريفي وهو يتهيأ للخروج مع الدفعة الأولى من أعيان الأسرة متوجها
إلى حيث عقد قران ابن شقيقته (( ناصر )) ,, تنادى عليه العريس ناصر :
: يا خال .... يا خال
التفت هشام نحو ناصر :
: أيوه يا عريس الغفله
: يا خال لو سمحت أربط لي الكرافتة دي على ربطتك الخطيرة ديك.......

[مصطفى هاتريك]

تناول (( هشام )) الكرافتة من ناصر ووضعها حول رقبته بعد أن أضطر إلى خلع
العمة التي كان يضعها بيضاء منسجمة مع الجلابية الأكثر بياضا ( لزوم العقد )),,
ومضى يربط في الكرافتة بعناية فائقة ولما انتهى التفت نحو ناصر :
أهه .. كيف ؟؟؟
: معقولة يا خال .. ولا كلمة طبعا
كان حينها الجمع يستعجل (( هشام ))...فلم يستطع هشام أن (( يلف )) العمة
فحملها على يده و مضى مع الدفعة الأولى أو دفعة ال vip أو وفد مقدمة العقد .
على أن يقوم بلف عمته في السيارة و ذاك ما حدث ..

[مصطفى هاتريك]

ولأن (( هشام )) خال العريس الوحيد تم تقديمه وكيلا للعريس وعند جلوسه أما
المأذون (( حاج عبد الغني )) ذلك الشيخ المتزمت , نظر إليه المأذون نظرة حادة
و أردفها بقول أحد :
: يا راجل إتقي الله فكل بدعة ضلالة
بهت هشام : بدعة شنو يا مولانا ؟؟
مولانا : ما كفاية عمايل الشباب فينا
هشام : يا مولانا أنا لغاية هسي محترمك
مولانا : كدي أول حاجة إحترم نفسك و أقلع الكرافتة اللابسها مع الجلابية
والعمةدي ,, كلام غريب ياااااااااخ .

[مصطفى هاتريك]

فاصل و نواصل


أدونا شوية من حكاياتكم مع النسيان

[معتز الريح]

يا هاتريك ..
عندي واحده شبيهة لصاحبك هشام ..

وهي أنو أحد أعيان نادي كورة مجاور لبيتنا ..
عندهم مباراة صعود للدرجة الأولى ..
ومع التوتر رجع من السوق مستعجل ..
ودخل البيت غير ولبس جلابيتو .. وربط عمتو ..
وخت الشال في كتفو ..ولم يكن الشال إلا (سروال طويل) ..
وتحرك إلى الاستاد والغريبة مافي زول أخد بالو ..
إلا لما جابو قون .. وصاحبك في المقصورة الرئيسية
يلوح بما ظنه شال .. وكانت ليلة ليلاء ..

[محمد عبد الله عبدالقادر]

بعد وجبة غداء كااااربه في منزل الاسره الكبير وبحضور جميع افراد الاسره الكبيرة تفرق الحضور كل الى منزله ولحظات ويرن الموبايل من النسيب وهو يسأل
- ( بالله الموبايل انا نسيتو عنكم؟ )
- موبايل منو يا ابوالنسب؟
- الموبايل حقي !!
- يا سيد انت هسي متصل من ياتو موبايل!!!!!؟
- !!!!!!!!!!!!!!!!!!!! هيييييي والله من موبايلي زاااااتو

[مصطفى هاتريك]

يا هاتريك ..
عندي واحده شبيهة لصاحبك هشام ..

وهي أنو أحد أعيان نادي كورة مجاور لبيتنا ..
عندهم مباراة صعود للدرجة الأولى ..
ومع التوتر رجع من السوق مستعجل ..
ودخل البيت غير ولبس جلابيتو .. وربط عمتو ..
وخت الشال في كتفو ..ولم يكن الشال إلا (سروال طويل) ..
وتحرك إلى الاستاد والغريبة مافي زول أخد بالو ..
إلا لما جابو قون .. وصاحبك في المقصورة الرئيسية
يلوح بما ظنه شال .. وكانت ليلة ليلاء ..

الله يجازي محنك يا معتز

لي ساعة بتخيل في المنظر وبضحك

[مصطفى هاتريك]

بعد وجبة غداء كااااربه في منزل الاسره الكبير وبحضور جميع افراد الاسره الكبيرة تفرق الحضور كل الى منزله ولحظات ويرن الموبايل من النسيب وهو يسأل
- ( بالله الموبايل انا نسيتو عنكم؟ )
- موبايل منو يا ابوالنسب؟
- الموبايل حقي !!
- يا سيد انت هسي متصل من ياتو موبايل!!!!!؟
- !!!!!!!!!!!!!!!!!!!! هيييييي والله من موبايلي زاااااتو

زولك ده بعد الغداء حلا بشنو يا محمد ؟؟؟

مشكور على كريم المرور

[ودسمير]

واحد قالو كثير النسيان ....
مشى لى دكتور نفسى وقال ليهو والله يا دكتور انا بنسى كتييييير !

فقال له الدكتور : متى بدت ليك المشكله ؟

فرد صاحبنا : يا تو مشكله دى !!!

[ايمن عبد الله]

تسلم يا هاتريك على هذه الوجبة الدسمة يوم الجمعة ..

[ريمون]

والحكايه حقيقيه ..
عريس كثير النسيان من ناس امدرمان جا شهر العسل مدني اصحابه حجزوا ليه في امبريال وفي الاستقبال اتضح انو نسي القسيمه .. بي جاي وجاي اصحابه اقنعوا موظف الاستقبال يدخلهم .. المهم سألو الموظف الاسم .. فلان الفلاني .. اسم الزوجه .. اتردد شويه وقال ليها انتي اسمك منو ؟؟ اه فلانه الفلانيه ..
بتاع الاستقبال حلف بي دينو وايمانه ما يدخلهم الا بعد يجيبوا القسيمه ..
بطل الحكايه دكتور مشهور في امدرمان هسه ..

[مصطفى هاتريك]

واحد قالو كثير النسيان ....
مشى لى دكتور نفسى وقال ليهو والله يا دكتور انا بنسى كتييييير !

فقال له الدكتور : متى بدت ليك المشكله ؟

فرد صاحبنا : يا تو مشكله دى !!!

والله دي مشكلة إسحق الحلنقي ذاااتها

[مصطفى هاتريك]

تسلم يا هاتريك على هذه الوجبة الدسمة يوم الجمعة ..

المريخاب ديل أصلهم ما بعرفو حاجه إسمها دبل باص

يا خي ما ترجع لي الون ده .... ولا نسيت ؟؟؟؟؟؟؟؟؟؟؟؟؟؟

[مصطفى هاتريك]

والحكايه حقيقيه ..
عريس كثير النسيان من ناس امدرمان جا شهر العسل مدني اصحابه حجزوا ليه في امبريال وفي الاستقبال اتضح انو نسي القسيمه .. بي جاي وجاي اصحابه اقنعوا موظف الاستقبال يدخلهم .. المهم سألو الموظف الاسم .. فلان الفلاني .. اسم الزوجه .. اتردد شويه وقال ليها انتي اسمك منو ؟؟ اه فلانه الفلانيه ..
بتاع الاستقبال حلف بي دينو وايمانه ما يدخلهم الا بعد يجيبوا القسيمه ..
بطل الحكايه دكتور مشهور في امدرمان هسه ..

ريم يا ريم المنتدى

أهه و بعد القسيمة جات ,,, العروس النسوا إسمها يوم العسل دي

موقفها كان شنو ؟؟؟؟

[mahagoub]

الحكايات كتيره
لكن هاك دى
مره معزوم فطور فى البحوث
لبست جلابيتى وركبت البص لقيت واحد بعرفه
وهاك يا ونسه وضحك لمان وصلت
موقف البصات ونزلت واشتريت تذكره وركبت
البص مكيف والكرسى وهيط وهاك يا نوم
واحد بلكز فينى ويقول البص وصل
نزلت لقيت نفسى فى الخرطوم
الجماعه رجعت اتعشيت معاهم

[ريمون]

الحكايات كتيره
لكن هاك دى
مره معزوم فطور فى البحوث
لبست جلابيتى وركبت البص لقيت واحد بعرفه
وهاك يا ونسه وضحك لمان وصلت
موقف البصات ونزلت واشتريت تذكره وركبت
البص مكيف والكرسى وهيط وهاك يا نوم
واحد بلكز فينى ويقول البص وصل
نزلت لقيت نفسى فى الخرطوم
الجماعه رجعت اتعشيت معاهم

انت جاي من وين ؟؟؟؟؟

[ود المطامير]

الحبيب
كيفك ومشتاااقين

زمان مشيت إجازه السودان
وإشتريت بكسى موديل 83 سوبر وكنت حديث العهد بالسواقه وكدا

أهااا .. جبتو من الخرطوم ووصلت البيت بالليل وكان عندى معلومه
إنو العربيه لما تجى من مشوار طويل يخلوها شويه تقسم وبعد داك يبطلوها

وفعلا خليت البكسى مدور وما إتذكرتو إلا تانى يوم الساعه 10 صباحا

[ود المطامير]

مره أنا وعمى وأبوى كنا فى مطار أبوظبى ومنتظرين مواعيد الطائره
ماشين السودان ، قام جانا شاب شايل سيرمس وقال لينا دى حقنة سكرى
مرسلها للوالده وهى فى أمس الحوجه ليها اليوم وأخوانى بلاقوكم فى المطار

طوالى عمى نط وقال ليهو أبشر بالخير على الطلاق لو ما لاقونا أدينا العنوان
وح نوديها ليهم لحد مكانهم حتى ولو كانو فى نيالا

وشال منو الحقنه ووصلنا مطار الخرطوم الفجر
عند الباب فى شباب بسألو إنت فلان الفلانى ؟ إنتا فلان الفلان
وعترو فى عمى وهو طالع سألوهو إنتا فلان الفلانى ؟ قال ليهم نعم
قالو ليهو وينى الحقنه
أكان عمى خت يدينو فوق راسو وقال ليهم

على الطلاق ختيتا جمب مكيف مطار أبوظبى ونسيتا تب

[ود المطامير]

مره إشتريت لى بخاخ منظف للكربريتر
وفتشت لى لزول يدوس لى بانزين علشان أرش الكربريتر
لقيت لى بنغالى تعاااابن كدا داس بانزين أنا قلت قد الماكينه
شكرتو ومشيت جبت لى طوبه وضغطت بيها البانزين ورشيت الكربريتر تمام

بعد فتره .. مشيت لصاحبى مكنيكى .. لقيتو فاتح الكبود وشغال بجرب فى المكنه
بطول حسها بالياى الجمب الكربريتر ، أنا قعدت أضحك

قال لى مالك ؟ قلت ليهو لا مافى شئ

[safoo]

والله قتلتونى بالضحك الليلة ..قصصكم كلها روعة

غايتو مرة حصلت على حالة .. شايلة سماعة وباخد في النبض والتنفس لحصان .. كنت في مستشفي كدة ..ومزنوقة بديت شغلى متأخرة
افحص القلب مافى نبض افحص الرئة مافى صوت ..والحصان واقف قدامى ..وانا افكر ..طيب مات متين ؟ ياربي ده الموت السريري
رجعت لى وراء قلت اعاين ليه من بعيد .. عاوزة انزل السماعة من اضانى ..لقيتها اساسا انا ما خاتاها فى اضانى .. ركبتها وبديت من جديد

[safoo]

الحكايات كتيره
لكن هاك دى
مره معزوم فطور فى البحوث
لبست جلابيتى وركبت البص لقيت واحد بعرفه
وهاك يا ونسه وضحك لمان وصلت
موقف البصات ونزلت واشتريت تذكره وركبت
البص مكيف والكرسى وهيط وهاك يا نوم
واحد بلكز فينى ويقول البص وصل
نزلت لقيت نفسى فى الخرطوم
الجماعه رجعت اتعشيت معاهم

لكن انت مبااااالغة كوووم براك

[مصطفى هاتريك]

مره أنا وعمى وأبوى كنا فى مطار أبوظبى ومنتظرين مواعيد الطائره

الشغلة دي في الجينات و لا شنو يا ود المطامير ؟؟؟

دحين يا أخوي ما نازل إجازة قريب ؟؟؟؟

[مصطفى هاتريك]

لكن انت مبااااالغة كوووم براك

شفت كيف يا محجوووب

زي ما قالت بتنا دي

[مصطفى هاتريك]

والله قتلتونى بالضحك الليلة ..قصصكم كلها روعة

الروعه كل الروعه في حضورك و مشاركتك لنا

[الاستاذة]

ههههههه
لك التحية استاذي مصطفى هاتريك
دائما تكون مواضيعك ملاذ لنا نتنفس من خلالها الصعداء
فلك التحية ولكل من ساهم في هذا البوست بنشر ابتسامه